Ndlela Leyi Yesu Kreste A Nga Hi Pfunaka Ha Yona
LESWI Yesu Kreste a swi endleke ku pfuna vanhu loko a ri emisaveni a swi hlamarisa. Leswi i ntiyiso, hikuva endzhaku ko rungula swiendlakalo swo hlayanyana swa vutomi bya Yesu, mbhoni yin’wana yo swi vona hi mahlo yi te: “Entiyisweni, ku ni swilo swin’wana swo tala leswi Yesu a swi endleke, leswi, loko a swi lo tsariwa hi vuxokoxoko lebyi heleleke, ndzi ehleketa leswaku misava a yi nga ta ti tamela tibuku-nsongwa leti a ti ta tsariwa.” (Yohane 21:25) Tanihi leswi Yesu a endleke swo tala emisaveni, hi nga ha tivutisa: ‘Xana a nga hi pfuna njhani a ri etilweni? Xana hi nga vuyeriwa eka ntwela-vusiwana lowukulu wa Yesu sweswi?’
Nhlamulo ya kona ya tsakisa swinene yi tlhela yi khutaza. Bibele yi hi byela leswaku Kreste u nghene “etilweni hi koxe, kutani a humelela emahlweni ka Xikwembu hi xiviri hikwalaho ka hina.” (Vaheveru 9:24) U hi endlele yini? Muapostola Pawulo wa hlamusela: “[Kreste] a nga nghenanga ni ngati ya timbuti ni ya swinkunzana, kambe u nghene ni ngati yakwe, kan’we swi helela kwalaho endhawini yo kwetsima [“etilweni hi koxe”] kutani a hi kumela ku kutsuriwa loku nga heriki.”—Vaheveru 9:12; 1 Yohane 2:2.
Mayana mahungu lamanene swonghasi! Ematshan’weni yo herisa ntirho wa Yesu wo hlamarisa lowu a wu endleleke vanhu, ku tlhandlukela ka yena etilweni ku endle leswaku a kota ku endlela vanhu swilo leswi engetelekeke. Xikwembu, hikwalaho ka tintswalo letikulu ta xona leti nga fanelangiki, xi hlawule Yesu ku tirha tanihi “nandza wa vanhu”—muprista lonkulu—“evokweni ra xinene ra xiluvelo xa Nkulukumba ematilweni.”—Vaheveru 8:1, 2.
“Nandza Wa Vanhu”
Kutani Yesu a a ta va nandza wa vanhu ematilweni. A a ta endla ntirho wo fana ni lowu a wu endliwa hi muprista lonkulu wa le Israyele lowu a wu endla hikwalaho ka vagandzeri va Xikwembu eminkarhini ya khale. Xana ntirho wolowo a ku ri yini? Pawulo wa hlamusela: “Muprista un’wana ni un’wana lonkulu u vekeriwe ku nyikela tinyiko ni switlhavelo; hikwalaho a swi fanerile leswaku ni loyi [Yesu Kreste la tlhandlukeke] a va ni nchumu wo nyikela ha wona.”—Vaheveru 8:3.
Yesu a ri ni xo karhi xo nyikela ha xona lexi a xi swi tlula swinene leswi muprista lonkulu wa khale a a swi nyikela. “Loko ngati ya timbuti ni ya tinkunzi” yi nga tisa mpimo wo karhi wo basisa hi tlhelo ra moya eka Israyele wa khale, “ku vuriwa yini hi ngati ya Kreste . . . a basisa mapfalo ya hina emintirhweni leyi feke leswaku hi ta endlela Xikwembu lexi hanyaka ntirho wo kwetsima?”—Vaheveru 9:13, 14.
Yesu nakambe i nandza wo hlawuleka wa vanhu, hikuva u nyikiwe ku nga fi. EIsrayele wa khale “vo tala a va boheka ku va vaprista hi ku tlhandlamana hikwalaho ka leswi rifu a ri va sivela ku tshama va ri vaprista.” Kambe ku vuriwa yini hi Yesu? Pawulo wa tsala: “Ntirho wakwe wa vuprista a wu na vatlhandlami nikatsongo. Hikwalaho, nakambe wa swi kota ku va ponisa hi ku helela lava tshinelelaka Xikwembu ha yena, hikuva nkarhi hinkwawo wa hanya leswaku a va kombelela.” (Vaheveru 7:23-25; Varhoma 6:9) Ina, evokweni ra xinene ra Xikwembu etilweni hi ni nandza wa vanhu loyi ‘a tshamaka a hanya leswaku a hi kombelela.’ Wa nga ehleketa hi leswi sweswo swi vulaka swona eka hina sweswi!
