Xifaniso Xa Vatirhi Va Le Nsin’wini Ya Madiriva

Yesu wa ha ku byela vayingiseri vakwe ePeriya leswaku “vo tala lava nga vo sungula va ta va vo hetelela, kasi lavo hetelela va ta va vo sungula.” (Matewu 19:30) U kandziyisa yinhla leyi hi ku tirhisa xifaniso xa vatirhi va le nsin’wini ya madiriva, hi ku vula a ku:

“Mfumo wa matilo wu fana ni n’wini wa muti, loyi a humeke nimixo ku ya thola vatirhi lava nga ta tirha ensin’wini yakwe ya madiriva. Endzhaku ka loko a pfumelelane ni vatirhi leswaku u ta va hakela denari hi siku, a va byela leswaku va ya tirha ensin’wini yakwe ya madiriva. A tlhela a huma kwalomu ka awara ya vunharhu, a vona van’wana va yime emakete va nga ri na ntirho; hiloko a ku, ‘Na n’wina yanani ensin’wini ya madiriva, ndzi ta mi hakela leswi faneleke.’ Kutani va famba. A tlhela a huma kwalomu ka awara ya vutsevu ni ya vukaye a endla hilaha ku fanaka. Kwalomu ka awara ya vu-11 a tlhela a huma kutani a kuma van’wana va yimile, a ku, ‘Hikwalaho ka yini mi yime laha siku hinkwaro mi nga tirhi?’ Va n’wi hlamula va ku, ‘Hikuva a hi thoriwanga.’ A ku, ‘Na n’wina yanani ensin’wini ya madiriva.’”—Matewu 20:1-7.

Swi tikomba onge vayingiseri va Yesu va ehleketa hi Yehovha Xikwembu loko va twa hi “Mfumo wa matilo” ni hi “n’wini wa muti.” Matsalwa ma hlamusela Yehovha tanihi n’wini wa nsimu ya madiriva leyi fanekiselaka rixaka ra Israyele. (Pisalema 80:8, 9; Esaya 5:3, 4) Lava va nga ehansi ka ntwanano wa Nawu va fanisiwa ni vatirhi va le nsin’wini ya madiriva. Kambe Yesu a nga hlamuseli xifaniso hi mhaka leyi nga hundza. U vulavula hi xiyimo xa le nkarhini wakwe.

Varhangeri va vukhongeri lava fanaka ni Vafarisi lava a va ha ku ringa Yesu emhakeni yo dlaya vukati, swi vonaka va ha ya emahlweni ni ntirho wa Xikwembu. Va fana ni vatirhi va nkarhi hinkwawo lava rindzeleke muholo lowu heleleke, ku nga denari hi siku.

Vaprista ni van’wana eka ntlawa wolowo va teka Vayuda lava tolovelekeke tanihi lava nga xi tirheliki ngopfu Xikwembu, ku fana ni vatirhi va nkarhinyana eka nsimu ya madiriva ya Xikwembu. Eka xifaniso xa Yesu, vavanuna lava hi lava va thoriweke hi “awara ya vunharhu” (9:00 a.m.) kumbe eku heleni ka siku hi awara ya vutsevu, ya vukaye ni hi awara ya vu 11 (5:00 p.m.).

Vavanuna ni vavasati lava landzelaka Yesu va tekiwa tanihi vanhu “lava nga wu tiviki Nawu.” (Yohane 7:49) Vo tala va vona va hete nkarhi wo leha va ri vaphasi va tinhlampfi ni ku endla mitirho yin’wana. Hi 29 C.E., “n’wini wa nsimu ya madiriva” u rhume Yesu ku vitana vanhu lava, lava tekeriwaka ehansi leswaku va va vatirhi va Xikwembu tanihi vadyondzisiwa va Kreste. Lava hi “lavo hetelela” lava Yesu a vulavulaka ha vona, ku nga vatirhi vo hetelela va awara ya vu 11 eka nsimu ya madiriva.

Loko a gimeta xifaniso xakwe, Yesu u hlamusela leswi endlekaka loko va chayisa entirhweni, u ri: “Loko ri pela, n’wini wa nsimu ya madiriva a byela ndhuna a ku, ‘Vitana vatirhi u va holela, u rhanga hi lavo hetelela kutani u hetelela hi lavo sungula.’ Loko ku fika lavo hetelela lava nga sungula ku tirha hi awara ya vu-11, un’wana ni un’wana wa vona u holeriwe denari. Loko ku fika lavo sungula, a va ehleketa leswaku va ta holeriwa ngopfu, kambe na vona va holeriwe denari. Loko va holeriwile, va sungule ku gungula va sola n’wini wa muti va ku, ‘Lavo hetelela va tirhe awara yin’we; kambe na vona u va ringanisa na hina lava hi tirheke siku hinkwaro hi hisiwa hi mumu!’ Kambe a hlamula un’wana wa vona a ku, ‘Nandzuwe, a ndzi ku dyohelanga nchumu. Xana a hi pfumelelananga hi denari? Teka leswi nga swa wena u famba. Ndzi lava ku holela lavo hetelela ku fana na wena. Xana a ndzi na mfanelo yo endla leswi ndzi swi lavaka hi swilo swa mina? Kumbe, xana tihlo ra wena ri ni mavondzo hileswi ndzi endlaka leswinene?’ Hi ndlela leyi, lavo hetelela va ta va vo sungula, kutani lavo sungula va ta va vo hetelela.”—Matewu 20:8-16.

Swi nga endleka leswaku vadyondzisiwa va ti vutisa swo tala hi leswi Yesu a swi vuleke loko a gimeta xifaniso xakwe. Swi ta kotekisa ku yini leswaku varhangeri va vukhongeri lava nga Vayuda lava titekaka va ri “vo sungula” va va “vo hetelela”? Nakambe, vadyondzisiwa va Yesu va ta va “vo sungula” hi ndlela yihi?

Vadyondzisiwa va Yesu lava Vafarisi ni vanhu van’wana va va tekaka va ri “vo hetelela,” va ta va “vo sungula” ku kuma hakelo leyi heleleke. Loko Yesu a fa, Yerusalema wa laha misaveni u ta lovisiwa naswona Xikwembu xi ta hlawula rixaka lerintshwa ku nga “Israyele wa Xikwembu.” (Vagalatiya 6:16; Matewu 23:38) Yohane Mukhuvuri a vulavula hi vona loko a vulavula hi nkhuvulo wa moya lowo kwetsima lowu a wu ta ta. Lava a va ri “vo hetelela” va ta va vo sungula ku kuma nkhuvulo wolowo ni ku tlhela va kuma lunghelo ra ku va timbhoni ta Yesu “ku ya fika emakumu ka misava.” (Mitirho 1:5, 8; Matewu 3:11) Sweswo swi endle Vadyondzisiwa va twisisa ku cinca lokukulu loku Yesu a vulavula hakona naswona va nga va va yi vone ka ha ri mahlweni ndlela yo biha leyi varhangeri va vukhongeri lava a va ta va “vo hetelela” a va ta va khoma hayona.