A Paluxa Vakaneti Va Vukhongeri

Vakaneti va vukhongeri va tsandzeka ku onha Yesu vito kumbe ku n’wi phasa leswaku va ta n’wi yisa eka Varhoma. (Luka 20:20) Loko va ha ri etempeleni hi Nisani 11, Yesu u cinca xiyimo xexo hi ku kombisa leswi a nga swona. U rhanga a va vutisa a ku: “Xana mi ri yini hi Kreste? Mi ehleketa leswaku i n’wana wa mani?” (Matewu 22:42) Swa tiveka leswaku Kreste kumbe Mesiya, u fanele a huma eka rixaka ra Davhida. Yoleyo i nhlamulo ya vona.—Matewu 9:27; 12:23; Yohane 7:42.

Yesu wa vutisa a ku: “Kutani, swi tisa ku yini leswaku Davhida hi ku kongomisiwa hi moya lowo kwetsima a n’wi vitana Hosi, a ku, ‘Yehovha a ku eka Hosi ya mina: “Tshama evokweni ra mina ra xinene ku fikela loko ndzi veka valala va wena ehansi ka mikondzo ya wena”’? Hikwalaho, loko Davhida a n’wi vitana Hosi, xana i n’wana wa yena hi ndlela yihi?”—Matewu 22:43-45.

Vafarisi va miyela va ku whii! hikuva va langutele munhu loyi a humaka erixakeni ra Davhida leswaku a ta va tshunxa eka ku lawuriwa hi Varhoma. Kambe loko a vulavula hi marito ya Davhida eka Pisalema 110:1, 2, Yesu u kombisa leswaku Mesiya u ta endla swo tala ku tlula ku va hosi leyi nga munhu ntsena. I Hosi ya Davhida naswona loko se a tshame evokweni ra xinene ra Xikwembu, u ta va ni matimba. Leswi Yesu a swi vulaka swi pfala milomu ya vakaneti vakwe.

Vadyondzisiwa ni vanhu van’wana a va yingiserile. Sweswi Yesu u vulavula na vona, u va lemukisa hi vatsari ni Vafarisi. Vavanuna volavo “va tinyike xitulu xa Muxe” xo dyondzisa Nawu wa Xikwembu. Yesu u byela vayingiseri vakwe a ku: “Endlani hinkwaswo leswi va mi byelaka swona kambe mi nga swi endli leswi va swi endlaka, hikuva va vula hi nomu ntsena, kambe a va endli.”—Matewu 23:2, 3.

Yesu u ya emahlweni a vulavula hi swikombiso swa vukanganyisi bya vona, u ri: “Va kurisa swibokisana leswi nga ni matsalwa va swi endla swisirhelelo.” Vayuda van’wana a va ambala nchumu wo karhi lowu a wu ri ni rungula leritsongo ra Nawu emombyeni kumbe evokweni. Vafarisi va kurisa marungula ya vona leswaku swi vonaka onge va hisekela Nawu. Nakambe, “va lehisa ni makhaxa ya swiambalo swa vona.” Vaisrayele a va fanele va tiendlela makhaxa eka swiambalo swa vona kambe Vafarisi va endle leswaku makhaxa ya vona ma leha swinene. (Tinhlayo 15:38-40) Va endla leswi hinkwaswo leswaku “va voniwa hi vanhu.”—Matewu 23:5.

Hambi ku ri vadyondzisiwa va Yesu va nga ngheniwa hi moya wa ku navela ku va ni swikhundlha kutani Yesu wa va tshinya, u ri: “Mi nga tshuki mi vuriwa Rabi, hikuva mi ni Mudyondzisi un’we, kasi n’wina hinkwenu mi vamakwavo. Ku tlula kwalaho, mi nga tshuki mi vitana hambi ku ri mani leswaku i tatana laha misaveni, hikuva Tata wa n’wina i un’we, hi Loyi a nga le matilweni. Mi nga vuriwi varhangeri, hikuva mi ni Murhangeri un’we, ku nga Kreste.” Hikwalaho, xana vadyondzisiwa va fanele va titeka njhani va tlhela va endla yini? Yesu u va byela a ku: “Lonkulu exikarhi ka n’wina u fanele ku va nandza wa n’wina. Loyi a titlakusaka u ta tsongahatiwa, kasi loyi a titsongahataka u ta tlakusiwa.”—Matewu 23:8-12.

Yesu u tlhela a vulavula hi makhombo lama a ma ta wela vatsari ni Vafarisi lava nga vakanganyisi a ku: “Khombo eka n’wina vatsari ni Vafarisi, vakanganyisi ndzin’wina, hikuva mi sivela vanhu ku nghena eMfun’weni wa matilo; ku ve n’wina a mi ngheni, hambi ku ri lava lavaka ku nghena ma va sivela.”—Matewu 23:13.

Yesu u sola Vafarisi hileswi a va nga swi rhangisi swilo leswi Yehovha a swi tekaka swi ri swa nkoka, hilaha va swi kombisaka hakona. Hi xikombiso, va ri: “Loko munhu o hlambanya hi tempele, a swi vuli nchumu; kambe loko o hlambanya hi nsuku wa tempele, u tibohile.” Va kombisa leswaku va fe mahlo hikuva va teka nsuku wa le tempeleni wu ri wa nkoka ku tlula vuxaka bya vona na Yehovha ni wa ndhawu leyi va gandzelaka eka yona. Kambe va “honisa timhaka ta nkoka ta Nawu, ku nga vululami, tintswalo ni ku tshembeka.”—Matewu 23:16, 23; Luka 11:42.

Yesu u vitana Vafarisi lava ‘vakongomisi lava feke matihlo, va wungula nsuna kambe va mita kamela!’ (Matewu 23:24) Va wungula nsuna eka vhinyo ya vona hikuva nsuna yoleyo a yi nga tenganga. Kambe ndlela leyi a va teka timhaka ta Nawu ti nga ri ta nkoka hayona yi fana ni loko va mita kamela, ku nga xiharhi lexi a xi nga tenganga xi tlhela xi va xikulu swinene.—Levhitika 11:4, 21-24.