Vafarisi Va Konanisa Wanuna Loyi A a Fe Matihlo Yohane

Vafarisi a va tshembi leswaku Yesu u horise wanuna loyi a tswariweke a fe matihlo kutani va vulavula ni vatswari va yena. Vatswari va wanuna loyi va swi tiva leswaku swi nga endleka va “hlongoriwa esinagogeni.” (Yohane 9:22) Loko ndyangu lowu a wo hlongoriwa eka Vayuda kuloni, a wu ta va ni swiphiqo swa timali ni ndhawu yo tshama.

Vafarisi va vutisa swivutiso swimbirhi va ku: “Xana loyi i n’wana wa n’wina loyi mi nge u velekiwe a fe matihlo? Swi te njhani leswaku sweswi a vona?” Hiloko vatswari va hlamula va ku: “Ha swi tiva leswaku loyi i n’wana wa hina ni leswaku u velekiwe a fe matihlo. Kambe a hi swi tivi leswaku swi endlekise ku yini leswaku sweswi a vona, naswona a hi swi tivi leswaku i mani loyi a pfuleke matihlo yakwe.” Hambiloko n’wana wa vona a lo va byela leswi humeleleke, vatswari lava va hlamula hi vuxiyaxiya va ku: “N’wi vutiseni. Se u kurile, a a tivulavulele.”—Yohane 9:19-21.

Vafarisi va tlhele va vitana wanuna loyi a feke matihlo ivi va n’wi chavisa hi ku vula leswaku va ni vumbhoni lebyi hehlaka Yesu. Va n’wi sindzisa va ku: “Dzunisa Xikwembu, ha swi tiva leswaku wanuna loyi i mudyohi.” Loko a ala leswi va swi vulaka u ri: “Leswaku i mudyohi a ndzi swi tivi.” U tlhela a ku: “Lexi ndzi xi tivaka hileswaku, a ndzi nga voni kambe sweswi se ndza vona.”—Yohane 9:24, 25.

Leswi a va nga swi lavi ku tshika mhaka leyi, Vafarisi va ya emahlweni va n’wi vutisa va ku: “U ku hanyise njhani? U endle yini leswaku matihlo ya wena ma pfuleka?” Hi xivindzi, wanuna loyi u va hlamula a ku: “Ndzi mi byerile, kambe a mi ndzi yingisanga. Hikwalaho ka yini mi lava ndzi tlhela ndzi phindha leswi ndzi swi vuleke? Xana na n’wina mi lava ku va vadyondzisiwa vakwe?” Leswi va hlundzukeke, Vafarisi va ri: “Wena u mudyondzisiwa wa wanuna loyi, kambe hina hi vadyondzisiwa va Muxe. Ha swi tiva leswaku Xikwembu xi vulavule na Muxe, kambe wanuna loyi a hi ku tivi laha a humaka kona.”—Yohane 9:26-29.

Hi ku hlamala, wanuna loyi a a tolovele ku kombela u ri: “Mhaka leyi ya hlamarisa hakunene, wanuna loyi u pfule matihlo ya mina kambe mi ri a mi ku tivi laha a humaka kona.” Hiloko wanuna loyi a hlamusela mhaka leyi twisisekaka mayelana ni lava Xikwembu xi va yingisaka ni ku va amukela, hi ku vula a ku: “Ha swi tiva leswaku Xikwembu a xi va yingisi vadyohi, kambe loyi a chavaka Xikwembu a tlhela a endla ku rhandza ka xona, xa n’wi yingisa. A swi si tshama swi endleka leswaku munhu a pfula matihlo ya loyi a velekiweke a fe matihlo.” Loko wanuna loyi a gimeta, u ri: “Loko wanuna loyi a a nga humi eka Xikwembu, a a nga ta swi kota ku endla leswi a swi endleke.”—Yohane 9:30-33.

Leswi va tsandzekaka ku hlamula wanuna loyi a a tolovele ku kombela, Vafarisi va n’wi rhuketela va ku: “U velekiwe u ri ni xidyoho, kambe u ringeta ku dyondzisa hina?” Hiloko va n’wi hlongola.—Yohane 9:34.

Loko Yesu a twa leswi humeleleke, u kuma wanuna loyi ivi a n’wi vutisa a ku: “Xana wa pfumela eka N’wana wa munhu?” Wanuna loyi a horisiweke a hlamula a ku: “Nkulukumba, i mani N’wana wa munhu, leswaku ndzi ta pfumela eka yena?” Handle ko kanakana, Yesu u ri: “U n’wi vonile, kahlekahle hi yena loyi u vulavulaka na yena.”—Yohane 9:35-37.

Wanuna u hlamula a ku: “Hosi ndza pfumela eka yena.” Loko a kombisa ripfumelo ni xichavo, wanuna loyi u khinsama emahlweni ka Yesu loyi endzhaku a vulaka marito ya nkoka a ku: “Ndzi te emisaveni leyi leswaku swilo leswi ndzi swi endlaka swi ta pfula matihlo ya lava nga voniki ni leswaku lava vonaka va ta fa matihlo.”—Yohane 9:38, 39.

Vafarisi lava nga kona va swi tiva leswaku va swi kota ku vona. Kambe ku ta endleka yini hi ntirho lowu va nga na wona wo dyondzisa vanhu hi Xikwembu? Va vutisa hi ku tiyimelela va ku: “Xana u vula leswaku na hina hi fe matihlo?” Yesu u ri: “Loko a mi fe matihlo, a mi nga ta va na xidyoho. Kambe sweswi mi ri, ‘Ha vona.’ Sweswo swi vula leswaku ma ha ri ni xidyoho.” (Yohane 9:40, 41) Loko a va nga dyondzisanga eIsrayele leswaku Yesu a hi Mesiya, a swi ta twisiseka. Kambe leswi va tivaka Nawu, ku ala ka vona i xidyoho lexikulu.