Ndzima 94

Xilaveko Xa Xikhongelo Ni Ku Titsongahata

ENDZHAKUNYANA loko a ri eYudiya, Yesu u vulavule hi xifaniso mayelana ni nkoka wa ku phikelela eku khongeleni. Sweswi, eriendzweni ra yena ro hetelela ro ya eYerusalema, nakambe u kandziyisa xilaveko xa ku phikelela eku khongeleni. Kumbexana Yesu wa ha ri eSamariya kumbe eGaleliya loko a byela vadyondzisiwa va yena xifaniso xin’wana a ku:

“Emutini wun’wana a ku ri ni muavanyisi loyi a a nga chavi Xikwembu, ni vanhu a a nga vuri nchumu ha vona. Emutini wolowo, a ku ri ni wansati wa noni la nga ta eka yena, a ku: ‘Ndzi avanyisele eka loyi a ndzi tengisaka.’ Swi tekile nkarhi lowo leha yena a ha ala. Kambe endzhaku a tianakanya, a ku: ‘Hambi loko ndzi nga chavi Xikwembu, ndzi nga vuri nchumu hi vanhu, leswi noni leyi yi ndzi karhataka, ndzi ta yi avanyisela, leswaku yi nga ha tshameli ku ndzi pandzisa nhloko hi ku ta haleno.’”

Yesu u tirhisa xifaniso xa yena, a ku: “Yingisani leswi vuriwaka hi muavanyisi loyi la nga tshembekangiki. Kutani, xana Xikwembu a xi nga avanyiseri vahlawuriwa va xona, ni ku va lehisela mbilu, vona lava huwelelaka eka xona vusiku ni nhlekanhi, xana?”

Yesu a nga vuli swona leswaku Yehova Xikwembu u fana ni muavanyisi loyi wo biha hi ndlela yo karhi. Ematshan’wini ya sweswo, loko hambi ku ri muavanyisi lowo biha a ta amukela swikombelo leswi phikeleriwaka, a swi fanelanga swi kanakanisa leswaku Xikwembu, lexi lulameke ni lexinene hi laha ku heleleke, xi ta hlamula loko vanhu va xona va nga tshiki ku khongela. Kutani Yesu u hambeta a ku: “[Xikwembu] xi ta hatlisa ku va avanyisela.”

Hakanyingi vululami a byi endliwi eka lava nga ehansi ni swisiwana, kambe vamatimba ni lava fumeke hakanyingi va endleriwa. Hambi swi ri tano, Xikwembu a xi nge endli leswaku lavo biha va xupuriwa hi ku lulama ntsena kambe xi ta tiyiseka leswaku malandza ya xona ma khomiwa hi ku lulama hi ku ma nyika vutomi lebyi nga heriki. Kambe i vanhu vangani lava tshembaka hakunene leswaku Xikwembu xi ta vangela vululami leswaku byi endliwa hi xihatla?

Loko a kongomisa ngopfu-ngopfu eka ripfumelo leri yelanaka ni matimba ya xikhongelo, Yesu wa vutisa: “Kambe loko N’wana-wa-Munhu a ta, xana u ta kuma ku pfumela ku ri kona emisaveni xana?” Hambi leswi xivutiso xi tshikiweke xi nga hlamuriwanga, nhlamuselo ku nga ha va ku ri leswaku ripfumelo ro tano ri ta va ri nga tolovelekanga loko Kriste a ta ematimbeni ya Mfumo.

Exikarhi ka lava yingiseleke Yesu ku na van’wana lava va titwaka va titshemba swinene eripfumelweni ra vona. Va titshemba leswaku va lulamile, naswona va langutela van’wana ehansi. Vanhu van’wana lava va nga vadyondzisiwa va Yesu va nga ha katsiwa entshungwini. Kutani u kongomisa xifaniso lexi landzelaka eka vanhu vo tano a ku:

“Vanhu vambirhi va tlhandlukele eTempeleni ku ya khongela; un’wana a a ri Mufarisi, un’wana a a ri muluvisi. Mufarisi a yima, a khongerisa leswi embilwini ya yena, a ku: ‘Xikwembu, ndza ku nkhensa leswi ndzi nga faniki ni vanhu van’wana, lava nga ni makwanga, lava nga tshembekangiki, lava oswaka, ni leswi ndzi nga faniki ni muluvisi loyi. Ndzi titsona swakudya kambirhi hi vhiki, ndzi humesa vukhume bya hinkwaswo leswi ndzi swi fuweke.’”

Vafarisi va tiviwa hi ku kombisa ku lulama ka vona eka mani na mani leswaku va tsakisa van’wana. Masiku ya ntolovelo yo kombisa ku titsona ka vona swakudya i Musumbunuku ni Ravumune, naswona va hakela vukhume hi vukheta hambi ku ri bya timitsu letintsongo ta le nsin’wini. Tin’hweti ti nga ri tingani leti hundzeke, ku sola ka vona vanhu lava tolovelekeke ku kombisiwile hi nkarhi wa Nkhuvo wa Mintsonga loko va ku: “Loko va ri vanhu va ntshungu wolowo, lava nga tiviki Nawu [sweswo i ku hundzuluxela ka Vufarisi loku kongomisiweke eka wona] va rhukaniwile.”

Loko a hambeta ni xifaniso xa yena, Yesu u hlamusela hi munhu wo tano la ‘rhukaniweke’: “Muluvisi yena a a yimele kule, a chava ni ku tlakusa mahlo ya yena etilweni, kambe a tiba xifuva, a ku: ‘Xikwembu, ndzi twele vusiwana, mina ndzi nga mudyohi.’” Hikuva muluvisi u pfumele swidyoho swa yena hi ku titsongahata, Yesu u ri: “Ndzi ri eka n’wina: Muluvisi loyi u ngirimele kaya ka yena a hlayiwile la lulameke ku tlula Mufarisi; hikuva un’wana ni un’wana la tikurisaka, u ta tsongahatiwa, ni la titsongahataka u ta kurisiwa.”

Xisweswo Yesu u tlhela a kandziyisa xilaveko xa ku titsongahata. Leswi va kurisiweke endhawini leyi Vafarisi lava tivulaka vo lulama va nga ni nkucetelo naswona xitshamo ni xikhundla minkarhi hinkwayo swi kandziyisiwaka eka yona, a swi hlamarisi leswi hambi va ri vadyondzisiwa va Yesu va khumbekaka. Hambi swi ri tano, mawaku tidyondzo letinene swonghasi ta ku titsongahata leti Yesu a ti dyondzisaka! Luka 18:1-14; Yohane 7:49.

▪ Ha yini muavanyisi la nga tshembekiki a amukela xikombelo xa noni, naswona i dyondzo yihi leyi dyondzisiwaka hi xifaniso xa Yesu?

▪ Xana i ripfumelo rihi leri Yesu a nga ta ri lava loko a fika?

▪ Xana Yesu u xi kongomisa eka vamani xifaniso xa yena ehenhleni ka Mufarisi ni muluvisi?

▪ Xana i langutelo rihi ra Vafarisi leri ri faneleke ku papalatiwa?