Va Endle Ku Rhandza Ka Yehovha

Yesu A Dzunisiwa Tanihi Mesiya Tlhelo Hosi!

NTSHUNGU lowu nghenaka eYerusalema wu ri karhi wu ba huwa hi Nisan 9, 33 C.E., wu hlamarise Vayuda vo tala. Hambileswi a swi tolovelekile ku vona vanhu va khitikanela emutini lowu loko Paseka yi nga si sungula, vaendzi lava a va hambanile ni van’wana. Loyi a a xiyeka ngopfu exikarhi ka vona a ku ri munhu loyi a a khandziye ximbhongolwana. Munhu loyi a ri Yesu Kreste, naswona vanhu a va ri karhi va andlala tinguvu ta vona ni marhavi ya micindzu emahlweni ka yena loko va ri karhi va huwelela va ku: “Hozana eka N’wana Davhida! A ku dzunisiwe la taka hi vito ra Hosi! Hozana ematilweni ya le henhla-henhla!” Xikan’we-kan’we loko va vona ntshungu, lava se a va ri eYerusalema va susumeteleke ku nghenela xiendlakalo lexi.—Matewu 21:7-9; Yohane 12:12, 13.

Hambileswi a ri karhi a dzunisiwa, Yesu a a yi tiva miringo leyi a langutane na yona. Ina, endzhaku ka masiku ya ntlhanu, a a ta dlayiwa emutini wolowu! Ina, Yesu a swi tiva leswaku Yerusalema a yi ri nsimu leyi nga ni vakaneti, naswona ku nghena ka yena emutini lowu a a ku kunguhate a ri karhi a yi tiva mhaka leyi.

Vuprofeta Bya Khale Byi Hetiseka

Hi 518 B.C.E., Zakariya u vhumbe ku nghena ka Yesu eYerusalema hi ndlela ya vunhenha. U tsarile: “U ba mikulungwana, ṅwana wa Yerusalem! V̌ona, hosi ya wena hi leyi; yi ta ka wena, i l’a lulameke, l’a nga ni ku hlayiseka, i šisiwana, la khanḍiyeke mbongolo, ši nga šimbongolwana ša šisati. . . . O ta v̌ula ku rula e ka matiko, o ta fuma ku sukela e lwandle riṅwana e ku yisa e lwandle riṅwana, ni ku suka nambyeni e ku yisa makumu ya misav̌a.”—Zakariya 9:9, 10.

Hikwalaho ku nghena ka Yesu eYerusalema hi Nisan 9, ku hetisise vuprofeta bya Bibele. A ku nga ri xiendlakalo xa xitshuketa kambe a xi ri lexi kunguhatiweke kahle. Eku sunguleni, loko a ha ri ehandlenyana ka Yerusalema, Yesu u lerise vadyondzisiwa va yena vambirhi a ku: “Yanani emutini lowu vonakaka lahaya, mi ta hatla mi kuma mbhongolo ya ntswele leyi bohiweke, yi ri ni ximbhongolwana xa yona; mi ti ntshunxa, mi ta na tona haleno. Loko munhu a mi vutisa xo mi vutisa, mi ta ku: ‘Hosi ya ti lava.’ Kutani ú ta hatla a mi nyiketa tona.” (Matewu 21:1-3) Kambe ha yini Yesu a lave ku nghena Yerusalema a khandziye mbhongolo, naswona hi wihi nkoka wa n’wangulo wa ntshungu lowu?

Mhaka-nkulu Mayelana Ni Vuhosi

Hakanyingi nchumu lowu voniwaka hi mahlo wu ni nkoka ku tlula rito leri vuriweke hi nomu. Xisweswo, minkarhi yin’wana Yehovha u endle leswaku vaprofeta va endla xo karhi leswaku va tiyisa rungula ra vona ra vuprofeta. (1 Tihosi 11:29-32; Yeremiya 27:1-6; Ezekiyele 4:1-17) Ndlela leyi leyi xiyekaka swinene yo vulavurisana yi byale xiendlakalo lexi nga rivalekiki hambi ku ri emianakanyweni ya vahlaleri vo tala lava nga ni timbilu to tlanyala. Hilaha ku fanaka, Yesu u twarise rungula ra nkoka hi ku khandziya mbhongolo a nghena ha yona emutini wa Yerusalema. Njhani?

