Hlela Ka Ha Ri Ni Nkarhi Naswona U Tirhisa Vutlhari Lebyi Pfunaka

Xifaniso xa jaha leri lahlekeke lexi Yesu a ha ku xi hlamuselaka xa leswaku Xikwembu xi tiyimisele ku rivalela vadyohi lava hundzukaka, xi fanele xi hlamarise valuvisi, vatsari ni Vafarisi lava yingiseleke. (Luka 15:1-7, 11) Sweswi Yesu u vulavula ni vadyondzisiwa vakwe. Sweswi u tirhisa xifaniso xin’wana lexi vulavulaka hi wanuna la fuweke loyi a tweke leswaku mulanguteri wa yindlu yakwe kumbe nandza a nga yi hlayisanga kahle nhundzu yakwe.

Yesu u vula leswaku nandza loyi, u lumbetiwa hi ku tlanga hi nhundzu ya n’wini wakwe. Hikwalaho, n’wini u vula leswaku nandza loyi u ta hlongoriwa. Nandza wa tivutisa a ku: “Xana ndzi ta endla yini leswi n’wini wa mina a ndzi hlongolaka? A ndzi na matimba yo tirha ntirho wo cela naswona swi ndzi khomisa tingana ku kombela.” Leswaku a lunghekela leswi nga ta endleka, u gimeta hi ku vula a ku: “Ndza swi tiva leswi ndzi nga ta swi endla leswaku loko ndzi hlongoriwa entirhweni, vanhu va ta ndzi amukela emakaya ya vona.” Hiloko hi ku hatlisa a vitana lava kolotaka n’wini wakwe, a ku: “Xana u n’wi kolota yini n’wini wanga?”—Luka 16:3-5.

Wo sungula u hlamula a ku: “Tibati ta 100 ta mafurha ya mutlhwari.” Toleto i tilitara ta 2 200 ta mafurha. Swi nga endleka leswaku mulombi yoloye a a ri ni nsimu ya mirhi ya mitlhwari kumbe a a ri muxavisi wa mafurha. Hiloko nandza loyi a ku eka yena: “Hi lowu ntwanano lowu u wu sayineke, tshama ehansi u hatla u tsala 50 [tilitara ta 1 100].”—Luka 16:6.

Nandza u vutisa un’wana a ku: “Wena ke, xana u kolota yini?” A hlamula a ku: “Tikoro ta 100 ta koroni.” Leti i tilitara ta 22 000. Nandza a byela la kolotaka a ku: “Hi lowu ntwanano lowu u wu sayineke, wu teke u tsala 80.” U hunguta xikweleti hi 20 wa tiphesente.—Luka 16:7.

Leswi nandza a ha kotaka ku lawula timali ta n’wini wakwe, u ni matimba yo hunguta swikweleti leswi vanhu va swi kolotaka n’wini wakwe. Hi ku hunguta leswi kolotiwaka, nandza u tiendlela vanghana ni vanhu lava va nga ta n’wi pfuna loko a lahlekeriwa hi ntirho wa yena.

Hi nkarhi wolowo n’wini u twa leswi endlekeke. Hambileswi n’wini loyi a lahlekeriweke, u tsakile a tlhela a bumabumela nandza wakwe hikuva ‘leswi a swi endleke swi kombisa leswaku u tlharihile hambi leswi a endleke swo biha.’ Yesu u engetela a ku: “Vanhu va misava leyi va tlharihile loko va tirhisana ni vanhu va rixaka ra vona ku tlula lava nga le ku vonakaleni.”—Luka 16:8.

Yesu a nga yimi na rona endlelo ra nandza loyi naswona a nga byi seketeli vukungundzwana bya mabindzu. Loko swi ri tano, xana u lava ku hi dyondzisa yini? U khutaza vadyondzisiwa vakwe a ku: “Tiendleleni vanghana hi rifuwo leri nga lulamangiki, leswaku loko ri hela, va ta mi amukela eka vutshamo lebyi nga heriki.” (Luka 16:9) Ina, ku ni leswi hi swi dyondzaka hi ku va ni vutlhari loko hi ehleketa hi swilo swa nkarhi lowu taka ni ku tirhisa vutlhari lebyi pfunaka. Malandza ya Xikwembu, ku nga vanhu “lava nga le ku vonakaleni,” va fanele va tirhisa rifuwo ra vona hi ndlela ya vutlhari, va ri karhi va ehleketisisa hi vumundzuku lebyi nga heriki.

I Yehovha Xikwembu ni N’wana wakwe ntsena lava nga amukelaka munhu eMfun’weni wa matilo kumbe eParadeyisini laha misaveni ehansi ka Mfumo wolowo. Hi fanele hi tikarhatela ku aka vuxaka lebyinene na vona hi ku tirhisa rifuwo ra hina leswaku hi seketela swilaveko swa Mfumo. Loko hi endla sweswo, hi nga tiyiseka leswaku hi ta kuma vumundzuku lebyi nga heriki loko nsuku, silivhere ni rifuwo swi hela.

Yesu u tlhela a vula leswaku vanhu lava tirhisaka ni ku langutela rifuwo ni swilo swin’wana hi ku tshembeka, va ta swi kota ku langutela swilo swa nkoka swinene hi ku tshembeka. Kutani u ri: “Hikwalaho, loko mi nga tshembeki eka rifuwo leri nga lulamangiki, i mani loyi a nga ta mi khomisa rifuwo ra ntiyiso [ro fana ni timhaka ta Mfumo]?”—Luka 16:11.

Yesu u kombisa vadyondzisiwa vakwe leswaku ku ta laviwa swo tala eka vona loko va lava ku amukeriwa “eka vutshamo lebyi nga heriki.” Munhu a nge swi koti ku va nandza wa ntiyiso wa Xikwembu loko hi hala tlhelo a va hlonga ra rifuwo ra misava leyi leri nga lulamangiki. Yesu u gimeta hi ku vula a ku: “A ku na nandza loyi a nga tirhelaka tihosi timbirhi, hikuva u ta venga yin’wana a rhandza leyin’wana, kumbe u ta namarhela yin’wana kutani a yi langutela ehansi leyin’wana. A mi nge vi mahlonga ya Xikwembu ni ya Rifuwo.”—Luka 16:9, 13.