“Mi Xaviwile Hi Nxavo”
“Mi xaviwile hi nxavo lowukulu; hikokwalaho, dzunisani Xikwembu hi miri wa n’wina.”—1 VAKORINTO 6:20.
1, 2. (a) I yini lexi pfuleke “tindlela ta ku humesa eku feni”? (b) I yini lexi a xi fanele ku endliwa ku endlela leswaku gandzelo ra Kriste ri faneleka hi nawu, tanihi leswi swi fanekiseriweke ha yini?
MUPISALEMA u te: “Xikwembu xa ntiyiso eka hina i Xikwembu xa mintirho yo ponisa, naswona tindlela ta ku huma eku feni i ta Yehova Hosi Leyikulu.” (Psalma 68:20, NW) Gandzelo ra Yesu Kriste ri pfule ndlela yoleyo. Kambe leswaku gandzelo rero ri va ra ntikelo enawini, Kriste a a fanele ku humelela hi xiviri emahlweni ka Xikwembu hi xoxe.
2 Leswi swi kombisiwe hi Siku ro Phahlelana Mariyeta loko muprista lonkulu a nghene eXikwetsimisisweni. (Levitika 16:12-15) Muapostola Pawulo u tsarile: “Kambe Kriste ú tile a ri Muprista Lonkulu . . . , u nghenile kan’we ntsena exivandleni lexo hlawuleka ngopfu, kutani a nga tekanga ngati ya timbuti ni ya marhole ku ya gandzela hi yona, kambe ú lo gandzela hi ngati ya yena, a hi kumela ha yona ku kutsuriwa loku nga heriki. Hikuva Kriste a nga nghenanga exivandleni lexo hlawuleka xo endliwa hi mavoko, lexi ngo va xifaniso ntsena xa lexa xiviri, kambe ú nghenile etilweni hi koxe, a ta humelela sweswi emahlweni ka Xikwembu ku hi yimela.”—Vaheveru 9:11, 12, 24.
Matimba Ya Ngati
3. (a) Ngati yi langutiwa njhani hi vagandzeri va Yehova, naswona ha yini? (b) I yini lexi kombisaka leswaku ngati yi na matimba ya le nawini ya ku rivalela swidyoho?
3 Ngati ya Kriste yi na xiphemu xihi eku ponisiweni ka hina? Ku sukela esikwini ra Nowa, vagandzeri va ntiyiso va langute ngati tanihi leyi kwetsimeke. (Genesa 9:4-6) Ngati yi endla xiphemu xa nkoka evuton’wini, hikwalaho Bibele yi ri “moya[-xiviri kumbe vutomi] wa nyama wu le ngatini.” (Levitika 17:11) Kutani Nawu wa Muxe a wu lava leswaku loko xiharhi xi endliwa gandzelo, ngati ya xona yi halatiwa emahlweni ka Yehova. Minkarhi yin’wana nakambe ngati a yi vekiwa ehenhla ka timhondzo ta altari. Entiyisweni, matimba yo rivalela ya gandzelo a ma ri engatini ya rona. (Levitika 8:15; 9:9) “Ehansi ka Nawu, hi nga ku hinkwaswo swi basisiwa hi ku cheriwa ngati, kutani ehandle ka ku halatiwa ka ngati ku hava ku rivaleriwa ka swidyoho.”—Vaheveru 9:22.
4. (a) I xikongomelo xihi lexi xi endliweke hi ku hika ka Xikwembu ka matirhiselo ya ngati? (b) I yini leswi a swi ri swa nkoka ehenhleni ka ndlela leyi Yesu a dlayiweke ha yona?
