Ku Amukela Xikhundlha Lexi Kreste A Nga Na Xona eLunghiselelweni Ra Xikwembu

“EKU sunguleni Xikwembu xi tumbuluxe matilo ni misava” naswona hinkwaswo leswi xi swi endleke a swi ri “swinene ngopfu.” (Gen. 1:1, 31) Yehovha u vumbe vanhu a tlhela a lunghiselela leswaku va va ni vumundzuku lebyinene. Hambiswiritano, ku xandzuka ka le Edeni ku kavanyete ntsako wa vanhu swa xinkarhana. Nilokoswiritano, xikongomelo xa Yehovha hi misava ni hi vanhu a xi cincanga. Xikwembu xi kombise leswaku a xi ta ponisa vana va Adamu lava yingisaka. Vugandzeri bya ntiyiso a byi ta vuyeteriwa naswona Xikwembu a xi ta lovisa lowo biha swin’we ni mintirho yakwe hinkwayo yo homboloka. (Gen. 3:15) Swilo a swi ta tlhela swi va “swinene ngopfu.” Yehovha a a ta hetisisa sweswo hi ku tirhisa N’wana wakwe, Yesu Kreste. (1 Yoh. 3:8) Hikwalaho, i swa nkoka swinene leswaku hi amukela xikhundlha xa Kreste elunghiselelweni ra Xikwembu.—Mint. 4:12; Filp. 2:9, 11.

XIKHUNDLHA XA KRESTE

² Loko hi anakanya hi xikhundlha xa Kreste elunghiselelweni ra Xikwembu, hi fanele hi tsundzuka leswaku xi katsa mintirho yo tala. Yesu i Mukutsuri wa vanhu, i Muprista Lonkulu, i Nhloko ya vandlha ra Vukreste naswona sweswi i Hosi ya Mfumo wa Xikwembu. Ku anakanyisisa hi mintirho leyi swi endla leswaku hi ri tlangela ngopfu lunghiselelo leri ra Xikwembu naswona hi n’wi rhandza swinene Kreste Yesu. Bibele yi hlamusela yin’wana ya mintirho yakwe yo hambana-hambana.

³ Hi nkarhi wa vutirheli bya Kreste bya laha misaveni, swi ve erivaleni leswaku Yesu u ta endla leswaku vanhu lava yingisaka va swi kota ku tlhela va va ni vuxaka ni Xikwembu. (Yoh. 14:6) Leswi a nga Mukutsuri wa vanhu, Yesu u nyikele hi vutomi byakwe leswaku a va nkutsulo wa lavo tala. (Mat. 20:28) Kutani Yesu a nga vanga xikombiso lexinene ntsena xa ku hanya hi ku chava Xikwembu. Leswi Yehovha a tiyimiseleke ku swi endlela vanhu, a swi ta hetiseka ha yena ntsena. A ku na un’wana loyi hi nga kumaka tintswalo ta Xikwembu handle ka yena. (Mint. 5:31; 2 Kor. 5:18, 19) Rifu ra Yesu ra xitlhavelo ni ku pfuxiwa kakwe eku feni swi pfulele vanhu lava yingisaka ndlela ya leswaku va kuma mikateko ya hilaha ku nga heriki eMfun’weni wa Xikwembu wa le tilweni.

⁴ Tanihi Muprista Lonkulu, Yesu u “hi tshandzisa eku tsaneni ka hina” kutani a kombela ku rivaleriwa ka swidyoho swa valandzeri vakwe lava tinyiketeleke lava nga laha misaveni. Muapostola Pawulo u te: “Muprista lonkulu loyi hi nga na yena, a hi yena loyi a nga tsandzekaka ku hi tshandzisa eku tsaneni ka hina, kambe hi loyi a ringiweke hi tindlela hinkwato ku fana na hina, kambe yena a nga vanga na xidyoho.” Kutani Pawulo u khutaze lava kombisaka ripfumelo eka Yesu Kreste leswaku va ri tirhisa hilaha ku heleleke lunghiselelo leri ra ku tlhela va va ni vuxaka ni Xikwembu, a ku: “Hikokwalaho, a hi tshineleleni xiluvelo xa musa lowu nga faneriwiki hi ntshunxeko wo vulavula, leswaku hi ta kuma tintswalo ni musa lowu nga faneriwiki hi ta pfuneka enkarhini wa kona.”—Hev. 4:14-16; 1 Yoh. 2:2.

