Ndlela Leyi Vandlha Ri Hleriwaka Ni Ku Kongomisiwa Ha Yona

EKA papila rakwe ro sungula leri a ri tsaleleke Vakorinto, muapostola Pawulo u boxe ntiyiso wa nkoka malunghana ni Xikwembu. Pawulo u tsale a ku: “Xikwembu a hi Xikwembu xa mpfilumpfilu, kambe i xa ku rhula.” Kutani loko a ya emahlweni a vulavula hi minhlangano ya vandlha, u te: “Swilo hinkwaswo a swi endliwe hi ku tenga ni hi ku hleleka.”—1 Kor. 14:33, 40.

² Eku sunguleni ka papila leri, muapostola u nyikela xitsundzuxo malunghana ni ku avana loku a tweke leswaku ku kona exikarhi ka vandlha ra le Korinto. Pawulo u khutaze vamakwerhu lava leswaku va “vulavula hi ku twanana” ni leswaku va “hlangana hilaha ku faneleke emianakanyweni yin’we ni le ndleleni yin’we ya ku ehleketa.” (1 Kor. 1:10, 11) Endzhaku, u nyikele ndzayo etimhakeni to hambana-hambana leti a ti onha vun’we bya vandlha. U endle xifaniso hi miri wa munhu, a swi veka erivaleni leswaku vun’we ni ntirhisano i nchumu wa nkoka. U kombele hinkwavo lava nga evandlheni ra Vukreste, leswaku va khathalelana hi rirhandzu, ku nga khathariseki leswaku hi xihi xikhundlha xa vona. (1 Kor. 12:12-26) Ntirhisano wo tano exikarhi ka lava nga evandlheni wu lava leswaku ku va ni ku hleleka ko karhi.

³ Kambe, xana vandlha ra Vukreste a ri ta hleriwa njhani? A ri ta hleriwa hi mani? A ri ta va ni xivumbeko xa njhani? I vamani lava a va ta byarhisiwa vutihlamuleri byo karhi? Loko ho pfumelela Bibele yi hi kongomisa, hi nga swi kota ku kuma tinhlamulo leti twisisekaka ta swivutiso leswi.—1 Kor. 4:6.

KU HLELEKA HI NDLELA YA XIKWEMBU

⁴ Vandlha ra Vukreste ri simekiwe hi siku ra Pentekosta ya 33 C.E. I yini leswi hi nga swi dyondzaka eka vandlha leri ra lembe-xidzana ro sungula? A ri hleriwe ri tlhela ri kongomisiwa hi ku landza milawu ya Xikwembu, leswi vulaka leswaku a ri fumiwa (Xigriki, kraʹtos) hi Xikwembu (the·osʹ). Marito wolawo mambirhi ma humelela eka 1 Petro 5:10, 11. Rungula leri huhuteriweke leri vulavulaka hi leswi swi humeleleke le Yerusalema kwalomu ka malembe ya 2 000 lama hundzeke, ri swi veka erivaleni leswaku vandlha ra Vukreste leri a ri vumbiwa hi vatotiwa a ri simekiwe hi Xikwembu. (Mint. 2:1-47) A ri ri muako wa xona, ndyangu wa xona. (1 Kor. 3:9; Efe. 2:19) Ku hleleka ni matirhelo lama simekiweke hi nkarhi wa Vakreste vo sungula, swa ha landzeleriwa ni namuntlha hi vandlha ra Vukreste.

⁵ Vandlha ro sungula ri sungule ri ri ni vadyondzisiwa va kwalomu ka 120. Moya lowo kwetsima wu sungule wu chuluriwa eka swona leswaku ku hetiseka Yuwele 2:28, 29. (Mint. 2:16-18) Kambe hi siku rero, vanhu van’wana va kwalomu ka 3 000 va khuvuriwile ematini kutani va tisiwa evandlheni ra vanhu lava tswariweke hi moya. Va amukele leswi va swi tweke malunghana na Kreste kutani “va hambeta va tinyiketela edyondzweni ya vaapostola.” Endzhaku ka sweswo, “Yehovha a a hambeta a va tisela lava ponisiwaka, siku ni siku.”—Mint. 2:41, 42, 47.

⁶ Vandlha ra le Yerusalema ri andze swinene lerova muprista lonkulu wa Vayuda a kala a vilela, a vula leswaku vadyondzisiwa se va tate muti hinkwawo wa Yerusalema hi dyondzo ya vona. Exikarhi ka vadyondzisiwa lavantshwa lava a va ri eYerusalema a ku ri ni vaprista vo tala lava nga Vayuda, lava veke swirho swa vandlha.—Mint. 5:27, 28; 6:7.