4 Kutani ke, a swi hlamarisi leswi ehansi ka Nawu ku tirhisiwa kwihi na kwihi ko biha ka ngati a ku xupuriwa hi rifu! (Levitika 17:10) Hinkwerhu ka hina ha swi tiva leswaku loko nchumu wu pfumaleka, kumbe wu hikiwile swinene eku wu tirhiseni, ntikelo wa wona wa andza. Vulawuri bya Yehova eku tirhisiweni ka yona wu tiyisekise leswaku ngati yi ta langutiwa, hayi tanihi nchumu wa nkoka lowu tolovelekeke, kambe tanihi lowu nga ni risima, lowu hlawulekeke. (Mintirho 15:29; Vaheveru 10:29) Leswi swi fambisane ni xikongomelo lexikulu lexi ngati ya Kriste a yi ta xi endla. Hi laha ku faneleke, u fe hi mukhuva lowu vangeleke leswaku ngati ya yena yi halatiwa. Xisweswo, a swi ri erivaleni leswaku Kriste a nga nyikelanga miri wa yena wa vumunhu kambe u halate moya-xiviri wa yena, a nyikela vutomi bya yena tanihi munhu la hetisekeke! (Esaya 53:12) Yesu a nga lahlekeriwanga hi lunghelo ra le nawini eka vutomi byebyo hikwalaho ka ku nga hetiseki, kutani ngati ya yena leyi halatiweke yi ve ni nkoka lowukulu naswona a yi ta nyikeriwa emahlweni ka Xikwembu leswaku ku rivaleriwa swidyoho swa vanhu.
5. (a) I yini leswi Kriste a swi yiseke etilweni, naswona ha yini? (b) A swi tikomba njhani leswaku Xikwembu xi amukele gandzelo ra Kriste?
5 Kriste a a nga ta yisa ngati ya yena ya xiviri etilweni. (1 Vakorinto 15:50) Ku ri na sweswo, u yise leswi ngati a yi swi fanekisela: nkoka wa le nawini wa vutomi bya yena lebyi nyikeriweke bya munhu la hetisekeke. Emahlweni ka Xikwembu hi xoxe, a a ta nyikela vutomi byebyo tanihi nkutsulo hikwalaho ka vanhu lava dyoheke. Ku amukela ka Yehova ka gandzelo rero ku ve erivaleni hi Pentekosta ya 33 C.E., loko moya lowo kwetsima wu te ehenhla ka vadyondzisiwa va 120 eYerusalema. (Mintirho 2:1-4) Hi ndlela yo fanekisela, Kriste, sweswi u lawula rixaka ra vanhu hi ntsengo. (Vagalatiya 3:13; 4:5; 2 Petro 2:1) Hikwalaho, mimbuyelo ya nkutsulo a yi ta khulukela eka vanhu.
Vo Sungula Lava Kumaka Mimpfuno Ya Nkutsulo
6. I malunghiselelo wahi lawa Xikwembu xi ma endleke eku tirhiseni ka mimpfuno ya nkutsulo wa Kriste?
6 Hambi swi ri tano, leswi a swi nga vuli swona leswaku vanhu a va ta nyikiwa ku hetiseka ka miri hi ku hatlisa, hikuva handle ka loko xivumbeko xa munhu xa vudyoho xi hluriwile, ku hetiseka ka miri a ku nga ta koteka. (Varhoma 7:18-24) Vudyoho a byi ta herisiwa njhani naswona rini? Xo sungula, Xikwembu xi lunghiselele ‘vaprista va le tilweni va Xikwembu va 144 000 leswaku va fuma tanihi tihosi emisaveni’ kun’we na Kriste Yesu. (Nhlavutelo 5:9, 10; 7:4; 14:1-3) Hi ku tirhisa vona, mimpfuno ya nkutsulo yi ta tirhisiwa eka vanhu hakantsongo-ntsongo ku tula nkarhi wa gidi ra malembe.—1 Vakorinto 15:24-26; Nhlavutelo 21:3, 4.
7. (a) I yini ntwanano lowuntshwa, i vamani lava hlanganyelaka eka wona, naswona i xikongomelo xihi lexi xi wu hetisisaka? (b) Ha yini rifu a ri fanele ku humelela leswaku ntwanano lowuntshwa wu koteka, naswona ngati ya Kriste yi endla xiphemu xihi?