⁵ Nakambe Yesu i Nhloko ya vandlha ra Vukreste. Tanihi leswi valandzeri vakwe va lembe-xidzana ro sungula a va nga ri na murhangeri la nga munhu wa nyama, swi tano ni le ka hina namuntlha. Yesu u hi kongomisa hi moya wo kwetsima ni hi varisi lava fanelekaka lava nga ehansi ka yena, lava nga ta tihlamulela eka yena ni le ka Tata wakwe wa le tilweni eka nkhathalelo lowu va wu nyikaka ntlhambi wa Xikwembu. (Hev. 13:17; 1 Pet. 5:2, 3) Loko Yehovha a profeta hi Yesu u te: “Maswivo! Ndzi n’wi veke a va mbhoni eka vanhu va matiko, a va murhangeri ni ndhuna ya vanhu va matiko.” (Esa. 55:4) Yesu u tiyisekisile leswaku vuprofeta byebyo byi hetiseke ha yena loko a byela vadyondzisiwa vakwe a ku: “Mi nga vuriwi varhangeri, hikuva Murhangeri wa n’wina i wun’we, i Kreste.”—Mat. 23:10.

⁶ Yesu u kombise leswi a nga xiswona ni leswaku u tiyimisele ku hi pfuna, hi ku vula a ku: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya. Hikuva joko ra mina ra olova ni ndzhwalo wa mina wa vevuka.” (Mat. 11:28-30) Yesu Kreste u kombise leswaku u tekelele Tata wakwe wa le tilweni, Yehovha Xikwembu, emhakeni ya ku va “murisi lonene,” hi ku ungamela timhaka ta vandlha ra Vukreste hi musa ni hi ndlela leyi phyuphyisaka mimoya-xiviri ya hina.—Yoh. 10:11; Esa. 40:11.

⁷ Eka papila rakwe ro sungula leri a ri tsaleleke Vakorinto, Pawulo u hlamusele ntirho wun’wana wa Yesu Kreste hi ndlela leyi: “U fanele a va hosi ku fikela loko Xikwembu xi veke valala hinkwavo ehansi ka milenge ya yena. Kambe loko swilo hinkwaswo swi ta va swi vekiwe ehansi ka yena, kutani N’wana na yena u ta tiveka ehansi ka xona lexi vekeke swilo hinkwaswo ehansi ka yena, leswaku Xikwembu xi va swilo hinkwaswo eka vanhu hinkwavo.” (1 Kor. 15:25, 28) Loko a nga si ta emisaveni, Yesu a a ri ‘mutirhi wa Xikwembu la nga ni vuswikoti,’ tanihi leswi a nga mativula ya swivumbiwa swa Xikwembu. (Swiv. 8:22-31) Loko Xikwembu xi rhumele Yesu emisaveni, u endle ku rhandza ka xona minkarhi hinkwayo. U tiyisele ndzingo lowukulu eka hinkwayo kutani a fa a tshembekile eka Tata wakwe. (Yoh. 4:34; 15:10) Leswi N’wana wa xona a tshembekeke kukondza a fa, Xikwembu xi n’wi pfuxele ku ya hanya etilweni kutani xi n’wi veka ku va Hosi ya Mfumo wa le tilweni. (Mint. 2:32-36) Kreste Yesu u nyikiwe xiavelo lexikulu hi Xikwembu xo kongomisa makume ya magidi ya swivumbiwa swa moya leswi nga ni matimba, leswaku va susa mfumo wa vanhu ni vubihi hinkwabyo emisaveni. (Swiv. 2:21, 22; 2 Tes 1:6-9; Nhlav. 19:11-21; 20:1-3) Kutani Mfumo wa Xikwembu wa le tilweni lowu lawuriwaka hi Kreste, wu ta fuma misava hinkwayo.—Nhlav. 11:15.

