Vutomi Ni Vutirheli Bya Yesu
Paseka Yo Hetelela Ya Yesu Yi Tshinele
LOKO Ravumbirhi, Nisan 11, ri tshinela, Yesu u heta ku dyondzisa vaapostola eNtshaveni ya Mitlhwari. A a ri ri siku ra migingiriko, leri karharisaka hakunene! Sweswi, kumbexana loko a ri karhi a tlhelela eBetaniya ku ya etlela kona, u byela vaapostola vakwe a ku: “Ma swi tiva leswaku, loko ku ta va ku hundzile masiku mambirhi, nkhuvo wa Paseka wu ta va kona; kutani N’wana-wa-Munhu ú ta nyiketiwa leswaku a vambiwa.”
Siku leri tlhandlameke, Ravunharhu, Nisan 12, Yesu u vonaka a heta ku wisa ka yena ko rhula ni vaapostola va yena. Hi tolo xa kona, u holovele varhangeri va vukhongeri erivaleni naswona wa swi xiya leswaku va lava ku n’wi dlaya. Kutani hi Ravunharhu a nga tikombisi erivaleni, tanihi leswi a nga laveki nchumu wu n’wi kavanyeta ku tlangela Paseka ni vaapostola va yena emadyambyini lama landzelaka.
Hi nkarhi lowu fanaka, vaprista lavakulu ni vakulukumba va vanhu va hlengeletane exivaveni xa muprista lonkulu, Kayafasi. Hi ku hlundzukisiwa hi nhlaselo wa Yesu wa tolo, va endla makungu ya ku n’wi khoma hi vusukumbele ivi va n’wi dlaya. Kambe va hambeta va ku: “Swi nga endliwi enkhubyeni, hikuva ku nga tshuka ku pfuka dzolonga exikarhi ka vanhu.” Va chava vanhu, lava rhandzaka Yesu.
Hambi leswi varhangeri va vukhongeri hi ku homboloka va kunguhataka ku dlaya Yesu, va kuma muendzi. Lexi va hlamariseke, i wun’wana wa vaapostola va Yesu, Yudasi Iskariyota, loyi eka yena Sathana a byaleke mianakanyo leyo biha ya ku xenga N’wini wa yena! Vona ndlela leyi va tsakeke ha yona loko Yudasi a vutisa a ku: “Mi ta ndzi nyika yini, loko ndzi mi nyiketa yena ke?” Hi ku tsaka va pfumerile ku n’wi nyika mali yo ringana tisilivhere ta 30, nxavo wa nandza hi ku ya hi ntwanano wa Nawu wa Muxe. Ku sukela kwalaho ku ya emahlweni, Yudasi u lava nkarhi lowunene wo xenga Yesu ku nga ri na ntshungu ekusuhi.
Nisan 13 yi sungula eku peleni ka dyambu hi Ravunharhu. Yesu u vuyile hi le Yeriko hi Ravuntlhanu, kutani lawa i madyambu ya vutsevu ni yo hetelela lawa a ma hetaka eBetaniya. Siku leri tlhandlamaka, Ravumune, malunghiselelo yo hetelela ma fanele ku endleriwa Paseka, leyi sungulaka eku peleni ka dyambu, loko xinyimpfana xa Paseka xi fanele xi dlayiwa kutani xi katingiwa kahle. Va ta wu endlela kwihi nkhuvo lowu naswona i vamani lava nga ta endla malunghiselelo?
Yesu a nga si byi nyika vuxokoxoko byolebyo, kumbexana u endlela ku sivela Yudasi leswaku a nga tivisi vaprista lavakulu leswaku va ta khoma Yesu hi nkarhi wa nkhuvo wa Paseka. Kambe sweswi, kumbexana hi ndzhenga wa Ravumune, Le Betaniya Yesu hi ku hatlisa u rhuma Petro na Yohane, a ku: “Yanani, mi ya hi lunghisela nkhuvo wa Paseka, hi ta kota ku wu dya.”
“Hi kwihi laha u lavaka leswaku hi ya ku lunghisela kona xana?” va vutisa.
Yesu wa hlamusela: “Loko mi nghenile emutini, mi ta hlangana ni wanuna la rhwaleke nghotsa ya mati; n’wi landzeni endlwini leyi a nga ta nghena eka yona. Kutani mi ta ku ka n’wini wa yindlu: ‘Mudyondzisi ú hi rhumile eka wena, ú ri, yi kwihi yindlu leyi a nga ta dyela eka yona Paseka, a ri ni vadyondzisiwa va yena, ke?’ Yena ú ta mi komba yindlu leyikulu leyi nge henhla, leyi andlaleriweke; mi hi lunghisela kona.”
Handle ko kanakana n’wini wa yindlu i mudyondzisiwa wa Yesu loyi kumbexana a langutele xikombelo xa Yesu xo tirhisa yindlu ya yena eka xiendlakalo lexi xo hlawuleka. Hambi swi ri tano, Petro na Yohane va fika eYerusalema, va kuma swilo hinkwaswo hi laha Yesu a vuleke ha kona. Kutani ha vambirhi va lunghisa xinyimpfana ni malunghiselelo laman’wana hinkwawo ku khathalela swilaveko swa vatlangeri va Paseka va 13, Yesu ni vaapostola va yena va 12. Matewu 26:1-5, 14-19; Marka 14:1, 2, 10-16; Luka 22:1-13; Eksoda 21:32.
◆ Yesu u vonaka a endla yini hi Ravunharhu naswona ha yini?
◆ I nhlengeletano wa yini lowu khomeriwaka ekaya ra muprista lonkulu naswona ha yini Yudasi a endzela varhangeri va vukhongeri?
◆ I vamani lava Yesu a va rhumaka eYerusalema hi Ravumune naswona hikokwalaho ka yini?
◆ I yini leswi lava va rhumiweke va swi kumaka leswi nakambe swi paluxaka matimba ya Yesu ya mahlori?