Ndzima 92

Khume Ra Vanhu Va Nhlokonho Va Hanyisiwa ePfhumbeni Ra Yesu Ro Hetelela Ro Ya eYerusalema

YESU u herisa matshalatshala ya Sanedri yo n’wi dlaya hi ku suka eYerusalema kutani a ya emutini wa Efrayimi, kumbexana kwalomu ka tikhilomitara ta 24 en’walungu-vuxa bya Yerusalema. Kwalaho u tshama ni vadyondzisiwa va yena, kule ni valala va yena.

Hambi swi ri tano, nkarhi wa Paseka ya 33 C.E. wa tshinela, naswona ku nga ri khale Yesu u le riendzweni. U famba hi le Samariya kutani a ya eGaleliya. Leri i riendzo ra yena ro hetelela emugangeni lowu emahlweni ka rifu ra yena. Loko a ri eGaleliya, hi ku fanana yena ni vadyondzisiwa va yena va joyina van’wana lava nga endleleni ya vona yo ya eYerusalema enkhubyeni wa Paseka. Va teka ndlela leyi tsemakanyaka xifundza xa Periya evuxeni bya Nambu wa Yordani.

Eku sunguleni ka riendzo, loko Yesu a nghena eximutanini ku nga ha va ku ri le Samariya kumbe eGaleliya, u hlanganisiwa hi vavanuna va khume lava nga ni nhlokonho. Vuvabyi lebyi byo biha byi dya swirho swa miri wa munhu hakantsongo-ntsongo—tintiho ta yena, swikunwana swa yena, tindleve ta yena, nhompfu ya yena, ni milomu ya yena. Ku sirhelela van’wana leswaku va nga tluleriwi, mayelana ni la nga ni nhlokonho Nawu wa Xikwembu wu ri: “A tisirelela malepfu, kutani o ta ṭhama a huwelela: La yilaka, la yilaka! Hi masiku hinkwawo ya vuvabyi bya yena, u ta va la nga tengangiki. . . . U ta tshama a ri swakwe.”

Vanhu va khume va nhlokonho va landzela Nawu wa vanhu lava nga ni nhlokonho kutani va yima ekule ngopfu na Yesu. Kambe, va huwelela hi marito lama tlakukeke va ku: “Yesu, n’wini wa hina hi twele vusiwana!”

U va vona va ri ekule, Yesu wa lerisa a ku: “Fambani, mi ya tikomba eka vaprista.” Yesu u vula leswi hikuva Nawu wa Xikwembu wu pfumelela vaprista ku tivisa vanhu lava a va ri ni nhlokonho lava hlakarheleke evuvabyini bya vona tanihi vanhu va nhlokonho lava tshunguriweke. Hi ndlela leyi vanhu vo tano va kuma mpfumelelo wo tlhela va tshama ni vanhu va rihanyo lerinene.

Vanhu va khume va nhlokonho va tshemba matimba ya masingita ya Yesu. Kutani va hatlisa va ya vona vaprista, hambi leswi va nga siki hanyisiwaka. Loko va ri endleleni, ripfumelo ra vona eka Yesu ra hakeriwa. Va sungula ku vona ni ku twa rihanyo ra vona leri kondleteriweke!

Kaye wa vanhu va nhlokonho lava basisiweke va ya emahlweni ni riendzo ra vona, kambe loyi un’wana wa nhlokonho, Musamariya, wa tlhela a ya lava Yesu. Ha yini? Hikuva u tlangela ngopfu leswi n’wi humeleleke. U dzunisa Xikwembu hi rito leri tlakukeke, kutani loko a kuma Yesu, u wela emilengeni ya yena, a n’wi nkhensa.

Yesu u hlamula a ku: “Xana a va basisiwanga va ri khume ke? Lava va 9 va kwihi xana? Xana a ku kumekanga ni van’wana lava nga vuyela endzhaku ku ta dzunisa Xikwembu, ehandle ka munhu loyi wa rixaka rimbe xana?”

Kutani u byela wanuna wa Musamariya a ku: “Pfuka, u yima, u tifambela, ku pfumela ka wena ku ku hanyisile.”

Loko hi hlaya hi ku hanyisa ka Yesu vanhu va nhlokonho va khume, hi fanele hi xiya dyondzo leyi hlamuseriwaka hi xivutiso xa yena: “Lava va 9 va kwihi xana?” Ku pfumala ku tlangela loku ku kombisiweke hi lava kaye i xidyoho lexikulu. Xana hi ta kombisa ku tlangela swilo leswi hi swi kumaka eka Xikwembu, ku katsa xitshembiso lexi tiyeke xa vutomi lebyi nga heriki emisaveni leyintshwa yo lulama ya Xikwembu, ku fana ni Musamariya? Yohane 11:54, 55; Luka 17:11-19; Levitika 13:16, 17, 45, 46; Nhlavutelo 21:3, 4.

▪ Xana Yesu u ya herisa njhani matshalatshala yo n’wi dlaya?

▪ Xana Yesu endzhakunyana u famba kwihi, naswona u kongome kwihi?

▪ Ha yini vanhu va nhlokonho va yima ekule, naswona ha yini Yesu a va byela leswaku va ya eka vaprista?

▪ I dyondzo yihi leyi hi faneleke ku yi dyondza eka ntokoto lowu?