LESWI KU AMUKELA XIKHUNDLHA XAKWE SWI VULAKA SWONA

⁸ Yesu Kreste, Xikombiso xa hina, u hetisekile. U lerisiwe leswaku a hi khathalela. Leswaku hi vuyeriwa erirhandzwini ni le ka nkhathalelo wakwe hi fanele hi tshama hi tshembekile eka Yehovha naswona hi tshama hi ri karhi hi fambisana ni nhlangano wakwe lowu yaka emahlweni.

⁹ Valandzeri va Yesu va lembe-xidzana ro sungula va xi amukele hilaha ku heleleke xikhundlha xa Kreste elunghiselelweni ra Xikwembu. Va swi kombise hi ku tirha hi vun’we ehansi ka vulawuri bya Kreste, va landzela nkongomiso wakwe lowu a va nyikaka wona hi ku tirhisa moya lowo kwetsima. (Min 15:12-21) Loko muapostola Pawulo a vulavula hi vun’we bya vandlha ra Vakreste lava totiweke u te: “Hi ku vulavula ntiyiso, a hi kuleni hi rirhandzu eka swilo hinkwaswo eka loyi a nga nhloko, Kreste. Eka yena miri hinkwawo, hi ku hlanganisiwa swin’we hi vun’we ni ku endliwa leswaku wu tirhisana hi mahlangano hinkwawo lama nyikaka leswi lavekaka, hi ku ya hi matirhelo ya xirho xin’wana ni xin’wana hi mpimo lowu faneleke, wu endla leswaku miri wu kula wu akeka hi rirhandzu.”—Efe. 4:15, 16.

¹⁰ Loko un’wana ni un’wana evandlheni a khomisana ni van’wana naswona hinkwavo va tirhisana hi ku pfumelelana ni vunhloko bya Kreste, ku va ni ku andza naswona hi tshama hi ri ni moya lowunene wa rirhandzu, ku nga “xiboho lexi hetisekeke xa vun’we.”—Yoh. 10:16; Kol. 3:14; 1 Kor. 12:14-26.

¹¹ Swiendlakalo swa misava leswi hetisisaka vuprofeta bya Bibele, swi swi veka erivaleni leswaku Yesu Kreste u nyikiwe matimba ya Mfumo ku sukela hi 1914. Sweswi u le ku fumeni exikarhi ka valala vakwe. (Ps. 2:1-12; 110:1, 2) Sweswo swi vula yini eka lava hanyaka emisaveni sweswi? Yesu u ta xi kombisa hilaha ku heleleke xikhundlha xakwe tanihi Hosi ya tihosi ni Mufumi wa vafumi eka valala vakwe, loko a tisa ku avanyisa ka Xikwembu eka vona. (Nhlav. 11:15; 12:10; 19:16) Kutani, xitshembiso xa Yehovha xa ku kutsula vanhu, lexi a xi vuleke eku sunguleni loko vanhu va ha ku xandzuka, xi ta hetiseka ku nga ri khale eka lava amukelekaka eka yena, lava nga evokweni ra Kreste ra xinene. (Mat. 25:34) Ha tsaka swinene leswi hi amukeleke xikhundlha xa Kreste elunghiselelweni ra Xikwembu! Onge hi nga tshama hi ri ni vun’we leswaku hi endla ntirho wo chumayela emisaveni hinkwayo hi ku landza nkongomiso wa Kreste emasikwini lawa ya makumu!