⁷ Yesu u te: “Mi ta va timbhoni ta mina eYerusalema swin’we ni le tikweni hinkwaro ra Yudiya ni le Samariya ni ku ya fika endhawini ya le kule swinene ya misava.” (Mint. 1:8) Leswi swi ve tano loko ku tlhekeke nxaniso lowukulu eYerusalema endzhaku ka ku fa ka Stefano, vadyondzisiwa lava a va tshama kwalaho va hangalake ni tiko hinkwaro ra Yudiya ni ra Samariya. Kambe kun’wana ni kun’wana laha va yeke kona, va hambete va twarisa mahungu lamanene ni ku endla vadyondzisiwa lava engetelekeke, ku katsa ni vanhu va le Samariya. (Mint. 8:1-13) Hi ku famba ka nkarhi, mahungu lamanene ma chumayeriwe swinene exikarhi ka vanhu lava nga yimbangiki, lava nga riki Vayuda naswona ku hundzuke vo tala. (Mint. 10:1-48) Ntirho lowu wo chumayela ni ku endliwa ka vadyondzisiwa vo tala, wu endle leswaku ku simekiwa mavandlha lamantshwa ehandle ka muti wa Yerusalema.—Mint. 11:19-21; 14:21-23.

⁸ Hi wahi malunghiselelo lawa ma endliweke ku tiyisekisa leswaku vandlha rin’wana ni rin’wana leri simekiwaka ri hleriwa ni ku kongomisiwa hi ndlela ya Xikwembu? Hi ku kongomisiwa hi moya wa Xikwembu, ku endliwe malunghiselelo ya leswaku ku va ni varisi lava khathalelaka ntlhambi. Eka mavandlha lawa Pawulo na Barnaba va ma endzeleke eka riendzo ra vona ro sungula ra vurhumiwa, va veke vakulu emavandlheni wolawo. (Mint. 14:23) Luka mutsari wa Bibele u hlamusele hi leswi ku vulavuriweke ha swona eka nhlangano lowu Pawulo a veke na wona ni vakulu va vandlha ra Efesa. Pawulo u te eka vona: “Nyikelani nyingiso eka n’wina vini ni le ka ntlhambi hinkwawo, lowu moya lowo kwetsima wu mi vekeke ku va valanguteri va wona, ku risa vandlha ra Xikwembu, leri xi ri xaveke hi ngati ya N’wana wa xona.” (Mint. 20:17, 28) A va fanelekela ku va vakulu hileswi a va fikelela swilaveko swa Matsalwa. (1 Tim. 3:1-7) Tito loyi a a tirha swin’we na Pawulo a a nyikiwe lunghelo ro veka vakulu emavandlheni ya le Kreta.—Tito 1:5.

⁹ Loko ku ya ku simekiwa mavandlha lama engetelekeke, vaapostola ni vakulu eYerusalema va hambete va langutela mavandlha hinkwawo ya Vukreste ya lembe-xidzana ro sungula. A va tirha tanihi huvo leyi fumaka.

¹⁰ Loko a tsalela vandlha ra le Efesa, muapostola Pawulo u hlamusele leswaku loko vandlha ra Vukreste ro tirha hi ku pfumelelana ni moya wa Xikwembu, ri ta va ni vun’we hi ku titsongahata ehansi ka vunhloko bya Yesu Kreste. Muapostola loyi u khutaze Vakreste va kwalaho leswaku va hlakulela moya wa ku titsongahata ni ku hlayisa “vun’we bya moya” hi ku va ni ku rhula ni vanhu hinkwavo evandlheni. (Efe. 4:1-6) Hiloko a tshaha Pisalema 68:18 kutani a yi tirhisa eka ndlela leyi Yehovha a endleke malunghiselelo ya leswaku vavanuna lava fanelekaka hi tlhelo ra moya, va tirhela vandlha ha yona tanihi vaapostola, vaprofeta, vavuri va evhangeli, varisi ni vadyondzisi. Vavanuna vo tano, lava nga tinyiko leti humaka eka Yehovha, a va ta aka vandlha hinkwaro leswaku ri tiya emoyeni leswi a swi ta tsakisa Xikwembu.—Efe. 4:7-16.

