XIYENGE 1
“Leyi Lahlekeke Ndzi Ta Yi Lavisisa”
Nyimpfu yi lahlekile. Loko yi ri karhi yi dya byanyi, yi ye ekule yi hambana ni letin’wana. Kutani sweswi a ya ha ti voni letin’wana hambi ku ri murisi. Dyambu se ri nghene etintshaveni. Yi lahleke enhoveni laha ku nga ni swivandzana naswona a yi koti ku tilwela. Eku heteleleni yi twa rito leri yi ri toloveleke—rito ra murisi, loyi a tsutsumelaka eka yona kutani a fika a yi tlakula, a yi funengeta hi nguvu kutani a muka na yona.
YEHOVHA u tifanisa ni murisi yoloye hi ku phindhaphindha. ERitweni rakwe u hi tiyisekisa leswi: “Mina, ndzi ta lavisisa tinyimpfu ta mina, ndzi ti langutela.”—Ezekiyele 34:11, 12.
“Tinyimpfu Ta Madyelo Ya Mina”
Tinyimpfu ta Yehovha i vamani? Tinyimpfu ta Yehovha i vanhu lava va n’wi rhandzaka ni ku n’wi gandzela. Bibele yi ri: “A hi gandzeleni, hi nkhinsama; a hi nkhinsameni emahlweni ka Yehovha Muendli wa hina. Hikuva i Xikwembu xa hina, naswona hina hi vanhu va madyelo ya yena ni tinyimpfu ta voko rakwe.” (Pisalema 95:6, 7) Ku fana ni tinyimpfu ta xiviri leti landzelaka murisi, vagandzeri va Yehovha va hisekela ku landzela Murisi wa vona. Xana leswi swi vula leswaku a va na swihoxo? Doo! Minkarhi yin’wana malandza ya Xikwembu ma fane ni ‘tinyimpfu leti hangalekeke,’ “tinyimpfu leti lahlekeke” ni ‘tinyimpfu leti pepetsekeke.’ (Ezekiyele 34:12; Matewu 15:24; 1 Petro 2:25) Nilokoswiritano, loko munhu a tshika nhlengeletano, minkarhi hinkwayo Yehovha u ni ntshembo wa leswaku u ta tlhela a vuya.
Xana wa ha teka Yehovha tanihi Murisi wa wena? Namuntlha Yehovha u tikombisa a ri Murisi hi ndlela yihi? Xiya tindlela tinharhu:
Wa hi wundla hi tlhelo ra moya. Yehovha u ri: “Ndzi ta ti wundlela emadyelweni lamanene . . . Ti ta etlela kona endhawini leyinene yo tshama eka yona, naswona ti ta dyela emadyelweni yo nona.” (Ezekiyele 34:14) Yehovha a nga si tshama a tsandzeka ku hi nyika swakudya swa moya leswi phyuphyisaka swo hambanahambana hi nkarhi lowu faneleke. Xana wa ha xi tsundzuka xihloko, nkulumo kumbe vhidiyo leyi hlamuleke xikhongelo xa wena loko u kombela mpfuno? Xana sweswo a swi ku khorwisanga leswaku Yehovha wa khathala ha wena?
Wa hi sirhelela ni ku hi seketela. Yehovha u tshembisa leswi: “Leyi hambukeke ndzi ta yi vuyisa, leyi tshovekeke ndzi ta yi bohelela, leyi vabyaka ndzi ta yi tiyisa.” (Ezekiyele 34:16) Yehovha u tiyisa lava tsaneke kumbe lava tshikileriweke. U bohelela tinyimpfu takwe, a ti pfuna leswaku ti hola loko ti vavisekile—hambiloko ti twisiwe ku vava hi vapfumerikulobye. Nakambe u vuyisa lava tshikeke nhlengeletano ni lava karhatiwaka hi ku va ni langutelo leri hoxeke.
Wa hi khathalela. Yehovha u ri: “Ndzi ta ti kutsula etindhawini hinkwato leti ti hangalakeleke eka tona . . . Leyi lahlekeke ndzi ta yi lavisisa.” (Ezekiyele 34:12, 16) Eka Yehovha, nyimpfu leyi lahlekeke a hi munhu loyi ku nga riki na ntshembo wa leswaku u ta cinca. Wa swi tiva loko nyimpfu yi lahlekile, wa yi lava kutani a tsaka loko a yi kuma. (Matewu 18:12-14) Phela Yehovha u vitana malandza yakwe ya ntiyiso leswaku i ‘tinyimpfu takwe, tinyimpfu ta madyelo yakwe.’ (Ezekiyele 34:31) U yin’wana ya tinyimpfu teto.
Eka Yehovha, nyimpfu leyi lahleke a hi munhu loyi ku nga riki na ntshembo wa leswaku u ta cinca. Wa tsaka loko nyimpfu yoleyo yi kumeka
“Hi Tisele Masiku Lamantshwa Ku Fana Ni Khale Swinene”
Ha yini Yehovha a ku lavisisa naswona a ku rhamba leswaku u tlhelela eka yena? Hikuva u lava leswaku u tsaka. U tshembisa leswaku ‘mikateko yi ta na ku fana ni mpfula’ eka tinyimpfu takwe. (Ezekiyele 34:26) Xitshembiso xexo a hi xa hava. Ana se u byi vonile vumbhoni byebyo.
Tsundzuka mintokoto leyi u veke na yona ku sukela loko u tive Yehovha. Hi xikombiso, u titwe njhani loko u ta va u dyondze hi vito ra Xikwembu ni hi xikongomelo xa xona hi vanhu? Xana wa ha yi tsundzuka ndlela leyi a swi tsakisa ha yona ku va u hlangana swin’we ni Vakrestekulobye etinhlengeletanweni? Loko u chumayela munhu loyi a tsakelaka hi mbilu hinkwayo mahungu lamanene, xana a wu nga yi ekaya u tsakile ni ku titwa u enerisekile swinene?
U nga swi kota ku tlhela u va ni ntsako lowu a wu ri na wona eku sunguleni. Malandza ya Xikwembu ya le nkarhini lowu hundzeke ma khongele ma ku: “Oho Yehovha, hi vuyise eka wena, kutani hi ta vuya hi ku hatlisa. Hi tisele masiku lamantshwa ku fana ni khale swinene.” (Swirilo 5:21) Yehovha u xi hlamurile xikhongelo xexo naswona vanhu vakwe va tlhelele eka yena va tlhela va va ni ntsako. (Nehemiya 8:17) Yehovha u ta endla hilaha ku fanaka ni le ka wena.
Hambiswiritano ku tlhelela eka Yehovha a swi olovi. Xiya swiphiqo swin’wana leswi nga vaka kona loko u lava ku tlhelela eka Yehovha ni ndlela leyi u nga swi hlulaka ha yona.