7 Ku hetisisa sweswo, tihosi ni vaprista va 144 000 “va [kutsuriwa] exikarhi ka vanhu.” (Nhlavutelo 14:4) Leswi swi hetisisiwa hi “ntwanano lowuntshwa.” Ntwanano lowu i mpfumelelano exikarhi ka Yehova Xikwembu na Israyele wa moya wa Xikwembu wa leswaku swirho swa yena swi tirha tanihi tihosi ni vaprista. (Yeremia 31:31-34; Vagalatiya 6:16; Vaheveru 8:6-13; 1 Petro 2:9) Hambi swi ri tano, ntwanano exikarhi ka Xikwembu ni munhu la nga hetisekangiki wu koteka hi ndlela yihi? Pawulo wa hlamusela: “Laha ku nga na [ntwanano exikarhi ka Xikwembu ni munhu la nga hetisekangiki, rifu ra mutsari la nga munhu ri fanele ri hetisisiwa.] Hikuva [ntwanano wu] tirha ntsena loko mutsari wa [w]ona a nga ha ri kona, hikuva loko a ha hanya, [ntwanano] a [wu] koti ku tirha.”—Vaheveru 9:16, 17.
8, 9. Nkutsulo wu yelana ni ntwanano lowuntshwa hi ndlela yihi?
8 Hikwalaho, gandzelo ra nkutsulo ri hlawulekile eka ntwanano lowuntshwa, lowu Yesu a nga Muhlanganisi wa wona. Pawulo u tsarile: “Ku na Xikwembu xin’we, naswona ku ni [muhlanganisi] un’we loyi a hlanganisaka Xikwembu ni vanhu, yena Kriste Yesu munhu wa xiviri, loyi a tinyiketeke ku va mukutsuri wa vanhu hinkwavo; hi byona vumbhoni . . . lebyi nga humelela hi nkarhi lowu faneleke.” (1 Timotiya 2:5, 6) Marito wolawo ngopfu-ngopfu ma tirha eka lava va 144 000, lava ntwanano lowuntshwa wu endliwaka na vona.
9 Loko Xikwembu xi endle ntwanano na Israyele wa nyama, a wu nga tiyi hi ku ya hi nawu ku kondza ngati ya xiharhi yi halatiwa egandzelweni. (Vaheveru 9:18-21) Hi ku fanana, leswaku ntwanano lowuntshwa wu tirha, Kriste a a fanele ku halata “ngati ya ntwanano.” (Matewu 26:28; Luka 22:20) Loko Kriste a tirha tanihi Muprista Lonkulu ni ‘muhlanganisi wa ntwanano lowuntshwa,’ Xikwembu xi tirhisa ntikelo wa ngati ya Yesu eka lava va yisiwaka eka ntwanano lowuntshwa, xi va nyika ku lulama ka vanhu hi nawu. (Vaheveru 9:15; Varhoma 3:24; 8:1, 2) Kutani Xikwembu xi va nghenise eka ntwanano lowuntshwa leswaku va va tihosi ni vaprista va le tilweni! Tanihi Muhlanganisi ni Muprista Lonkulu wa vona, Yesu u va pfuna leswaku va hlayisa xiyimo lexi baseke emahlweni ka Xikwembu.—Vaheveru 2:16; 1 Yohane 2:1, 2.
Ku Hlengeleta Swilo eMisaveni
10, 11. (a) Nkutsulo wu hundza njhani eka Vakriste lava totiweke? (b) I vamani ntshungu lowukulu, naswona va na xiyimo xihi ni Xikwembu?
10 Xana i Vakriste lava totiweke ntsena lava va nga tokotaka ku ntshunxiwa hi nkutsulo, ku rivaleriwa ka swidyoho swa vona? E-e, Xikwembu xi vuyerisa swilo hinkwaswo leswin’wana eka xona hi ku endla ku rhula hi ku tirhisa ngati leyi halatiweke emhandzini ya nxaniso, hi laha Vakolosa 1:14, 20 yi kombisaka ha kona. Leswi swi katsa swilo leswi nge tilweni (lava va 144 000) kun’we ni swilo leswi nge misaveni. Lava va le ndzhaku hi lava va nga ta hanya la misaveni, vanhu lava nga ta tsakela vutomi lebyi hetisekeke aParadeyisini emisaveni. Ngopfu-ngopfu ku sukela hi 1935 ku ve ni matshalatshala lama tiyisiweke yo hlengeleta lavo tano. Nhlavutelo 7:9-17 yi va hlamusela tanihi “ntshungu lowukulu” lowu faneriwaka hi ku ponisiwa hi Xikwembu ni Xinyimpfana. Va ha lava ku pona “nhlomulo lowukulu” ivi va ‘yisiwa eswihlobyeni swa mati ya vutomi,’ hikuva Nhlavutelo 20:5 yi kombisa leswaku vanhu lavo tano va ta va lava hanyeke kahle, va ri na vutomi lebyi hetisekeke bya vanhu, eku heleni ka ku Fuma ka Gidi ra Malembe ka Kriste. Kutani lava ponaka ndzingo wo hetelela va ri eka xiyimo xa vona xa vumunhu lexi hetisekeke va ta vuriwa lava lulameke leswaku va kuma vutomi lebyi nga heriki emisaveni.—Nhlavutelo 20:7, 8.
