Ndzima 102

Ku Nghena Loku Hlulaka Ka Kriste eYerusalema

MIXO lowu tlhandlamaka, hi Sonto, Nisan 9, Yesu a huma Betaniya ni vadyondzisiwa va yena a tlhandlukela eNtshaveni ya Mitlhwari a kongoma eYerusalema. Hi xinkarhana, va tshinelela Betefage, kusuhi ni Ntshava ya Mitlhwari. Yesu u rhuma vambirhi va vadyondzisiwa va yena:

“Yanani emutini lowu vonakaka emahlweni lahaya, mi ta hatla mi kuma mbhongholo ya ntswele leyi bohiweke, yi ri ni ximbhongholwana xa yona; mi ti ntshunxa mi ta na tona haleno. Loko munhu a mi vutisa xo mi vutisa, mi ta ku: ‘Hosi ya ti lava.’ Kutani ú ta hatla a mi nyiketa tona.”

Hambi leswi eku sunguleni vadyondzisiwa va hlulekeke ku twisisa leswaku swileriso leswi a swi yelana ni ku hetiseka ka vuprofeta bya Bibele, endzhakunyana va swi twisisile. Muprofeta Zakariya u vhumbile leswaku Hosi leyi tshembisiweke ya Xikwembu yi ta nghena eYerusalema hi mbhongolo, ina, ‘a ri ehenhla ka xiharhi lexi kuleke, n’wana wa mbhongolo ya ntswele.’ Hi ku fanana Hosi Solomoni u khandziyile ximbhongolwana eku totiweni ka yena.

Loko vadyondzisiwa va nghena Betefage va teka ximbhongolwana ni mana wa xona, van’wana lava yimeke kwalaho va ri: “Mi ntshunxela yini ximbhongholwana xexo ke?” Kambe endzhaku ka loko va byeriwile leswaku ximbhongolwani i xa Hosi, vavanuna va tshika vadyondzisiwa va ti yisa eka Yesu. Vadyondzisiwa va andlala tinguvu ta vona ehenhla ka mbhongolo ni n’wana wa yona, kambe Yesu a khandziya ximbhongolwana.

Loko Yesu a kongoma Yerusalema, ntshungu wa engeteleka. Vanhu vo tala va andlala tinguvu ta vona endleleni, loko van’wana va tsema marhavi ya mirhi va ya hangalasela. “A ku dzunisiwe Mufumi la taka hi vito ra [Yehova]!” va huwelela. “Ku rhula a ku ve ematilweni, ni ku kwetsima ematilweni ya le henhla!”

Vafarisi van’wana exikarhi ka ntshungu va tlhaviwa hi xitiviso lexi kutani va vilela eka Yesu va ku: “Mudyondzisi, tshinya vadyondzisiwa va wena.” Yesu a va hlamula a ku: “Ndza mi byela, loko vona va miyela, maribye ma ta huwelela.”

Loko Yesu a tshinelela Yerusalema, a vona muti kutani a sungula ku wu rilela, a ku: “Yo! Mawaku, loko ingi na wena namuntlha u tivile timhaka leti ta ku rhula ka wena. Kambe sweswi ti fihliwile emahlweni ka wena.” Hi ku tinonon’hwisa ka yena, Yerusalema u ta riha, hi laha Yesu a vhumbaka ha kona a ku:

“Valala va wena [Varhoma ehansi ka Ndhuna Tito] va . . . ta ku biyela rirhangu . . . va ku rhendzela u sala xikarhi, va ku sivelela hi matlhelo hinkwawo; va ta ku hindzimuxela ehansi, wena ni vanhu lava akeke ka wena; kutani va nga ka va nga tshiki ribye ehenhla ka ribye rin’wana eka wena.” Ku onhiwa loku ka Yerusalema loku profetiweke hi Yesu kahle-kahle ku humelele 37 wa malembe endzhakunyana hi lembe ra 70 C.E.

Mavhiki ma nga ri mangani emahlweninyana, vo tala exikarhi ka ntshungu va vone Yesu loko a pfuxa Lazaro. Kutani lava va ya emahlweni va byela van’wana hi singita rero. Kutani loko Yesu a nghena eYerusalema, muti hinkwawo wa yima-yimeka. “Munhu loyi, i mani xana?” Vanhu va lava ku tiva. Kutani mintshungu yi hlamula yi ku: “Munhu loyi i Yesu, muprofeta la humaka eNazareta wa Galeliya.” Hi ku vona leswi humelelaka, Vafarisi va vilela leswaku a va humeleli, hi laha va vulaka ha kona: “Misava hinkwayo yi landza yena.”

Tanihi mukhuva wa yena loko a endzele eYerusalema, Yesu u nghena etempeleni ku ya dyondzisa. Kwalaho lavo-fe-mahlo ni lavo khwita va ta ka yena, kutani a va hanyisa! Loko vaprista lavakulu ni vatsari va vona mahlori lawa Yesu a ma endlaka ni loko va twa vana va huwelela etempeleni, va ku “[Ha ku kombela, hi ponise,] N’wana Davhida,” va hlundzuka. Va ku ka yena: “Wa swi twa leswi vana lava va vulaka swona xana?”

“Ina,” Yesu a hlamula. “Xana a mi si hlaya rito leri nge: ‘U dzunisiwile hi ndlela leyo hetiseka hi milomu ya vana ni ya lava mamaka,’ xana?”

Yesu u ya emahlweni ni ku dyondzisa, kutani a languta swilo hinkwaswo leswi a swi ri kona etempeleni. Hi ku hatlisa nkarhi a wu fambile. Kutani a huma ni lava 12, a tlhelela endzhaku kwalomu ka tikhilomitara tinharhu a ya eBetaniya. Kwalaho u tshame vusiku bya Sonto, kumbexana endlwini ya munghana wakwe Lazaro. Matewu 21:1-11, 14-17; Marka 11:1-11; Luka 19:29-44; Yohane 12:12-19; Zakaria 9:9.

▪ Yesu u nghena rini eYerusalema tanihi Hosi, naswona hi mukhuva wihi?

▪ I swa nkoka ku fikela kwihi leswaku mintshungu yi dzunisa Yesu?

▪ Yesu u titwisa ku yini loko a vona Yerusalema, naswona i vuprofeta byihi lebyi a byi vulaka?

▪ Ku humelela yini loko Yesu a nghena etempeleni?