Ndzima 71

Ku Sihalala Ka Vafarisi

VATSWARI va xisiwana lexi a xi fe mahlo va chava loko va vitaniwa ku ya humelela emahlweni ka Vafarisi. Va swi tiva leswaku ku bohiwe leswaku un’wana ni un’wana la kombisaka ripfumelo eka Yesu u ta hlongoriwa esinagogeni. Ku tsemiwa ko tano ka vuxaka ni van’wana etikweni ku nga tisa ku nonon’hwa lokukulu, ngopfu-ngopfu eka ndyangu wa swisiwana. Kutani vatswari va tirhisa vutlhari.

“Xana loyi i n’wana wa n’wina loyi mi nge, ú velekiwile a file mahlo xana?” Vafarisi va vutisa. “Sweswi ú swi kotisa ku yini ku vona xana?”

“Ha swi tiva leswaku loyi i n’wana wa hina, ni leswaku ú velekiwile a file mahlo,” ku tiyisa vatswari. “Kambe lexi xi endlaka leswaku sweswi a kota ku vona, a hi xi tivi, ni loyi a n’wi hanyanyiseke mahlo, a hi n’wi tivi.” Handle ko kanakana n’wana wa vona u fanele a va byerile hinkwaswo leswi humeleleke, kambe hi vutlhari vatswari va ri: “N’wi vutiseni, ú kurile, ú ta tivulavulela.”

Kutani, Vafarisi va tlhela va vitana munhu loyi. Sweswi va ringeta ku n’wi chavisa hi ku vula leswaku va hlengelete vumbhoni byo hehla Yesu ha byona. “Hlambanya emahlweni ka Xikwembu,” ku vula vona. “Hina ha swi tiva leswaku munhu loyi i mudyohi.”

Munhu loyi a a fe mahlo a nga xi kaneti xihehlo xa vona, wa vula: “Mina a ndzi swi tivi loko a ri mudyohi.” Kambe wa engetela: “Ndzo tiva xilo xin’we ntsena, hi leswaku a ndzi tsandzeka ku vona, kasi sweswi ndza vona.”

Ku ringeta ku kuma xihoxo eka vumbhoni bya yena, Vafarisi va tlhela va vutisa va ku: “Ú endlile yini eka wena? Ú ku hanyanyisile mahlo hi mukhuva wihi ke?”

“Ndzi mi byerile khale.” munhu loyi wa hlamula, “kambe a mi swi twanga; hikwalaho ka yini mi lava ku tlhela mi twa mhaka leyi xana?” Hi ku hlundzuka, a vutisa a ku: “Xana na n’wina mi lava ku va vadyondzisiwa va yena xana?”

Nhlamulo leyi yi karihisa Vafarisi. “Hi wena u nga mudyondzisiwa wa yena,” va mpfhumpfha, “hina hi vadyondzisiwa va Muxe. Ha swi tiva leswaku Xikwembu xi vulavurile na Muxe; kambe munhu loyi, a hi tivi lomu a humaka kona.”

Ku kombisa ku hlamala, xisiwana lexi titsongahateke xa hlamula: “Hi yo mhaka leyi hlamarisaka! A mi tivi lomu a humaka kona, kambe ú ndzi hanyanyisile mahlo!” Hi wahi makumu lama faneleke ku endliwa emhakeni leyi? Xisiwana xi kombetela emhakeni leyi amukeriwaka xi ku: “Ha swi tiva leswaku Xikwembu a xi yingisi vadyohi; kambe loko munhu a chava Xikwembu, a endla ku rhandza ka xona, Xikwembu xa n’wi yingisa. A hi si swi twa, ni siku ni rin’we, leswaku munhu un’wana ú tshama a hanyanyisa mahlo ya munhu un’wana la velekiweke a file mahlo.” Xisweswo, makumu ma fanele ma ri erivaleni: “Loko onge munhu loyi a nga humanga eka Xikwembu, ingi a nga kotanga ku endla nchumu.”

Vafarisi va hava nhlamulo ya mhaka yo tano leyi kongomeke leyi twisisekaka. A va swi koti ku amukela ntiyiso kutani va rhuketela munhu loyi va ku: “Wena u velekiweke ethyakeni ra swidyoho, u nga dyondzisa hina xana?” Kutani, va n’wi hlongolela ehandle, kahle-kahle va n’wi hlongola esinagogeni.

Loko Yesu a twe hi ta leswi va swi endleke, a kuma munhu loyi kutani a ku: “Xana wa pfumela eka N’wana-wa-Munhu xana?”

Loko xi hlamula, xisiwana lexi a xi fe mahlo xa vutisa: “I mani Hosi leswaku ndzi ta kota ku pfumela eka yena?”

“U n’wi vonile, hi yena loyi a vulavulaka na wena,” Yesu wa hlamula.

Hi ku hatlisa, munhu loyi a nkhinsama emahlweni ka Yesu ivi a ku: “Hosi, ndza pfumela!”

Kutani Yesu wa hlamusela: “Ndzi tile emisaveni leyi ku ta avanyisa, leswaku lava nga voniki va kota ku vona, ni leswaku lava vonaka va hundzuka lavo-fe-mahlo.”

Kutani, Vafarisi lava yingiseke va vutisa va ku: “Xana na hina hi file mahlo xana?” Loko a va ta swi xiya leswaku va fe mahlo ya miehleketo, a ku ta va ni ku tisola eku kaneteni ka vona ka Yesu. Hi laha Yesu a va byelaka ha kona a ku: “Loko a mi file mahlo, a mi nga ta va na nandzu.” Hambi swi ri tano, va hambete va vula leswaku a va fangi mahlo naswona a va lavi ku voningeriwa ka moya. Kutani Yesu wa xiya: “Kambe sweswi, leswi mi nge: ‘Ha vona’, nandzu wa ha ri na n’wina.” Yohane 9:19-41.

▪ Ha yini vatswari va xisiwana lexi a xi fe mahlo va chava loko va vitaniwa ku ya humelela emahlweni ka Vafarisi, naswona va hlamula njhani hi vutlhari?

▪ Vafarisi va ringeta ku chavisa munhu loyi a a file mahlo hi ndlela yihi xana?

▪ Hi yihi mhaka leyi twalaka ya munhu loyi leyi karihisaka Vafarisi ke?

▪ Ha yini Vafarisi va nga tisoli hi ku kaneta ka vona ka Yesu xana?