Yesu a horisa wanuna la velekiweke a fe mahlo

Yesu wa ha ri eYerusalema hi Savata. Loko yena ni vadyondzisiwa vakwe va ri karhi va famba emutini, va vona wanuna loyi a hanyaka hi ku kombela naswona a velekiweke a nga voni. Vadyondzisiwa va vutisa Yesu va ku: “Rabi, leswi munhu loyi a nga velekiwa a fe matihlo, xana i mani loyi a dyoheke, hi yena kumbe i vatswari vakwe?”—Yohane 9:2.

Vadyondzisiwa va swi tiva leswaku wanuna loyi a nga si tshama a va kona ku fikela loko se a velekiwile kambe va tivutisa loko swi koteka ku va munhu a dyoha a ha ri ekhwirini ra mana wakwe. Yesu u va hlamula a ku: “A nga dyohanga ni vatswari vakwe a va dyohanga, kambe swi endlekile leswaku mitirho ya Xikwembu yi ta vonaka hikwalaho ka yena.” (Yohane 9:3) Hikwalaho, wanuna loyi kumbe vatswari vakwe a va dyohanga kumbe ku endla swihoxo swo karhi leswi endleke leswaku a tswariwa a nga voni. Ematshan’weni ya sweswo, leswi Adamu a dyoheke, vanhu hinkwavo va velekiwe ni xidyoho naswona hikwalaho ka sweswo, va langutana ni vulema byo hambanahambana, byo fana ni ku va mabofu. Kambe ku va wanuna loyi a nga voni, swi pfulela Yesu ndlela yo endla masingita hi ku pfuniwa hi Xikwembu hilaha a endleke hakona mikarhi yin’wana loko a horisa vanhu lava vabyaka.

Yesu u kandziyisa leswaku i swa xihatla ku endla masingita lawa. U ri: “Hi fanele ku endla mitirho ya Loyi a ndzi rhumeke ka ha vona; vusiku bya ta, laha swi nga ta ka swi nga koteki leswaku ku tirhiwa. Hi mina ku vonakala ka misava, ntsena loko ndza ha ri laha misaveni.” (Yohane 9:4, 5) Ku nga ri khale, rifu ra Yesu ri ta endla leswaku a nghena emunyameni wa sirha, laha a nga ta ka a nga koti ku endla nchumu. Enkarhini wa sweswi, hi yena xihlovo xa ku vonakala ka misava.

Xana Yesu u ta n’wi horisa wanuna loyi? Loko swi ri tano, u ta n’wi horisa njhani? Yesu u tshwutela ehansi ivi a pfuva misava hi marha. Hiloko a swi tota ematihlweni ya wanuna loyi a nga voniki, ivi a ku: “Famba u ya hlamba edan’wini leri vuriwaka Silowama.” (Yohane 9:7) Wanuna loyi u yingisile. Loko a heta ku hlamba, u kota ku vona! Ehleketa ndlela leyi a tsakeke hayona hileswi ku nga ro sungula a vona evuton’wini byakwe!

Vaakelani ni vanhu van’wana lava n’wi tivaka a nga voni, va hlamala. Va vutisa va ku: “Xana loyi a hi yena wanuna loyi a hamba a kombela?” Van’wana va hlamula va ku: “Hi yena.” Kambe van’wana a va swi tshembi naswona va ri: “A hi yena, u fana na yena.” Hiloko wanuna loyi a hlamula a ku: “Hi mina.”—Yohane 9:8, 9.

Kutani va n’wi vutisa va ku: “Xana matihlo ya wena ma pfuleke njhani?” A hlamula a ku: “Wanuna loyi va nge i Yesu u pfuve misava ni marhi a ndzi tota matihlo kutani a ku, ‘Famba eSilowama u ya hlamba.’ Hiloko ndzi famba ndzi ya hlamba kutani ndzi sungula ku vona.” Kutani va n’wi vutisa va ku: “Xana u kwihi wanuna wa kona?” A va hlamula a ku: “A ndzi swi tivi.”—Yohane 9:10-12.

Vanhu lava va yisa wanuna loyi eka Vafarisi lava na vona va lavaka ku tiva leswaku swi kotekise ku yini leswaku a vona. U va hlamula a ku: “U tote matihlo ya mina hi misava leyi pfanganeke ni marha, kutani ndzi ya hlamba hiloko ndzi sungula ku vona.” Hi ntolovelo Vafarisi a va fanele va tsaka ni wanuna loyi a a tshamela ku kombela kambe se a horisiweke. Ematshan’weni ya sweswo, van’wana va sola Yesu. Va ri: “Munhu loyi a nga humi eka Xikwembu, hikuva a nga yi xiximi Savata.” Kambe van’wana va ri: “Xana munhu loyi a nga mudyohi a nga swi kotisa ku yini ku endla masingita yo tano?” (Yohane 9:15, 16) Hikwalaho ka sweswo, va avana.

Leswi va nga ha voniki swilo hi tihlo rin’we, va ya eka wanuna loyi se a pfuriweke mahlo ivi va n’wi vutisa va ku: “Xana wena u ri yini ha yena hileswi a ku pfuleke matihlo?” Leswi a nga kanakaniki mayelana na Yesu, u va hlamula a ku: “I muprofeta.”—Yohane 9:17.

Vayuda a va swi tshembi leswi. Kumbexana va ehleketa leswaku wanuna loyi u tirhisana na Yesu leswaku va kanganyisa vanhu. Va hetelela hi ku vula leswaku va ta vutisa vatswari va wanuna loyi loko ku ri ntiyiso leswaku a a nga voni hakunene.