Swilo Swimbirhi Swa Nkoka—Xikhongelo Ni Ku Titsongahata

Yesu se a a va byerile vadyondzisiwa vakwe hi xifaniso lexi vulavulaka hi ku phikelela exikhongelweni. (Luka 11:5-13) Swi nga endleka sweswi se a ri eSamariya kumbe eGaleliya naswona u tlhela a kandziyisa nkoka wo phikelela exikhongelweni. U endla tano hi ku tirhisa xifaniso lexi landzelaka:

“Emutini wun’wana a ku ri ni muavanyisi loyi a a nga xi chavi Xikwembu naswona a a nga va xiximi vanhu. Nakambe a ku ri ni noni emutini wolowo leyi a yi tshamela ku ya eka yena, yi ku, ‘Ndzi tshembise leswaku mhaka ya mina ni loyi a nga ndzi mangalela yi ta ahluriwa kahle.’ Ku hele nkarhi wo karhi a nga swi lavi ku pfuna noni leyi, kambe hi ku famba ka nkarhi a tibyela a ku, ‘Hambileswi ndzi nga xi chaviki Xikwembu kumbe ku xixima vanhu, kambe, hikwalaho ka leswi noni leyi yi tshamelaka ku ndzi karhata, ndzi ta ahlula mhaka ya yona kahle, leswaku yi nga ha vuyi yi ta ndzi pandzisa nhloko.’”—Luka 18:2-5.

Leswaku a va endla va twisisa mhaka leyi, Yesu u ri: “Xana mi swi twile leswi muavanyisi a swi vuleke, hambileswi a nga lulamangiki? Kutani, xana Xikwembu a xi nge endli leswaku lava xi va hlawuleke, ku nga lava va xi khongelaka vusiku ni nhlikanhi va avanyisiwa kahle, xi tlhela xi va lehisela mbilu?” (Luka 18:6, 7) I yini leswi Yesu a swi vulaka hi Tata wakwe?

Swi le rivaleni leswaku Yesu a nga vuli swona leswaku Yehovha Xikwembu u fana ni muavanyisi loyi a nga lulamangiki. Kambe u vula leswi: Loko muavanyisi loyi a nga lulamangiki a kota ku hlamula swikombelo leswi phindhiweke ko tala, Xikwembu xi ta endla leswi fanaka handle ko kanakana. I Xikwembu xo lulama naswona i xinene ngopfu kutani xi ta hlamula swikhongelo swa vanhu va xona lava nga tshikiki ku khongela hi ku phindhaphindha. Sweswo hi swi vona eka leswi Yesu a tlhelaka a swi vula loko a ku: “Ndza mi byela, [Xikwembu] xi ta endla leswaku va hatla va avanyisiwa kahle.”—Luka 18:8.

Mikarhi yo tala lava titsongahataka ni swisiwana a va khomiwi hi ndlela leyinene kambe swifumi ni lava va nga ni matimba va tekeriwa enhlokweni. Kambe Xikwembu a xi endli tano. Hi nkarhi lowu faneleke Xikwembu xi ta xupula lava hombolokeke naswona xi ta nyika malandza ya xona vutomi lebyi nga heriki.

I va mani lava nga ni ripfumelo leri fanaka ni ra noni? I vangani lava tshembaka leswaku Xikwembu xi ta “endla leswaku va hatla va avanyisiwa kahle”? Yesu wa ha ku hlamusela xifaniso lexi vulavulaka hi xilaveko xa ku phikelela exikhongelweni. Loko a vulavula hi ripfumelo leri va faneleke va va na rona eka matimba ya xikhongelo, u vutisa a ku: “Loko N’wana wa munhu a fika, xana u ta ri kuma ripfumelo ro tano emisaveni?” (Luka 18:8) Kreste u vula leswaku loko a vuya, ripfumelo rolero ri ta va ri nga tolovelanga.

Van’wana lava yingiseleke Yesu va tibyela leswaku va na rona ripfumelo. Hambileswi va langutelaka van’wana ebodlheleni, va titeka va lulamile. Yesu u kongomisa xifaniso lexi eka vanhu volavo a ku:

“A ku ri ni vavanuna vambirhi lava yeke etempeleni ku ya khongela, un’wana a a ri Mufarisi kasi loyi un’wana a a ri muluvisi. Mufarisi a yima, a sungula ku khongela hi mbilu a ku, ‘Xikwembu xanga, ndza ku khensa hileswi ndzi nga faniki ni vanhu lavan’wana, lava nga ni makwanga, lava nga lulamangiki, vaoswi, hambi ku ri muluvisi loyi. Ndzi titsona swakudya kambirhi hi vhiki; ndzi nyikela vukhume bya swilo hinkwaswo leswi ndzi swi kumaka.’”—Luka 18:10-12.

Vafarisi va dume hi ku tiendla lava lulameke exikarhi ka vanhu. Va endla sweswo leswaku va tsakisa vanhu. Va tala ku titsona swakudya hi Musumbhunuku ni hi Ravumune, ku nga masiku lama nga ni mikitsikitsi etimakete letikulu laha vanhu vo tala a va ta va vona. Nakambe a va hakela hambi ku ri vukhume bya swimilana leswitsongo. (Luka 11:42) Eka tin’hweti ti nga ri tingani leti hundzeke, va kombise ndlela leyi a va va delela hayona vanhu lava tolovelekeke hi ku vula va ku: “Xikwembu a xi va tsakeli vanhu lava, [hi ku ya hi vonelo ra Vafarisi] lava nga wu tiviki Nawu.”—Yohane 7:49.

Yesu u ya emahlweni a hlamusela xifaniso a ku: “Kambe muluvisi a a yime ekule, a nga lavi ni ku languta ematilweni, kambe a tisola a ku, ‘Xikwembu xanga, ndzi twele vusiwana hikuva ndzi mudyohi.’” Swi le rivaleni leswaku muluvisi a swi xiya swihoxo swakwe. Yesu u gimeta hi ku vula a ku: “Ndza mi byela, wanuna loyi u muke a a ri wo lulama swinene emahlweni ka Xikwembu ku tlula Mufarisi. Hikuva un’wana ni un’wana loyi a titlakusaka u ta khomisiwa tingana, kambe loyi a titsongahataka u ta tlakusiwa.”—Luka 18:13, 14.

Yesu u xi hlamusela kahle xilaveko xo titsongahata. Yoleyo a ku ri ndzayo ya nkoka eka vadyondzisiwa vakwe lava kuleleke endhawini leyi Vafarisi a va titeka va lulamile ni ku rhangisa swikhundlha. Nakambe i ndzayo ya nkoka eka valandzeri hinkwavo va Yesu.