11 Hambi swi ri tano, hi mpimo wo karhi, lava va ntshungu lowukulu ana se va “hlantswile tinguvu ta vona, va ti basisile hi ngati ya Xinyimpfana.” (Nhlavutelo 7:14) Kriste a nga tirhi tanihi Muhlanganisi wa ntwanano lowuntshwa eka vona, kambe va vuyeriwa eka ntwanano lowu hi ntirho wa Mfumo wa Xikwembu. Hambi swi ri tano, Kriste wa ha va tirhela tanihi Muprista Lonkulu, loyi ha yena Yehova a nyikelaka nkutsulo lerova sweswi va vuriwa lava lulameke tanihi vanghana va Xikwembu. (Ringanisa Yakobo 2:23.) Hi nkarhi wa Mfumo wa Gidi ra Malembe, hakantsongo-ntsongo va ta “ntshunxiwa . . . evuhlongeni bya leswo bola, [ku kondza eku heteleleni va] amukela ku ntshunxeka loko kwetsima loku ku nga ka vana va Xikwembu.”—Varhoma 8:21.
12. Hi le ka xisekelo xihi laha Xikwembu xi tirhisaneke ni vavanuna vo tshembeka eminkarhini ya le mahlweni ka Vukriste?
12 Malunghana ni xiyimo xa vona ni Xikwembu, swi nga ha tikomba onge lava va ntshungu lowukulu va hambana kantsongo ni vagandzeri va le mahlweni ka Vukriste. Hambi swi ri tano, Xikwembu xi tirhisane ni lava va le ndzhaku va ri karhi va langutele lunghiselelo ra nkutsulo wa nkarhi lowu taka. (Varhoma 3:25, 26) Va tsakele ku rivaleriwa swidyoho swa vona hi ndlela ya nkarhinyana ntsena. (Psalma 32:1, 2) Ematshan’wini ya ku va ntshunxa hi xitalo eka “swidyoho,” magandzelo ya swiharhi ma vangele ku “tsundzuxiwa swidyoho.”—Vaheveru 10:1-3.
13. I mimpfuno yihi leyi hi yi kumaka eka malandza ya Xikwembu ya le mahlweni ya Vukriste?
13 Swi hambanile hi Vakriste va ntiyiso namuntlha. Va gandzela exisekelweni xa nkutsulo lexi se xi hakeriweke! Hi Muprista wa vona Lonkulu, va ‘tshinela hi ku vulavula loku ntshunxekeke exiluvelweni xa tintswalo leti nga fanelangiki.’ (Vaheveru 4:14-16) Ku vuyelelana ni Xikwembu a hi xiendlakalo lexi languteriweke kambe i nchumu wa xiviri lowu nga kona sweswi! (2 Vakorinto 5:20) Loko va dyoha, va nga kuma ku rivaleriwa ka xiviri. (Vaefesa 1:7) Va tiphina hi ripfalo leri basisiweke hakunene. (Vaheveru 9:9; 10:22; 1 Petro 3:21) Mikateko leyi i xikombiso xa ntshunxeko wo kwetsima wa vana va Xikwembu lowu malandza ya Yehova ma nga ta tiphina ha wona nkarhi lowu taka!
Vuenti Bya Vutlhari Ni Rirhandzu Ra Xikwembu
14, 15. Nkutsulo wu kombisa vutlhari lebyi nga pimekiki bya Yehova, kun’we ni vunene ni rirhandzu ra yena hi ndlela yihi?