Eminkarhini ya Bibele mbhongolo a yi tirhiseriwa swikongomelo leswi xiximekaka. Hi xikombiso, Solomoni loko a ya eku totiweni hi mafurha leswaku a va hosi, u khandziye ‘meyila’ ya tata wakwe, leyi nga n’wana wa mbhongolo ya xinuna. (1 Tihosi 1:33-40) Hikwalaho ku va Yesu a nghena eYerusalema a khandziye mbhongolo a swi vula leswaku a a tihumelerisa tanihi hosi.a Swiendlo swa ntshungu swi tiyise rungula leri. Ntshungu lowu handle ko kanakana vunyingi bya wona a byi ri bya Vagaleliya, wu andlale tinguvu ta wona emahlweni ka Yesu—ku nga xikombiso lexi tsundzuxaka hi ta ku vekiwa ka Yehu evuhosini. (2 Tihosi 9:13) Ku vulavula ka vona hi Yesu tanihi “N’wana Davhida” ku kandziyise mfanelo ya yena ya le nawini ya vuhosi. (Luka 1:31-33) Naswona ku tirhisa ka vona marhavi ya micindzu swi le rivaleni leswaku a swi kombisa ku titsongahata ka vona eka vulawuri bya yena bya vuhosi.—Ringanisa Nhlavutelo 7:9, 10.

Hikwalaho, xiendlakalo lexi endlekeke eYerusalema hi Nisan 9 xi veke rungula erivaleni ra leswaku Yesu a a ri Mesiya tlhelo Hosi leyi vekiweke hi Xikwembu. Kavula, a hi vanhu hinkwavo lava a va tsakile ku vona Yesu a twarisiwa hi ndlela leyi. Ngopfu-ngopfu Vafarisi a va vona swi nga fanelanga leswaku Yesu a kombiwa xichavo xo tano xa vuhosi. A swi kanakanisi leswaku va vule marito lawa hi ku hlundzuka: “Mudyondzisi, miyeta vadyondzisiwa va wena.” Yesu u hlamule a ku: “Ndza mi byela leswaku, loko vona va miyela, maribye ma ta huwelela.” (Luka 19:39, 40) Ina, Mfumo wa Xikwembu a wu ri nhloko-mhaka-nkulu eku chumayeleni ka Yesu. U twarise rungula leri hi xivindzi ku nga khathariseki leswaku vanhu va ri amukela kumbe e-e.

Dyondzo Eka Hina

A swi lava leswaku Yesu a va ni xivindzi ku nghena eYerusalema hi mukhuva lowu vhumbhiweke hi muprofeta Zakariya. A a swi tiva leswaku hi ku endla tano a ta tlhontlha vukarhi bya valala va yena. Emahlweni ko va a tlhandlukela etilweni, Yesu u lerise valandzeri va yena leswaku va chumayela mahungu lamanene ya Mfumo wa Xikwembu ni ku ‘endla vanhu va matiko hinkwawo vadyondzisiwa.’ (Matewu 24:14; 28:19, 20) Ku endla ntirho lowu na swona swi lava xivindzi. A hi vanhu hinkwavo va tsakaka loko va twa rungula leri. Van’wana va ri honisa, loko van’wana va lwisana na rona. Tihulumendhe tin’wana ti veke swipimelo entirhweni wo chumayela kumbe ti wu yirise hi ku helela.

Hambiswiritano, Timbhoni ta Yehovha ta swi tiva leswaku mahungu lamanene ya Mfumo wa Xikwembu lowu simekiweke ma fanele ma chumayeriwa ku nga khathariseki leswaku vanhu va yingisa kumbe a va swi lavi ku endla tano. (Ezekiyele 2:7) Loko va ri karhi va endla ntirho lowu wo ponisa vutomi, va tiyisiwa hi marito ya Yesu lama nge: “Vonani, ndzi na n’wina masiku hinkwawo, ku ko ku hela misava.”—Matewu 28:20.

[Nhlamuselo ya le hansi]