Vutomi Ni Vutirheli Bya Yesu

Lunghiselela Vumundzuku Hi Vutlhari Lebyi Tirhaka

YESU wa ha ku heta ku vulavula hi mhaka ya n’wana wa vusopfa eka ntshungu lowu katsaka vadyondzisiwa va yena, valuvisi lava nga tshembekiki ni vadyohi van’wana lava xiyiweke, ni vatsari ni Vafarisi. Sweswi, loko a vulavula ni vadyondzisiwa va yena, u va byela xifaniso malunghana ni mufuwi la kumeke xiviko lexi nga tsakisiki ehenhleni ka mulanguteri wa yindlu ya yena, kumbe nandza.

Hi ku ya hi Yesu, mufuwi u vitana nandza wa yena kutani a n’wi byela leswaku u ta n’wi hlongola. Nandza wa tivutisa a ku: “Ndzi ta endla yini, leswi n’wini wa mina a ndzi tekelaka vulanguteri bya mina? Ku rima, a ndzi na ntamu. Ku kombela, swi khomisa tingana. Ndzi tiva lexi ndzi nga ta endla xona, leswaku vanhu va ndzi amukela emakaya ya vona loko ndzi ta va ndzi tekeriwile vulanguteri bya mina.”

Hi rihi rhengu ra mulanguteri? Kunene, u vitana lava nga ni xikweleti eka n’wini wa yena. Wa vutisa a ku: “Nandzu lowu u nga na wona eka n’wini wa mina wu fika kwihi xana?”

Wo sungula a hlamula a ku: “I 2 200 wa tilitara ta mafurha ya mutlhwari.’

A ku ka yena, ‘Teka papila ra nandzu wa wena, u tshama hansi, u hatla u tsala 1 100.’

A vutisa un’wana a ku: Wena ke, nandzu wa wena wu fika kwihi ke?’

A ku: ‘I 22 000 wa swirhundzu swa mavele.’

‘Teka papila ra wena, u tsala 18 000.’

Mulanguteri wa ha ri eka timfanelo ta yena eku hunguteni ka swikweleti leswi kolotiwaka n’wini wa yena, tanihi leswi a ha riki mulanguteri wa timhaka ta mali ya n’wini wa yena. Kutani hi ku hunguta mintsengo, u endla vunghana ni lava nga ta n’wi tlherisela tintswalo loko a lahlekeriwe hi ntirho wa yena.

Loko n’wini a twa leswi humeleleke, wa tsaka. Entiyisweni, u ‘dzunisa mulanguteri la nga tshembekangiki, hikuva a a endlile hi vutlhari lebyi tirhaka.’ Hakunene, Yesu wa engetela a ku “Vanhu va misava leyi va tlharihile eku tirhisaneni ni va ka vona ku tlula vanhu va ku vonakala.

Sweswi, loko a nyika vadyondzisiwa va yena dyondzo, Yesu u khutaza a ku: “Tiendleleni maxaka hi xuma xa misava leyi, leswaku loko mi tshuka mi pfumarile va mi amukela emintsongeni leyi nga heriki.”

Yesu a nga bumabumeli mulanguteri hikwalaho ka ku biha ka yena kambe hikwalaho ka vutlhari bya yena lebyi tirhaka byo vona swa le kule. Hakanyingi “vanhu va misava leyi” hi vutlhari va tirhisa mali ya vona kumbe xikhundla eku endleni ka vanghana ni lava va nga va tlheriselaka musa. Kutani malandza ya Xikwembu, “vanhu va ku vonakala,” na vona va lava ku tirhisa rifuwo ra vona leri vonekaka, “xuma xa misava leyi,” hi ndlela ya vutlhari leswaku va tipfuna.

Kambe tanihi laha Yesu a vulaka ha kona, va fanele va endla vanghana hi ku tirhisa xuma lexi ni lava va nga ta va amukela “emintsongeni leyi nga heriki.” Eka swirho swa ntlhambinyana, mintsonga leyi yi le tilweni; eka tinyimpfu tin’wana, yi le misaveni ya Paradeyisi. Tanihi leswi ku nga Yehova Xikwembu ni N’wana wa yena ntsena lava va nga amukelaka vanhu etindhawini leti, hi fanele hi tirha hi matimba eku tirhiseni ka ‘xuma xihi na xihi xa misava leyi’ lexi hi nga ha vaka na xona ku seketela timhaka ta Mfumo ivi xisweswo hi hlakulela vunghana na vona. Manuku ke, loko rifuwo leri vonekaka ri onhaka kumbe ri hela, tanihi leswi entiyisweni swi nga ta va tano, vumundzuku bya hina lebyi nga heriki byi ta tiyiseka.

Yesu u ya emahlweni a vula leswaku vanhu lava tshembekaka eku khathaleleni ka swilo leswi swi vonekaka, kumbe leswintsongo, nakambe va ta tshembeka eku khathaleleni ka timhaka ta nkoka swinene. U ya emahlweni a ku: “Kutani loko mi nga tshembekanga exumeni xa misava leyi, i mani la nga ta mi tshemba eka xuma lexi nga xa xiviri xana, [hi leswaku, timhaka ta moya, kumbe Mfumo]? Kutani loko mi nga vanga lavo tshembeka eswilweni swa un’wana [Timhaka ta Mfumo leti Xikwembu xi ti byarhisaka malandza ya xona], i mani la nga ta mi nyika leswi nga swa n’wina xana [hakelo ya vutomi lebyi nga heriki etindhawini to tshama eka tona]?”

Hi ku olova hi nga ka hi nga vi malandza ya Xikwembu kutani hi nkarhi lowu fanaka hi tlhela hi va mahlonga ya xuma lexi nga lulamangiki, rifuwo leri vonekaka, hi laha Yesu a hetelelaka ha kona: “A ku na nandza loyi a nga kotaka ku tirhela tihosi timbirhi, hikuva ú ta venga yin’wana, a rhandza yin’wana; kumbe ú ta namarhela yin’wana a sandza yin’wana. Mi nge koti ku tirhela Xikwembu ni rifuwo.” Luka 15:1, 2; 16:1-13.

◆ Xana mulanguteri exifanisweni xa Yesu u va endla njhani vanghana ni lava va nga ta n’wi pfuna endzhakunyana?

◆ Xana i yini “xuma xa misava leyi,” naswona hi nga va endla njhani vanghana hi ku tirhisa xona?

◆ I vamani lava nga hi amukelaka “emintsongeni leyi nga heriki,” naswona mintsonga leyi hi yihi?