14 Mawaku nyiko leyi hlamarisaka swonghasi leyi humaka eka Yehova leyi nkutsulo wu nga yona! Wu twisiseka hi ku olova, kambe wu ente swinene lerova wu pfuxa ku chava emianakanyweni leyikulu. Ku pfuxeta ka hina ka matirhelo ya nkutsulo a ku nghenanga hi vuenti. Hambi swi ri tano, hi huwelela na muapostola Pawulo: “Vukosi bya Xikwembu, ni vutlhari bya xona, ni vutivi bya xona, a hi ku enta ka swona! Makungu ya xona ma nga pimisiwa ku yini, ni tindlela ta xona ti nga twisisiwa ku yini xana?” (Varhoma 11:33) Vutlhari bya Yehova byi kombisiwa hi leswi a swi koteke ku ponisa vanhu ni ku lwela vuhosi bya yena. Hi ku tirhisa nkutsulo, ‘vululami bya Xikwembu byi kombisiwile, Xikwembu xi hlamusele Kriste tanihi nyiko ya ku rivaleriwa ka swidyoho hi ku veka ripfumelo engatini ya yena.’—Varhoma 3:21-26.
15 A ku na xisolo lexi xi nga vekiwaka ehenhla ka Xikwembu hikwalaho ko rivalela swidyoho leswi endliweke enkarhini lowu hundzeke hi vagandzeri va le mahlweni ka Vukriste. Ku tlula kwalaho, a ku na xisolo lexi xi nga vekiwaka ehenhla ka Yehova hikwalaho ko vula leswaku vatotiwa va lulamile tanihi vana va yena kumbe ntshungu lowukulu tanihi vanghana va yena. (Varhoma 8:33) Hi ku lahlekeriwa lokukulu, Xikwembu a xi tirhisa nawu kumbe vunene hi ku hetiseka, eswiendlweni swa xona, xi kaneta ku mavunwa ya Sathana hi ku helela ya leswaku Yehova i mulawuri wo homboloka! Rirhandzu ra Xikwembu ro pfumala vutianakanyi eka swivumbiwa swa xona hi laha ku fanaka ri kombisiwe handle ko kanakana.—Varhoma 5:8-11.
16. (a) I ndlela yihi leyi nkutsulo wu yi nyikeleke yo tlhantlha mphikamakaneta ya vutshembeki bya malandza ya Xikwembu? (b) Nkutsulo wu hi nyika xisekelo xa ripfumelo eka misava leyintshwa leyi taka ya ku lulama hi ndlela yihi?
16 Ndlela leyi nkutsulo wu nyikeriweke ha yona nakambe yi tlhantlhe mimphikamakaneta leyi katsaka vutshembeki bya malandza ya Xikwembu. Ku titsongahata ka Yesu hi koxe ku hetisise sweswo. (Swivuriso 27:11; Varhoma 5:18, 19) Kambe ku engetela kwalaho, ndlela ya vutomi ya Vakriste va 144 000 lava, ku nga khathariseki nkaneto wa Sathana, va tshama va tshembekile ku fikela eku feni! (Nhlavutelo 2:10) Nkutsulo wu swi endla swi koteka eka lava ku amukela ku nga fi tanihi hakelo ya vona—vutomi lebyi nga onhakiki! (1 Vakorinto 15:53; Vaheveru 7:16) Leswi swi endla ku vula ka Sathana ka leswaku malandza ya Xikwembu a ma tshembekanga ku va vunwa! Nkutsulo nakambe wu hi nyike xisekelo lexi tiyeke xa ripfumelo eka switshembiso swa Xikwembu. Hi nga vona xivumbeko xa ku ponisiwa lexi xi ‘simekiweke enawini’ hi gandzelo ra nkutsulo. (Vaheveru 8:6) Xisweswo misava leyintshwa ya ku lulama yi tiyisiwile!—Vaheveru 6:16-19.
U Nga Kayeli Xikongomelo Xa Wona
17. (a) Van’wana va swi kombisa njhani leswaku va kayele xikongomelo xa nkutsulo? (b) I yini lexi xi nga hi susumetelaka leswaku hi tshama hi basile emahanyelweni?