MAVANDLHA YA NAMUNTLHA MA LANDZELA XIKOMBISO XA VAAPOSTOLA

¹¹ Namuntlha mavandlha hinkwawo ya Timbhoni ta Yehovha ma landzela xikombiso lexi fanaka. Mavandlha hinkwawo loko ma hlanganile, ma vumba vandlha rin’we ra misava hinkwayo, leri kongomisiwaka hi vamakwerhu lava totiweke hi moya. (Zak. 8:23) Yesu Kreste u endla leswaku leswi swi koteka. Hilaha a tshembiseke hakona, u tshame a tshembekile a ri ni vadyondzisiwa vakwe lava totiweke “masiku hinkwawo ku fikela emakumu ka mafambiselo ya swilo.” Lava va veke xiphemu xa vandlha leri, leri kulaka namuntlha, va amukela mahungu lamanene ya Xikwembu, va tinyiketela ku tirhela Yehovha hi mbilu hinkwayo, kutani va khuvuriwa va va vadyondzisiwa va Yesu. (Mat. 28:19, 20; Mar. 1:14; Mint. 2:41) Va teka Yesu Kreste a ri yena “murisi lonene,” a ri Nhloko ya ntlhambi hinkwawo, lowu vumbiwaka hi Vakreste lava totiweke swin’we ni “tinyimpfu tin’wana.” (Yoh. 10:14, 16; Efe. 1:22, 23) ‘Ntlhambi lowu wun’we’ wu tshama wu ri ni vun’we hikwalaho ko amukela vunhloko bya Kreste hi ku tshembeka ni hi ku titsongahata eka nkongomiso wa nhlangano, ku nga “hlonga ro tshembeka ni ro tlhariha,” leri vekiweke hi Kreste. Onge hi nga hambeta hi yi tshemba swinene namuntlha.—Mat. 24:45.

KU TIRHISIWA KA MAVANDLA YA SWA VUKHONGERI

¹² Leswaku ku phameriwa swakudya swa moya hi nkarhi lowu faneleke ni ku endla leswaku mahungu lamanene ya Mfumo ma chumayeriwa makumu ma nga si fika, ku simekiwe mavandla yo karhi. Mavandla lawa ya le nawini ma tiveka eka milawu ya matiko yo hambana-hambana naswona ma tirhisana. Ma tirhiseriwa ku hatlisisa ntirho wo chumayela mahungu lamanene emisaveni hinkwayo.

NDLELA LEYI RHAVI RI HLERIWEKE HA YONA

¹³ Loko ku simekiwa rhavi, ku vekiwa Komiti ya Rhavi leyi vumbiwaka hi vakulu vanharhu kumbe ku tlula, leswaku yi khathalela vutihlamuleri byo hambana-hambana lebyi fambisanaka ni ku langutela ntirho etikweni kumbe ematikweni lama nga ehansi ka rhavi rero. Xirho xin’we xa komiti leyi xi va muhlanganisi wa Komiti ya Rhavi.

¹⁴ Mavandlha lama nga ehansi ka rhavi ha rin’we ma hleriwa ma va miganga. Swifundzha ni miganga swi nga ha hambana hi vukulu hi ku ya hi mpfhuka ni tindzimi leti nga kona swin’we ni nhlayo ya mavandlha lama nga endhawini leyi averiweke rhavi. Mulanguteri wa muganga u averiwa ku endzela mavandlha eka muganga wun’wana ni wun’wana. Rhavi ri nyika mulanguteri wa muganga nkongomiso wa ndlela leyi a nga wu endlaka ha yona ntirho wakwe.

¹⁵ Mavandlha ma wu amukela nkongomiso lowu tanihi leswi wu endleriweke ku pfuna hina hinkwerhu. Ma ku amukela ku hlawuriwa ka vakulu lava langutelaka ntirho emarhavini, emigangeni ni le mavandlheni. Ma titshege hi swakudya swa moya leswi fikaka hi nkarhi lowu faneleke, leswi humaka eka hlonga ro tshembeka ni ro tlhariha. Kasi hlonga ro tshembeka namuntlha ri yingisa swinene vunhloko bya Kreste, ri namarhela misinya ya milawu ya Bibele naswona ri titsongahatela nkongomiso wa moya lowo kwetsima. Loko hinkwerhu ka hina hi tirha hi vun’we, hi tiphina hi vuyelo lebyi fanaka ni lebyi Vakreste va lembe-xidzana ro sungula va veke na byona: “Hikokwalaho, hakunene mavandlha a ma ya ma tiyisiwa eripfumelweni ni ku andza hi nhlayo siku rin’wana ni rin’wana.”—Mint. 16:5.