Yesu A Hlula Miringo Yo N’wi Phasa

Valala va Yesu va hlundzukile. Wa ha ku hlamusela swifaniso leswi paluxaka vuhomboloki bya vona. Sweswi, Vafarisi va kunguhata ku n’wi phasa. Va ringeta ku n’wi endla a vula nchumu lowu nga ta endla leswaku a yisiwa eka mufumi wa Rhoma naswona va hakela hambi ku ri van’wana va vadyondzisiwa vakwe leswaku va n’wi phasa.—Luka 6:7.

Va ri: “Mudyondzisi, ha swi tiva leswaku u vulavula u tlhela u dyondzisa leswi lulameke naswona a wu na xihlawuhlawu kambe u dyondzisa ndlela ya Xikwembu hi ntiyiso: Xana swa pfumeleriwa leswaku hi hakela xibalo eka Khezari kumbe a swi pfumeleriwi?” (Luka 20:21, 22) Yesu a nga phasiwi hi marito ya vona yo tsokombela hikuva wa swi tiva leswaku ma ni vukanganyisi ni vuxisi. Loko a ku, ‘Doo, a swi fanelanga ku hakela xibalo lexi,’ a nga hehliwa hi ku lwisana ni mfumo wa Rhoma. Kambe loko a ku, ‘Ina, hakelani xibalo lexi,’ vanhu, lava seketelaka mfumo wa Rhoma swi nga endleka va nga n’wi twisisi ivi va lwa na yena. Hikwalaho, u hlamula njhani?

Yesu u ri: “Vakanganyisi ndzin’wina, hikwalaho ka yini mi ndzi ringa? Ndzi kombeni mali ya nsimbhi leyi ku hakeriwaka ha yona xibalo.” Hiloko va n’wi tisela denari. A ku eka vona: “Xana xifaniso ni marito lawa i swa mani?” Va ku eka yena: “I swa Khezari.” A ku eka vona: “Hikwalaho, tlheriselani swilo swa Khezari eka Khezari, kambe swa Xikwembu eka Xikwembu.”—Matewu 22:18-21.

Marito ya Yesu ma hlamarisa vavanuna lava. Leswi a va nga swi tivi leswi va nga swi vulaka hi nhlamulo yakwe ya vutlhari, va famba. Kambe siku ni matshalatshala ya vona yo n’wi phasa a swi si hela. Endzhaku ka loko Vafarisi va tsandzekile, varhangeri va ntlawa wun’wana wa vukhongeri va ta eka Yesu.

Vasaduki lava vulaka leswaku ku pfuxiwa ka vafi a ku kona, va vutisa xivutiso xin’wana lexi katsaka ku pfuxiwa ka vafi ni ku teka nsati wa makwenu. Va ri: “Mudyondzisi, Muxe u te: ‘Loko wanuna a fa a nga ri na vana, makwavo wakwe u fanele a teka nsati loyi, a velekela mufi vana.’ A ku ri ni vamakwavo va nkombo. Lowo sungula u tekile kutani a fa, leswi a a nga ri na vana, nsati wakwe u sale a tekiwa hi makwavo. Ku endleke leswi fanaka eka lowa vumbirhi ni wa vunharhu, ku fikela eka lowa vunkombo. Eku heteleleni wansati na yena a fa. Hikwalaho, loko vafi va pfuxiwa, u ta va nsati wa mani eka lava nkombo? Hikuva hinkwavo va n’wi tekile a va nsati wa vona.”—Matewu 22:24-28.

Loko a vulavula hi matsalwa ya Muxe lawa Vasaduki va ma amukelaka, Yesu u ri: “Lexi endlaka mi hoxisa hi leswi mi nga ma tiviki Matsalwa hambi ku ri matimba ya Xikwembu. Hikuva loko vafi va pfuxiwa, vavanuna a va nge he teki ni vavasati a va nge he tekiwi, kambe va ta fana ni tintsumi ta le tilweni. Kambe loko swi ta eka vafi ni ku pfuxiwa ka vona, xana a mi hlayanga hi mhaka ya Muxe ya xihlahla xa mitwa, leswaku Xikwembu xi vulavule na yena xi ku: ‘Hi mina Xikwembu xa Abrahama, Xikwembu xa Isaka ni Xikwembu xa Yakobo’? A hi Xikwembu xa lava feke, kambe i xa lava hanyaka. Mi hoxise ngopfu.” (Marka 12:24-27; Eksoda 3:1-6) Mitshungu yi hlamarisiwa hi nhlamulo yoleyo.

Sweswi vakaneti va vukhongeri lava hlanganeke va ya emahlweni va ringa Yesu hileswi a pfaleke milomu ya Vafarisi ni Vasaduki. Mutsari un’wana u vutisa a ku: “Mudyondzisi, xana hi wihi nawu lowukulu eka Nawu wa Muxe?”—Matewu 22:36.

Yesu u hlamula a ku: “Wo sungula hi lowu nge, ‘Yingisa, wena Israyele, Yehovha Xikwembu xa hina i Yehovha un’we, naswona u fanele u rhandza Yehovha Xikwembu xa wena hi mbilu ya wena hinkwayo, hi vutomi bya wena hinkwabyo, hi mianakanyo ya wena hinkwayo ni hi matimba ya wena hinkwawo.’ Wa vumbirhi hi lowu nge, ‘U fanele u rhandza warikwenu hi ndlela leyi u tirhandzaka ha yona.’ A wu kona nawu lowu tlulaka milawu leyimbirhi.”—Marka 12:29-31.

Loko a twa nhlamulo leyi, mutsari u ri: “Mudyondzisi, u vulavule ntiyiso, ‘I Un’we naswona a ku na un’wana handle ka yena; nakambe ku n’wi rhandza hi mbilu hinkwayo, hi mianakanyo hinkwayo, hi matimba hinkwawo ni ku rhandza warikwenu hi ndlela leyi u tirhandzaka ha yona, i swa nkoka swinene ku tlula magandzelo.” Loko Yesu a xiya leswaku u hlamule hi vutlhari, a ku: “A wu le kule ni Mfumo wa Xikwembu.”—Marka 12:32-34.

Yesu u hete masiku manharhu (Nisani 9, 10, na 11) a ri karhi a dyondzisa etempeleni. Vanhu van’wana vo fana ni mutsari loyi, va n’wi yingiserile va tsakile. Kambe varhangeri va vukhongeri lava sweswi va nga riki na “xivindzi xo n’wi vutisa,” a va n’wi yingiselanga.