Swifaniso Swimbirhi Swa Masimu Ya Madiriva

Yesu wa ha ku pfilunganya vaprista lavakulu ni vakulukumba etempeleni lava n’wi tlhontlheke mayelana ni matimba lawa a endlaka swilo ha wona. Leswi Yesu a swi vulaka swi va pfala milomu. Kutani u vulavula hi xifaniso lexi va paluxaka leswaku i vanhu va njhani.

Yesu u ri: “Wanuna un’wana a a ri ni vana vambirhi. A ya eka lowo sungula, a ku, ‘N’wananga, famba u ya tirha ensin’wini ya madiriva namuntlha.’ A n’wi hlamula a ku, ‘A ndzi nge yi,’ kambe endzhaku ka nkarhi a tisola a ya. A ya eka lowa vumbirhi, a vula leswi fanaka. Yena a ku, ‘Ndzi ta ya, Nkulukumba,’ kambe a nga yanga. Hi wihi eka lava vambirhi la endleke ku rhandza ka tata wakwe?” (Matewu 21:28-31) Nhlamulo yi le rivaleni hikuva jaha lero sungula hi rona eku heteleleni ri endleke ku rhandza ka tata wa rona.

Kutani Yesu u byela vakaneti vakwe a ku: “Ndzi tiyisile ndzi ri eka n’wina, valuvisi ni tinghwavava va mi rhangela ku nghena eMfun’weni wa Xikwembu.” Eku sunguleni valuvisi ni tinghwavava a va nga ta xi tirhela Xikwembu. Kambe ku fana ni jaha lero sungula, va hundzukile naswona sweswi se va xi tirhela. Ku hambana ni sweswo, varhangeri va vukhongeri va fana ni jaha ra vumbirhi leri vuleke leswaku ri ta tirhela Xikwembu kambe ri tsandzeka ku endla tano. Yesu u ri: “Yohane [Mukhuvuri] u tile eka n’wina a mi dyondzisa ndlela yo lulama, kambe a mi n’wi tshembanga. Hambiswiritano u tshembiwe hi valuvisi ni tinghwavava kambe n’wina hambiloko mi swi vonile swilo leswi, a mi tisolanga mi n’wi tshemba.”—Matewu 21:31, 32.

Yesu u tlhela a vulavula hi xifaniso xin’wana. Kambe sweswi, u kombisa leswaku ku tsandzeka ka varhangeri va vukhongeri ku bihe ngopfu ku tlula ku tshika ku tirhela Xikwembu. Kahlekahle i vanhu vo homboloka. Yesu u ri: “A ku ri ni munhu loyi a nga rima nsimu ya madiriva, kutani a yi biyela a endla ni ndhawu yo kamela madiriva, a aka ni xihondzo; kutani a endla ntwanano ni varimi van’wana leswaku va yi hlayisa, yena a endzela etikweni ra le kule. Hi nkarhi wo tshovela, a rhuma nandza wakwe eka varimi leswaku a landza yin’wana ya mihandzu leyi khiweke ensin’wini ya madiriva. Kambe va khoma nandza yoloye va n’wi ba, va n’wi tlherisa a nga ri na nchumu. A tlhela a rhuma nandza un’wana eka vona, na yena va n’wi ba nhloko va tlhela va n’wi rhukana. Kutani a tlhela a rhuma nandza un’wana, na yena va n’wi dlaya, a rhuma ni man’wana yo tala man’wana ma biwa, man’wanyana ma dlayiwa.”—Marka 12:1-5.

Xana lava yingiseleke Yesu va ta xi twisisa xifaniso lexi? Va nga ha tsundzuka marito ya Esaya loko a va sola a ku: “Nsimu ya madiriva ya Yehovha wa mavuthu i ndyangu wa Israyele; vanhu va le Yuda i swibyariwa leswi a a swi rhandza. A a langutele vululami, kambe a ku avanyisiwa hi ndlela yo biha.” (Esaya 5:7) Xifaniso xa Yesu xi tolovelekile. N’wini wa nsimu i Yehovha naswona nsimu ya madiriva i tiko ra Israyele leri biyeriweke ri tlhela ri sirheleriwa hi Nawu wa Xikwembu. Yehovha u rhume vaprofeta leswaku va ya dyondzisa vanhu vakwe va tlhela va va pfuna leswaku va veka mihandzu leyinene.

Hambiswiritano, “varimi” va xanise ni ku tlhela va dlaya “malandza” lama rhumiweke eka vona. Yesu u hlamusela a ku: “N’wini wa nsimu a rhuma n’wana wakwe loyi a n’wi rhandzaka. A hetelela hi ku rhuma yena a ku, ‘Va ta n’wi xixima n’wananga.’ Kambe varimi volavo va byelana va ku, ‘Hi loyi mudyandzhaka. A hi n’wi dlayeni, hi ta teka nsimu.’ Hiloko va n’wi khoma va n’wi dlaya.”—Marka 12:6-8.

Sweswi Yesu u vutisa a ku: “Xana n’wini wa nsimu ya madiriva u ta endla yini?” (Marka 12:9) Varhangeri va vukhongeri va hlamula va ku: “Hikwalaho ka leswi va hombolokeke, u ta va dlaya hi ndlela yo vava, kutani a endla ntwanano ni varimi van’wana, lava nga ta n’wi nyika mihandzu loko nkarhi wa yona wu fika.”—Matewu 21:41.

Xisweswo, va tiavanyisa va nga swi xiyi hikuva va le xikarhi ka “varimi” va “nsimu ya madiriva” ya Yehovha ku nga tiko ra Israyele. Mihandzu leyi Yehovha a yi languteleke eka varimi yi katsa ku va ni ripfumelo eka N’wana wakwe ku nga Mesiya. Yesu u langutisa varhangeri va vukhongeri kutani a ku: “Xana a mi si tshama mi hlaya tsalwa leri nge: ‘Ribye leri vaaki va nga ri nyenya, hi rona ri veke ribye ra nkoka swinene? Ri huma eka Yehovha, naswona ra hi hlamarisa’?” (Marka 12:10, 11) Yesu u endla leswaku va twisisa yinhla yakwe hi ku vula a ku: “Hi yona mhaka leyi ndzi nge eka n’wina, mi ta tekeriwa Mfumo wa Xikwembu wu nyikiwa tiko leri tswalaka mihandzu.”—Matewu 21:43.

Vatsari ni vaprista lavakulu va swi xiya leswaku Yesu u “vula vona hi xifaniso lexi.” (Luka 20:19) Ku tlula kwalaho, va lava ku n’wi dlaya, ku nga yena “mudyandzhaka” wa le nawini. Kambe a va n’wi dlayi hi nkarhi wolowo hileswi va chavaka ntshungu lowu tekaka Yesu a ri muprofeta.