Paseka Yo Hetelela Ya Yesu Yi Tshinele

Yesu u hetisa ku dyondzisa vaapostola va mune eNtshaveni ya Mitlhwari ni ku hlamula xivutiso xa vona xa ku vuya kakwe ni ku hela ka misava.

Siku ra Nisani 11 a ri ri ni migingiriko yo tala! Loko va tlhelela eBetaniya hi vusiku byebyo, swi nga endleka ku ri kona laha Yesu a byeleke vaapostola vakwe a ku: “Ma swi tiva leswaku ku ta va ni nkhuvo wa Paseka endzhaku ka masiku mambirhi, naswona N’wana wa munhu u ta khomiwa a dlayiwa emhandzini.”—Matewu 26:2.

Hi Ravunharhu, swi tikomba onge Yesu u heta siku ni vaapostola vakwe naswona a nga kavanyetiwi hi nchumu. Hi Ravumbirhi, u sole ni ku tlhela a paluxa varhangeri va vukhongeri exikarhi ka vanhu. Va lava ku n’wi dlaya. Hikwalaho, a nga tihumelerisi evanhwini hi Nisani 12 leswaku ku nga vi na nchumu lexi sivelaka ku tlangela kakwe Paseka ni vaapostola vakwe endzhaku ka loko dyambu ri perile madyambu lama landzelaka, loko ku sungula Nisani 14.

Kambe vaprista lavakulu ni vakulukumba a va miyeli loko Paseka yi nga si fika. Va hlengeletana exivaveni xa muprista lonkulu Kayafasi. Hikwalahokayini? Va hlundzukile hikuva Yesu a a ri eku va paluxeni. Sweswi va kunguhata ku “khoma Yesu hi ndlela ya vuxisi leswaku va ta n’wi dlaya.” Xana va ta swi endla njhani sweswo naswona rini? Va ri: “Hi nga n’wi khomi enkhubyeni, hikuva vanhu va nga vanga hasahasa.” (Matewu 26:4, 5) Va chava hikuva Yesu u tsakeriwa hi vanhu vo tala.

Hi nkarhi wolowo, varhangeri va vukhongeri va va ni muendzi. Lexi va hlamarisaka, i un’wana wa vaapostola va Yesu ku nga Yudasi Iskariyota. Sathana u n’wi nyike mianakanyo yo xenga N’wini wakwe! Yudasi u va vutisa a ku: “Xana mi ta ndzi nyika yini loko ndzo mi pfuna leswaku mi n’wi khoma?” (Matewu 26:15) Hi ku tsakisiwa hi leswi, va “pfumelelana leswaku va ta n’wi nyika mali ya silivhere.” (Luka 22:5) Xana i mali muni? Va pfumelelana va tsakile ku n’wi nyika swiphemu swa silivhere swa 30. Lexi hlamarisaka hileswaku nxavo wa hlonga i tixikele ta 30. (Eksoda 21:32) Hikwalaho, varhangeri va vukhongeri va kombisa leswaku Yesu a hi wa nkoka nileswaku i wa nxavo wa le hansi. Sweswi Yudasi u sungula ku “lava ndlela yo n’wi xavisa eka vona ku nga ri na ntshungu.”—Luka 22:6.

Nisani 13 yi sungula hi Ravunharhu loko dyambu ri pela naswona leri i siku ra vutsevu ni ro hetelela leri Yesu a ri hetaka a ri eBetaniya. Hi siku leri landzelaka, ku fanele ku endliwa malunghiselelo yo hetelela ya Paseka. Ku fanele ku kumiwa xinyimpfana leswaku xi ta dlayiwa ivi xi oxiwa hinkwaxo loko Nisani 14 yi sungula. A va ta dyela kwihi naswona a yi ta lunghiseleriwa hi vamani nyama ya kona? Yesu a nga va byelanga vuxokoxoko byebyo. Xisweswo, Yudasi a a nga ta swi kota ku byela vaprista lavakulu leswi a swi ta endleka.

Swi ti komba onge hi Ravumune nindzhenga Yesu u rhuma Petro na Yohane lava a va ri eBetaniya, a ku: “Fambani mi ya lulamisa Paseka leswaku hi ta dya.” Va vutisa va ku: “U lava hi ya yi lulamisela kwihi?” Yesu u hlamusela a ku: “Loko mi nghena emutini, mi ta hlangana ni munhu a rhwale khuwana ra mati. N’wi landzeleni mi ya endlwini leyi a nga ta nghena eka yona. Byelani n’wini wa yindlu mi ku, ‘Mudyondzisi u ri: “Ri kwihi kamara ra vaendzi leri ndzi nga ta dya Paseka ni vadyondzisiwa va mina eka rona?”’ Kutani u ta mi komba kamara lerikulu ra le henhla leri nga ni leswi lavekaka. Lunghiselelani Paseka kwalaho.”—Luka 22:8-12.

A swi kanakanisi leswaku n’wini wa muti wolowo i mudyondzisiwa wa Yesu. Swi nga endleka leswaku u xi languterile xikombelo xa Yesu xa ku tirhisa kaya rakwe. Loko vaapostola vambirhi va fika eYerusalema, va kuma hinkwaswo swi ri hilaha Yesu a va byeleke hakona. Va swi xiya leswaku xinyimpfana se xi wupfile naswona malunghiselelo man’wana ya swakudya swa Paseka ma endleriwe lava va 13, ku nga Yesu ni vaapostola vakwe va 12.