17 Leswaku a pfuneka eka nkutsulo, swi fanerile leswaku munhu a nghenisa vutivi, a kombisa ripfumelo naswona a hanya hi mimpimanyeto ya Bibele. (Yohane 3:16; 17:3) Kambe ke, a hi vangani lava tsakelaka ku endla tano. (Matewu 7:13, 14) Hambi ku ri exikarhi ka Vakriste va ntiyiso, van’wana va nga ha ‘amukela tintswalo ta Xikwembu leti nga fanelangiki ivi va kayela xikongomelo xa tona.’ (2 Vakorinto 6:1) Hi xikombiso, hi malembe layo tala magidi ma tsemiwile hikwalaho ka ku tikhoma loko biha ka rimbewu. Vona tingana leti nga kona hikwalaho ka leswi Yehova na Kriste va hi endleleke swona! Xana ku tlangela nkutsulo a ku fanelanga ku susumetela munhu leswaku a papalata ku “rivala leswaku ú susiwile swidyoho swa yena swa khale”? (2 Petro 1:9) Kutani ke, hi laha ku faneleke, Pawulo u tsundzuxa Vakriste: “Mi xaviwile hi nxavo lowukulu; hikokwalaho, dzunisani Xikwembu hi miri wa n’wina.” (1 Vakorinto 6:20) Ku tsundzuka leswi swi hi nyika xikhutazo xa matimba leswaku hi tshama hi basile emahanyelweni!—1 Petro 1:14-19.
18. Mukriste loyi a welaka eka xidyoho lexikulu a nga ya emahlweni a tirhisa nkutsulo hi laha ku humelelaka hi ndlela yihi?
18 Ku vuriwa yini loko munhu se a wele eka xidyoho lexikulu? U fanele a tirhisa ku rivaleriwa loku nkutsulo wu ku endlaka ku koteka, a amukela mpfuno lowu humaka eka valanguteri lava nga ni rirhandzu. (Yakobo 5:14, 15) Hambi loko ndzayo ya matimba yi laveka, Mukriste la hundzukaka a nga fanelanga ku hela matimba ehansi ka ndzulamiso wo tano. (Vaheveru 12:5) Hi na xitiyisekiso lexi xi hlamarisaka xa Bibele: “Loko hi tivula swidyoho swa hina, Xikwembu xa tshembeka, xi avanyisa hi ku lulama, kutani xi ta hi rivalela swidyoho swa hina, xi hi hlantswa xi susa ku homboloka ka hina hinkwako.”—1 Yohane 1:9.
19. I langutelo rihi leri Mukriste a nga vaka na rona hi ku tikhoma ka yena loko biha loku endlekeke a nga si dyondza ntiyiso?
19 Nkarhi wun’wana Vakriste va hetiwa matimba hi laha ku nga fanelangiki hikwalaho ka ku tikhoma loko biha loku hundzeke. Makwerhu un’wana la heleke matimba u tsarile: “Ndzi nga si ta entiyisweni, mina ni nsati wa mina hi khomiwe hi vuvabyi bya nhlonge bya swirho swa rimbewu. Minkarhi yo tala hi titwa hi nga basanga, onge a hi ‘faneleki’ eka nhlengeletano leyi baseke ya Yehova.” Hambi swi ri tano, hambi ku ri endzhaku ka ku va Vakriste, van’wana va nga ha tshovela ku xaniseka lokukulu hikwalaho ka swihoxo swa nkarhi lowu hundzeke. (Vagalatiya 6:7) Hambi swi ri tano, a ku na xivangelo xa ku titwa a nga basanga emahlweni ka Yehova loko munhu a hundzukile. “Ngati ya Kriste” yi kota ku “basisa mapfalo ya hina emintirhweni leyi nga pfuniki nchumu.”—Vaheveru 9:14.