Loko Yesu a ri emisaveni, vanhu a va khitikanela eka yena leswaku va ya kuma mpfuno, naswona minkarhi yin’wana a va famba mimpfhuka yo leha leswaku va kuma mpfuno wa yena. (Matewu 4:24, 25) Etilweni, Yesu u lunghekele ku pfuna vanhu va tinxaka hinkwato. Etilweni, minkarhi hinkwayo u tshama a ri nandza wa vanhu.
Xana Yesu I Muprista Lonkulu Wa Njhani?
Ndlela leyi Yesu Kreste a hlamuseriweke ha yona eka Tievhangeli yi hi siya hi nga kanakani hi mpfuno wa yena ni ntwela-vusiwana lowukulu wa yena. Mayana ndlela leyi a a tinyikela ha yona! U kavanyetiwe ko tala loko yena ni vadyondzisiwa va yena va ringeta ku wisa nkarhinyana wo leha. Ematshan’weni yo titwa a kavanyetiwile loko a lava ku wisa endhawini yo rhula ni yo pfumala pongo, u ‘va twele vusiwana’ vanhu lava a va lava ku pfuniwa hi yena. Hambiloko Yesu a karhele, a twa ndlala ni torha, ‘u va amukele hi musa’ naswona a a tiyimiserile ku tshika ku dya leswaku a ta pfuna vadyohi.—Marka 6:31-34; Luka 9:11-17; Yohane 4:4-6, 31-34.
Hi ku susumetiwa hi ntwela-vusiwana, Yesu u teke magoza yo enerisa vanhu hi tlhelo ra nyama, ra mintlhaveko ni ra swilaveko swa moya. (Matewu 9:35-38; Marka 6:35-44) Ku tlula kwalaho, u va dyondzise ku kuma ku wisa ka xiviri ni nchavelelo. (Yohane 4:7-30, 39-42) Hi xikombiso, vona ndlela leyi xikhutazo xa yena xi tsakisaka ha yona: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya.”—Matewu 11:28, 29.
Ku rhandza ka Yesu vanhu a ku ri kukulu lerova u hetelele a nyikele vutomi bya yena hikwalaho ka vanhu lava dyoheke. (Varhoma 5:6-8) Malunghana ni mhaka leyi, muapostola Pawulo u te: “[Yehovha Xikwembu loyi a] nga n’wi tsetselelangiki hambi ku ri N’wana wa [yena], kambe [a] n’wi nyiketeke hikwalaho ka hina hinkwerhu, nakambe, xana a nge hi nyiki hi musa swilo leswin’wana hinkwaswo hikwalaho ka yena? . . . Kreste Yesu hi yena loyi a feke, ina, kahle-kahle hi yena loyi a pfuxiweke eka lava feke, loyi a nga evokweni ra xinene ra Xikwembu, loyi nakambe a hi kombelelaka.”—Varhoma 8:32-34.
Muprista Lonkulu La Nga Hi Khongotelaka
Loko a ri munhu wa nyama, Yesu u twe ndlala, torha, a karhala, a vaviseka, a va ni switlhavi a tlhela a fa. Ntshikilelo lowu a wu tiyiseleleke wu n’wi havaxerise hi ndlela yo hlawuleka swinene leswaku a tirha tanihi Muprista Lonkulu wa vanhu lava xanisekaka. Pawulo u tsarile: “[Yesu] a a boheka ku fana ni ‘vamakwavo’ hi matlhelo hinkwawo, leswaku a ta va muprista lonkulu wa tintswalo ni wo tshembeka eka swilo leswi khumbaka Xikwembu, leswaku a nyikela gandzelo ra ku vuyelelana ra swidyoho swa vanhu. Hikuva leswi yena hi byakwe a xanisekeke loko a ringiwa, wa swi kota ku ta pfuna lava ringiwaka.”—Vaheveru 2:17, 18; 13:8.
