Hosi Yi Nghena Eyerusalema Yi Gade Ximbhongolwana

Hi siku leri landzelaka hi Sonto wa Nisani 9, Yesu u suka eBetaniya a ri ni vadyondzisiwa vakwe ivi va kongoma eYerusalema. Loko va ri karhi va tshinela emutini wa Betefage eNtshaveni ya Mutlhwari, Yesu u byela vadyondzisiwa vakwe vambirhi a ku:

“Yanani eximutanini lexi mi langutaneke na xona, mi ta kuma mbhongolo yi tsimbiwile yi ri ni ximbhongolwana. Ti tshunxeni mi vuya na tona. Loko un’wana a mi vutisa, mi fanele mi ku, ‘Hosi ya ti lava.’ Kutani u ta mi tshika mi famba na tona.”—Matewu 21:2, 3.

Vadyondzisiwa a va swi xiyi leswaku leswi Yesu a va dyondzisaka swona swi katsa ku hetiseka ka vuprofeta bya le Bibeleni. Hambiswiritano, endzhakunyana va kote ku twisisa ku hetiseka ka vuprofeta bya Zakariya. U profete leswaku Hosi leyi tshembisiweke ya Xikwembu yi ta ta eYerusalema yi “titsongahata naswona yi gade mbhongolo, Yi gade ximbhongolwana, n’wana wa mbhongolo ya xisati.”—Zakariya 9:9.

Loko vadyondzisiwa va fika eBetefage, va teka ximbhongolwana xa xinuna ni mana wa xona kutani vanhu lava a va yime kwalaho va va vutisa va ku: “Mi xi tshunxela yini ximbhongolwana xexo?” (Marka 11:5) Kambe loko va twa leswaku a swi laviwa hi Hosi, va tshika vadyondzisiwa va swi yisa eka Yesu. Vadyondzisiwa va tlhandleka tinguvu ta vona ta le handle ehenhla ka mbhongolo ni n’wana wa yona kutani Yesu a gada ximbhongolwana.

Ntshungu wu ya wu andza loko Yesu a ri ekusuhi ni ku fika eYerusalema. Vo tala va andlala swiambalo swa vona swa le handle endleleni. Van’wana va tsema marhavi ensinyeni kumbe “switluka emasin’wini” kutani va swi andlala ehansi. Va huwelela va ku: “Ha khongela, n’wi ponise! U katekile loyi a taka hi vito ra Yehovha! Wu katekile Mfumo lowu taka wa tata wa hina Davhida!” (Marka 11:8-10) Vafarisi lava a va ri exikarhi ka ntshungu va hlundzukisiwa hileswi swi vuriwaka. Va byela Yesu va ku: “Mudyondzisi, byela vadyondzisiwa va wena va miyela.” Yesu u va hlamula a ku: “Ndza mi byela, loko vanhu lava vo miyela, maribye ma ta huwelela.”—Luka 19:39, 40.

Loko Yesu a vona Yerusalema, a sungula ku rila kutani a ku: “Loko a wu twisise swilo leswi nga ta ku endla u va ni ku rhula, kambe swilo sweswo u fihleriwe swona.” Yerusalema wu ta xupuriwa hikwalaho ko ala hi vomu ku yingisa. Yesu u profeta a ku: “Hikuva ku ta fika nkarhi lowu valala va wena va nga ta aka rirhangu hi timhandzi to tontswa ri ku rhendzela, va ku kayakayisa matlhelo hinkwawo. Va ta ku lovisa wena ni vana va wena naswona a va nge siyi ribye ehenhla ka ribye rin’wana eka wena, hikuva a wu wu xiyanga nkarhi wa ku kamberiwa ka wena.” (Luka 19:42-44) Hilaha Yesu a vuleke hakona, Yerusalema wu lovisiwile hi lembe ra 70 C.E.

Loko Yesu a nghena eYerusalema, ‘muti hinkwawo wu yimayimeka, wu ku: “I mani loyi?”’ Mitshungu yi tshamela ku vula yi ku: “Loyi i muprofeta Yesu, la humaka eNazareta wa Galeliya!” (Matewu 21:10, 11) Lava nga exikarhi ka ntshungu lava voneke loko Yesu a pfuxa Lazaro, va byela van’wana hi singita rero. Vafarisi va vilerisiwa hileswaku leswi a swi va pfuni nchumu. Va byelana va ku: “Vanhu hinkwavo va n’wi landzela.”—Yohane 12:18, 19.

Yesu u ya etempeleni a ya dyondzisa hilaha a a tolovele ku endla hakona loko a ri eYerusalema. Loko a ri kwalaho, u horisa lava feke mahlo ni lava lamaleke. Vaprista lavakulu ni vatsari va hlundzuka loko va vona leswi a swi endlaka ni ku twa vafana va huwelela etempeleni va ku, “Ha khongela, a ku ponisiwe N’wana wa Davhida.” Varhangeri va vukhongeri va vutisa Yesu va ku: “Xana wa swi twa leswi vuriwaka?” U hlamula a ku: “Xana a mi si tshama mi hlaya leswi, ‘U humese swidzuniso hi milomu ya vana ni tincece’?”—Matewu 21:15, 16.

Yesu u halahala hinkwako leswaku a langutisa swilo leswi nga etempeleni. Leswi se a ri perile, Yesu u famba ni vaapostola vakwe. Nimixo hi Nisani 10, u tlhelela eBetaniya laha a nga fika a etlela kona hi Sonto.