20. Ripfumelo eka nkutsulo ri nga ntshunxa Mukriste eka ku tivona nandzu loku nga fanelangiki hi ndlela yihi?
20 Ina, ripfumelo eka nkutsulo ri nga pfuna ku hi ntshunxa eka mindzhwalo ya nandzu lowu nga fanelangiki. Makwerhu un’wana wa xisati lontsongo u vurile a ku: “A ndzi ri karhi ndzi lwisana ni hanyelo lero biha ra ku tlanga hi swirho swa rimbewu ku tlula 11 wa malembe sweswi. Nkarhi wun’wana a ndzi lava ku siya bandlha, ndzi ehleketa leswaku Yehova a nge n’wi lavi munhu loyi a nyenyetsaka swonghasi leswaku a thyakisa bandlha ra yena.” Kambe ke, hi fanele hi tsundzuka leswaku Yehova u ni ‘vunene naswona wa rivalela’ loko hi lwisana ni vuhomboloki hi ku tiyimisela, hi nga tinyiketeli eka byona!—Psalma 86:5.
21. Nkutsulo wu fanele ku khumba langutelo ra hina eka lava va hi dyohelaka hi ndlela yihi?
21 Nkutsulo nakambe wu fanele wu khumba ndlela leyi hi hanyisanaka ni van’wana ha yona. Hi xikombiso, u hlamula njhani loko Mukriste-kuloni a ku dyohela? Xana u rivalela ku fana na Kriste hi ku ntshunxeka? (Luka 17:3, 4) Xana ‘wa tsetselela, u rivalela van’wana hi ku ntshunxeka tanihi leswi Xikwembu xi ku rivaleleke ha Kriste hi ku ntshunxeka’? (Vaefesa 4:32) Kumbe xana u tala ku va ni xikhomela ni ku karhateka? Entiyisweni sweswo a ku ta va ku kayela xikongomelo xa nkutsulo.—Matewu 6:15.
22, 23. (a) Nkutsulo wu fanele wu va ni nkucetelo wihi eka tipakani ni mahanyelo ya hina? (b) Vakriste va fanele va endla xiboho xihi malunghana ni nkutsulo?
22 Eku heteleleni, ku tlangela nkutsulo ku fanele ku va ni nkucetelo lowukulu eka tipakani ni mahanyelo ya hina. Pawulo u te: “Mi xaviwile hi nxavo lowukulu; mi nga vi mahlonga ya vanhu.” (1 Vakorinto 7:23) Xana swilaveko swa ikhonomi—kaya, ntirho, swakudya, swiambalo—swa ha ri yinhla ya vutomi bya wena? Kumbe xana u rhangisa Mfumo, u veka ripfumelo eka xitshembiso xa Xikwembu xa ku ku wundla? (Matewu 6:25-33) Xana u nga ha tirhela muthori wa wena kambe u tsandzeka ku endla nkarhi lowu ringaneke wa mintirho ya le tilweni? Tsundzuka, Kriste u “[tinyikete] hikwalaho ka hina, leswaku . . . a hi endla vanhu lava tengeke, lava va nga va yena ntsena, ni lava va chivirikelaka ku endla leswinene.”—Tito 2:14; 2 Vakorinto 5:15.
23 “A ku nkhensiwe Xikwembu ha Yesu Kriste” hikwalaho ka nyiko leyi yi tlakukeke—nkutsulo! (Varhoma 7:25) Hi nga tshuki hi kayela xikongomelo xa nkutsulo kambe hi wu pfumelela wu va nsusumeto wa matimba evuton’wini bya hina. Hi mianakanyo, hi rito na hi xiendlo, a hi dzuniseni Xikwembu nkarhi hinkwawo, hi tsundzuka hi ntsako leswaku hi xaviwile hi nxavo.
Swivutiso Swa Mpfuxeto
◻ Ha yini ngati yi langutiwa yi ri leyi kwetsimaka, naswona ngati ya Kriste yi nyikeriwe njhani emahlweni ka Yehova etilweni?
◻ I xiphemu xihi lexi ngati ya Kriste yi xi endleke eku lulamiseni ka ntwanano lowuntshwa?
◻ Nkutsulo wu pfuna lava totiweke ni ntshungu lowukulu hi ndlela yihi?
◻ Hi nga swi kombisa njhani leswaku a hi xi kayelanga xikongomelo xa nkutsulo?
[Xifaniso lexi nga eka tluka 16]
Matimba yo rivalela ya gandzelo ma le ngatini ya rona ya vutomi
[Xifaniso lexi nga eka tluka 17]
Munhu loyi a tlangelaka ku rivalela ka Xikwembu u tsakela ku rivalela van’wana