Yesu u kombise leswaku wa swi fanelekela naswona wa swi rhandza ku pfuna vanhu leswaku va tshinela ekusuhi ni Xikwembu. Kambe, xana leswi swi vula leswaku u fanele a xavelela Xikwembu xo kariha lexi pfumalaka musa lexi nga tiyimiselangiki ku rivalela munhu? Nikatsongo, hikuva Bibele ya hi tiyisekisa leswaku “Yehovha, [hi] lonene naswona u lunghekele ku rivalela.” Yi tlhela yi ku: “Loko hi vula swidyoho swa hina, [xa] tshembeka naswona [xi] lulamile lerova [xi] nga hi rivalela swidyoho swa hina ni ku hi basisa evubihini hinkwabyo.” (Pisalema 86:5; 1 Yohane 1:9) Entiyisweni, marito ya Yesu ya musa ni swiendlo swa yena swi kombisa ntwela-vusiwana, tintswalo ni rirhandzu ra Tata wa yena.—Yohane 5:19; 8:28; 14:9, 10.
Xana Yesu u ku tisa njhani ku wisa eka vadyohi lava hundzukaka? Hi ku va pfuna ku kuma ntsako ni ku eneriseka eka matshalatshala ya vona yo tsakisa Xikwembu. Loko a tsalela Vakreste-kulobye lava totiweke, Pawulo u katsakanye xiyimo hi ku vula leswi: “Hikokwalaho, hi ku vona leswaku hi ni muprista lonkulu swinene la tsemakanyeke matilo, Yesu N’wana wa Xikwembu, a hi namarheleni ku kombisa ka hina ripfumelo eka yena. Hikuva muprista lonkulu loyi hi nga na yena, a hi yena loyi a nga tsandzekaka ku hi tshandzisa eku tsaneni ka hina, kambe hi loyi a ringiweke hi tindlela hinkwato ku fana na hina, kambe yena a nga vanga na xidyoho. Hikokwalaho, a hi tshineleleni xiluvelo xa musa lowu nga faneriwiki hi ntshunxeko wo vulavula, leswaku hi ta kuma tintswalo ni musa lowu nga faneriwiki hi ta pfuneka enkarhini wa kona.”—Vaheveru 4:14-16.
‘Mpfuno Hi Nkarhi Lowu Faneleke’
Kambe, hi nga endla yini loko hi langutane ni swiphiqo leswi hi vonaka swi ri ehenhla ka matimba ya hina—vuvabyi lebyikulu, ku tshikileriwa hi ku tivona nandzu, ku hela matimba ni gome? Hi nga tirhisa lunghiselelo leri Yesu a titshege hi rona nkarhi na nkarhi—lunghelo ra risima ra xikhongelo. Hi xikombiso, hi vusiku bya le mahlweni ka ku va a nyikela vutomi byakwe hikwalaho ka hina, “a hambeta a khongela hi matimba swinene; kutani nyuku wakwe wu kotisa mathonsi ya ngati wu thonela ehansi.” (Luka 22:44) Ina, Yesu wa swi tiva leswaku swi njhani ku khongela eka Xikwembu hi mbilu ya wena hinkwayo. U “endle swikombelo ni swikhongelo eka Loyi a a swi kota ku n’wi ponisa eku feni, hi swirilo swa matimba ni mihloti, naswona u twiwe hi tindleve timbirhi hikwalaho ka nchavo wakwe lowu nga ni vukwembu.”—Vaheveru 5:7.
Yesu wa swi tiva leswaku swi vula yini eka vanhu ku “twiw[a] hi tindleve timbirhi” ni ku tiyisiwa. (Luka 22:43) Ku tlula kwalaho u tshembisile: “Loko mi kombela xin’wana ni xin’wana eka Tatana, u ta mi nyika xona hi vito ra mina. . . . Kombelani mi ta swi kuma, leswaku ntsako wa n’wina wu tatiwa.” (Yohane 16:23, 24) Hikwalaho, hi nga kombela Xikwembu hi ri ni ntshembo wa leswaku xi ta pfumelela N’wana wa xona ku tirhisa vulawuri bya yena ni ntikelo wa xitlhavelo xa nkutsulo wa yena lowu a wu endleke hikwalaho ka hina.—Matewu 28:18.
