Vavanuna Va Khume Va Nhlokonho Va Horisiwa—un’we Eka Vona A Kombisa Ku Tlangela

Leswaku a pfilunganya makungu ya huvo ya Sanedri ya ku n’wi dlaya, Yesu u ya emutini wa Efrayimi lowu nga en’walunguvuxa wa Yerusalema. U tshama kwalaho ni vadyondzisiwa vakwe laha ku nga ekule ni valala va yena. (Yohane 11:54) Hambiswiritano, nkarhi wa Paseka ya 33 C.E. wa tshinela kutani Yesu u fanele a tlhela a famba. U kongoma en’walungwini a tsemakanya hi le Samariya a ya fika eGaleliya, ku nga riendzo rakwe ro hetelela endhawini leyi a nga si fa.

Eku sunguleni ka pfhumba rakwe loko a suka emutini wun’wana a ya eka wun’wana, u hlangana ni vavanuna va khume lava nga ni nhlokonho. Mikarhi yin’wana, vuvabyi lebyi byi nga dlaya tisele leti endlaka leswaku tintiho, swikunwana kumbe tindleve swi tirha. (Tinhlayo 12:10-12) Nawu wa Xikwembu wu vula leswaku munhu loyi a nga ni nhlokonho u fanele a huwelela a ku “A ndzi tenganga, a ndzi tenganga!” naswona u fanele a tshama a ri yexe.—Levhitika 13:45, 46.

Ku pfumelelana ni sweswo, vavanuna lava va khume lava nga ni nhlokonho va yimela ekule na Yesu. Nilokoswiritano, va huwelela va ku: “Yesu, Mudyondzisi, hi twele vusiwana!” Loko a va vona, Yesu a ku eka vona: “Fambani mi ya voniwa hi vaprista.” (Luka 17:13, 14) Hikwalaho, u kombisa ku xixima Nawu wa Xikwembu lowu a wu vula leswaku vaprista hi vona va faneleke va vula loko vanhu lava nga ni nhlokonho va tengile nileswaku va horisiwile eka vuvabyi bya vona. Endzhaku ka sweswo hi kona va nga tlhelaka va tshama ni vanhu lava hanyeke kahle.—Levhitika 13:9-17.

Vavanuna lava va khume lava nga ni nhlokonho va ma tshemba matimba ya Yesu yo endla masingita. Hiloko va kongoma eka vaprista, hambileswi a va nga si horisiwa. Leswi va nga ni ripfumelo eka Yesu, va hanyisiwile loko va ha ri endleleni. Va sungula ku swi xiya ni ku titwa leswaku se va horile!

Vavanuna lava va kaye lava nga ni nhlokonho va ya emahlweni ni riendzo ra vona. Kambe wanuna un’we eka vona a nga endli tano. Wanuna loyi wa Musamariya u tlhelela endzhaku a ya lava Yesu. Hikwalahokayini? Wanuna loyi u kombisa ku tlangela swinene eka Yesu hikwalaho ka leswi swa ha ku humelelaka. Wanuna loyi a a ri ni nhlokonho u “dzunisa Xikwembu hi ntsako” hikuva wa swi xiya leswaku Xikwembu hi xona lexi endleke leswaku a hanyisiwa. (Luka 17:15) Loko a kuma Yesu, u wela emahlweni ka yena ivi a n’wi khensa.

Yesu u byela vanhu lava a nga na vona a ku: “Xana a va hanyisiwanga va ri khume? Kutani xana lava kaye va kwihi? Xana a ku na un’wana loyi a vuyeke a ta dzunisa Xikwembu handle ka wanuna loyi wa rixaka rin’wana?” Kutani Yesu a byela Musamariya a ku: “Pfuka u famba; ripfumelo ra wena ri ku hanyisile.”—Luka 17:17-19.

Leswi Yesu a horiseke vavanuna va khume lava nga ni nhlokonho, u kombisa leswaku u pfuniwa hi Yehovha Xikwembu. Sweswi un’we eka lava khume a nga lo horisiwa ntsena hi singita ra Yesu kambe se u le ndleleni ya vutomi. A hi hanyi eka wona nkarhi lowu Xikwembu xi tirhisaka Yesu ku horisa vanhu hi ndlela leyi. Kambe loko hi va ni ripfumelo eka Yesu, hi nga va endleleni ya vutomi ku nga vutomi lebyi nga heriki. Xana ha swi kombisa leswaku ha tlangela hilaha wanuna wa Musamariya a endleke hakona?