Vutomi Ni Vutirheli Bya Yesu

Ku Hanyisa Munhu La Velekiweke A Fe Mahlo

LOKO Vayuda va ringeta ku khandla Yesu hi maribye loko a ha ri etempeleni, wa titumbeta ivi a baleka. Kambe a nga suki eYerusalema. Endzhakunyana, hi Savata, yena ni vadyondzisiwa va yena va le ku fambeni emutini lowu loko va vona wanuna loyi a feke mahlo ku sukela eku tswariweni ka yena. “Mufundhisi, i xidyoho xa mani,” vadyondzisiwa va vutisa Yesu, “lexi endleke leswaku munhu loyi a velekiwa a file mahlo: I xa yena kumbe i xa vatswari va yena xana?”

Kumbexana vadyondzisiwa va pfumela, tanihi leswi vafundhisi van’wana va pfumelaka, leswaku munhu a nga dyoha ekhwirini ra mana wakwe. Kambe Yesu wa hlamula a ku: “A ku dyohanga yena kumbe vatswari va yena, kambe ú velekiwile a file mahlo leswaku mintirho ya Xikwembu yi ta vonaka ha yena.” Ku fa ka munhu loyi mahlo a hi vuyelo bya xihoxo lexi kongomeke kumbe xidyoho lexi endliweke hi munhu loyi kumbe vatswari va yena. Xidyoho xa munhu wo sungula Adamu xi vangele ku nga hetiseki ka vanhu hinkwavo, kutani xisweswo va va ehansi ka swihoxo swo tanihi ku velekiwa va nga voni. Xihoxo lexi nga eka munhu loyi manuku xi nyika nkarhi wa leswaku Yesu a kombisa mintirho ya Xikwembu.

Yesu u tshikilela xihatla eku endleni ka mintirho leyi. U ri: “Hi fanele ku tirha mintirho ya Loyi a ndzi rhumeke, dyambu ri nga si pela; vusiku bya ta, lebyi munhu a nga ta ka a nga ha swi koti ku tirha. Loko ndza ha ri laha misaveni, ndzi ku vonakala ka misava.” Hi ku hatlisa rifu ra Yesu ri ta n’wi nghenisa exinyamini xa sirha laha a nga ta ka a nga ha endli nchumu. Hi nkarhi wolowo, hi yena xihlovo xa ku vonakala ka misava.

Endzhaku ko vula swilo leswi, Yesu u tshwutela ehansi ivi a pfuva ndzhope hi marha. U wu tota emahlweni ya munhu loyi wa bofu ivi a ku: “Famba u ya hlamba exidziveni xa Silowama.” Wanuna loyi wa yingisa. Kutani loko a swi endla, wa vona! Vona ndlela leyi a tsakaka ha yona eku tlheleni ka yena, a vona ro sungula evuton’wini bya yena!

Vaakelani ni van’wana lava n’wi tivaka va hlamala. Va vutisa va ku: “Xana a hi yena loyi a a tolovele ku tshama a ri karhi a kombela xana?” Van’wana va ku: “Hi yena.” Kambe van’wana a va swi tshembi: “E-e, a hi yena, kambe wo fana na yena.” Kambe wanuna loyi u ri: “Hi mina!”

Vanhu lava va lava ku tiva: “Mahlo ya wena ma hanyanyile hi mukhuva wihi xana?”

“Munhu loyi va nge i Yesu, ú pfuve ndzhope, a ndzi tota mahlo hi yona, kutani ú te ka mina: ‘Famba u ya hlamba le Silowama!’ Ndzi yile, ndzi ya hlamba, kutani ndzi kotile ku vona.”

Va vutisa va ku: “Ú kwihi munhu wa kona?”

Wa hlamula a ku: “A ndzi swi tivi.”

Vanhu lava sweswi va yisa munhu loyi a a fe mahlo eka varhangeri va vona va vukhongeri, Vafarisi. Lava na vona va tlhela va ya emahlweni va n’wi konanisa hi ndlela leyi a nga tlhela a vona ha yona. Wanuna loyi wa hlamusela: “Ú ndzi totile mahlo hi ndzhope; ndzi yile ndzi ya hlamba, kutani sweswi ndzi kota ku vona.”

Entiyisweni, Vafarisi a va fanele ku tsaka ni mukomberi la horisiweke! Kambe ematshan’wini ya sweswo va hehla Yesu. Va ri: “La endleke swilo leswi a nga humi eka Xikwembu.” Ha yini va vula leswi? “Hikuva a nga na mhaka ni siku ra Savata.” Kutani hambi swi ri tano Vafarisi van’wana va hlamala: “Xana munhu wa mudyohi a nga swi kotisa ku yini ku endla mahlori layo tano xana?” Kutani ku ni ku avana exikarhi ka vona.

Hikwalaho, va vutisa munhu loyi va ku: “Wena u ri yini hi yena, leswi u nge, ú ku hanyanyisile mahlo?”

Wa hlamula a ku: “I muprofeta!”

Vafarisi va ala ku pfumela leswi. Va kholwa leswaku ku fanele ku ri na ntwanano wun’wana wa le xihundleni exikarhi ka Yesu ni munhu loyi leswaku va kanganyisa vanhu. Kutani ku lulamisa mhaka leyi, va vitana vatswari va mukomberi loyi leswaku va ta va konanisa. Yohane 8:59; 9:1-18.

◆ I yini lexi a xi ri na vutihlamuleri bya ku nga voni ka munhu loyi naswona i yini lexi a xi nga ri na byona?

◆ Hi byihi vusiku lebyi munhu a nga ta ka a nga ha swi koti ku tirha?

◆ Loko wanuna a horisiwa, xana xiendlo xa lava n’wi tivaka hi xihi?

◆ Xana Vafarisi va avane hi ndlela yihi ehenhleni ka ku horisiwa ka munhu loyi?