Hi nga tiyiseka leswaku exikhundleni xa yena xa le tilweni, Yesu u ta hi nyika mpfuno lowunene hi nkarhi lowu faneleke. Hi xikombiso, loko hi endle xidyoho lerova hi tisola hi mbilu hinkwayo hikwalaho ka leswi hi xi endleke, hi nga kuma nchavelelo eka xitiyisekiso xa leswaku “hi ni mupfuni eka Tatana, a nga Yesu Kreste, loyi a lulameke.” (1 Yohane 2:1, 2) Mupfuni ni Muchaveleri wa hina u ta hi kombelela ematilweni leswaku swikhongelo leswi hi swi endlaka hi vito rakwe loko swi pfumelelanaka ni Matsalwa swi hlamuriwa.—Yohane 14:13, 14; 1 Yohane 5:14, 15.
Ku Kombisa Ku Tlangela Mpfuno Wa Kreste
Ku ni swo tala leswi katsekaka ku ri ni ku kombela Xikwembu hi N’wana wa xona. Hi ntikelo wa gandzelo ra nkutsulo, “Kreste u hi xavile” a va “n’wini loyi a . . . xaveke” vanhu, hi ndlela yo fanekisela. (Vagalatiya 3:13; 4:5; 2 Petro 2:1) Hi nga kombisa ku nkhensa eka hinkwaswo leswi Kreste a hi endlelaka swona hi ku pfumela leswaku a va n’wini wa hina ni ku amukela xirhambo xa yena hi ntsako, lexi nge: “Loko munhu a lava ku ndzi landzela, a a titshike kutani a rhwala mhandzi yakwe ya nxaniso siku ni siku a ndzi landzela nkarhi hinkwawo.” (Luka 9:23) Ku ‘titshika’ a hi ku vula hi nomu ntsena u ku wa titshika. Phela, Kreste “u fele hinkwavo leswaku lava va hanyaka va nga ha tihanyeli, kambe va hanyela loyi a va feleke a tlhela a pfuxiwa.” (2 Vakorinto 5:14, 15) Hikokwalaho, ku tlangela nkutsulo swi ta va ni vuyelo lebyi enteke eka langutelo ra hina, tipakani ni mahanyelo ya hina. Xikweleti lexi hi nga na xona loko dyambu ri xile eka “Kreste Yesu, la tinyiketeleke hikwalaho ka hina,” xi fanele xi hi susumetela ku dyondza leswi engetelekeke hi yena ni Tata wa yena wa rirhandzu, Yehovha Xikwembu. Hi fanele hi tlhela hi kula eripfumelweni, hi hanya hi mimpimanyeto leyi pfunaka ya Xikwembu ni ku “hisekel[a] mintirho leyinene.”—Tito 2:13, 14; Yohane 17:3.
Vandlha ra Vukreste i xitirho lexi hi kumaka ha xona swakudya leswi nga le nkarhini swa moya, xikhutazo ni nkongomiso. (Matewu 24:45-47; Vaheveru 10:21-25) Hi xikombiso, loko ku ri ni lava va vabyaka emoyeni va nga “vitan[a] vakulukumba [vakulu lava hlawuriweke] va vandlha.” Yakobo u engetela xitiyisekiso lexi nge: “Kutani xikhongelo xa ripfumelo xi ta hanyisa la nga pfukiki swinene, naswona Yehovha u ta n’wi pfuxa. Nakambe, loko a lo endla swidyoho, u ta rivaleriwa swona.”—Yakobo 5:13-15.
Hi xikombiso: Wanuna wa le Afrika Dzonga la gweviweke ku tshama ekhotsweni u tsalele nkulu wa vandlha a kombisa ku tlangela eka “Timbhoni ta Yehovha hinkwato leti endlaka ntirho lowunene lowu sunguriweke hi Yesu Kreste leswaku a pfuna vanhu va tikarhatela ku nghena eMfun’weni wa Xikwembu.” Kutani u tsale a ku: “A ndzi tsake ngopfu ku kuma papila ra n’wina. Nkhathalelo wa n’wina wo ndzi ntshunxa hi tlhelo ra moya wu ndzi khumbe mbilu ngopfu. Lexi xi ve xivangelo xa matimba swinene xa leswaku ndzi sungula ku yingisa xirhambo xa Yehovha Xikwembu xa leswaku ndzi hundzuka. Ku ringana 27 wa malembe a ndzi lahlekile ni ku mbamba emunyameni wa xidyoho, vuxisi, vuoswi, ku tikhoma hi ndlela yo biha ni vukhongeri bya mavunwa. Endzhaku ka loko ndzi hlangane ni Timbhoni ta Yehovha, ndza swi vona leswaku ndzi hetelele ndzi kume ndlela—ndlela leyo lulama! Lexi ndzi faneleke ndzi xi endla i ku yi landzela.”
Mpfuno Lowu Engetelekeke Ku Nga Ri Khale
Swiyimo swa misava leswi hohlokaka i vumbhoni lebyi nga erivaleni bya leswaku hi hanya eminkarhini yo tika leyi faneleke ku ta emahlweninyana ka ku sungula ka ‘nhlomulo lowukulu.’ Sweswi ntshungu lowukulu lowu humaka ematikweni, etinxakeni, evanhwini ni le ka tindzimi hinkwato ‘wu hlantswa tinguvu ta wona to leha wu ti endla to basa hi ngati ya Xinyimpfana.’ (Nhlavutelo 7:9, 13, 14; 2 Timotiya 3:1-5) Hi ku kombisa ripfumelo egandzelweni ra nkutsulo ra Yesu, va kuma ku tsetseleriwa ka swidyoho swa vona naswona va pfuniwa leswaku va va ni vuxaka lebyikulu ni Xikwembu—entiyisweni va va vanghana va yena.—Yakobo 2:23.
Xinyimpfana, ku nga Yesu Kreste, “xi ta va risa [lava nga ta pona nhlomulo lowukulu], xi va kongomisa eminseledyaneni ya mati ya vutomi. Kutani Xikwembu xi ta sula mihloti hinkwayo ematihlweni ya vona.” (Nhlavutelo 7:17) Kutani Kreste u ta hetisisa mintirho ya yena ya ku va Muprista Lonkulu. U ta pfuna vanghana va Xikwembu hinkwavo leswaku va vuyeriwa swinene “eminseledyaneni ya mati ya vutomi”—hi tlhelo ra moya, ra nyama, ra mianakanyo ni ra mintlhaveko. Leswi Yesu a swi sunguleke hi 33 C.E. ni leswi a swi yiseke emahlweni a ri etilweni ku sukela khale hi kona swi nga ta hetisisiwa.
Hikwalaho, u nga tshuki u lan’wa ku kombisa ku tlangela loku enteke eka hinkwaswo leswi Xikwembu na Kreste va swi endleke—ni leswi va ha hi endlelaka swona. Muapostola Pawulo u khutazile: “Nkarhi hinkwawo tsakani eHosini. . . . Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.”—Vafilipiya 4:4, 6, 7.
Ku ni ndlela ya nkoka yo kombisa ku tlangela ka wena Yesu Kreste, Mupfuni wa hina etilweni. Endzhaku ka ku pela ka dyambu, hi Ravunharhu, April 19, 2000, Timbhoni ta Yehovha emisaveni hinkwayo ti ta hlengeletana ti tlangela Xitsundzuxo xa rifu ra Kreste. (Luka 22:19) Lowu ku ta va nkarhi lowunene wo dzikisa ku tlangela ka wena gandzelo ra nkutsulo wa Kreste. Wa rhambiwa leswaku u va kona ni ku ta twa hi ndlela leyi lunghiselelo leri hlamarisaka ra Xikwembu ro ponisa hi ku tirhisa Kreste ri nga ku vuyerisaka ha yona hilaha ku nga heriki. Hi kombela u vutisa Timbhoni ta Yehovha endhawini ya ka n’wina malunghana ni nkarhi lowu nhlangano lowu wo hlawuleka wu nga ta khomiwa ha wona ni ndhawu ya kona.
[Xifaniso lexi nga eka tluka 7]
Yesu wa swi tiva leswaku swi njhani ku khongela Xikwembu hi mbilu hinkwayo
[Swifaniso leswi nga eka tluka 8]
Kreste u ta hi pfuna ku langutana ni swiphiqo leswikulu leswi loko hi ri hexe hi nga kotiki ku swi tlhantlha
[Xifaniso lexi nga eka tluka 9]
Kreste u hi pfuna hi ku tirhisa vakulu lava nga ni rirhandzu