Swivono Swa Tiko Leri Tshembisiweke

Endzela Tiko, Endzela Tinyimpfu!

MAGIDI ya Vakriste ma endzerile Tiko leri Tshembisiweke, va ehleketa leswaku ku vona tindhawu leti swiendlakalo swi nga humelela eka tona swi ta va pfuna ku twisisa Bibele, swi endla leswaku yi va ya nkoka swinene. Naswona swi ve tano.

Hambi u endzile hi xiviri kumbe u endzile hi miehleketo hi ku dyondza tibuku ni swihloko hi ta tiko rero, ku vuriwa yini hi ku endzela tinyimpfu? U nga ha tivutisa u ku ‘Xana tinyimpfu ti fambisana njhani ni Tiko leri Tshembisiweke?’ Kahle-kahle, tinyimpfu a a ti ri xiphemu lexikulu xa vutomi eminkarhini ya Bibele lerova ku endzela Tiko leri Tshembisiweke, hi laha ku twalaka, a ku helelanga loko ku nga katsiwanga ni ku endzela tinyimpfu.

Swifaniso leswi u swi vonaka laha swi nga va xiphemu xa riendzo ra wena, tanihi leswi tinyimpfu leti nga voniwaka exivandleni lexi namuntlha ti fanaka swinene ni leti a ti tolovelekile enkarhini wa Bibele.a Ncila wa tona lowo anama wa tika hi mafurha. (Levitika 7:3; 9:19) Voya lebyo tsindziyela hakanyingi hi lebyo basa. Kambe tsundzuka leswaku ntlhambi wa Yakobo lowukulu a wu katsa ni “le’ši nga ni mav̌ala ni mav̌alav̌ala ni . . . le’ša ntima e šikari ka ŝinyimpfana.”—Genesa 30:32.

Mhaka leyi yi fanaka yi kombisa leswaku munhu loyi a a ri ni ntlhambi lowukulu a a xiyiwa a ri la fuweke. (Genesa 30:43) Hi hlaya hi ta Yobo: “Ŝifuwo ŝa yena a ti ri tinyimpfu ta 7 000, ni tikamela ta 3 000, ni tihomu le’ti ringanaka madžoko ya 500, ni timbongolo ta matŝele ta 500 . . . [A a] tlula v̌av̌anuna hikwav̌o v̌a le v̌ušeni hi v̌ukulu.” (Yobo 1:3; 42:12) Kumbe tsundzuka leswaku Nabala a a ri ni tinyimpfu ta 3 000 ni timbuti ta 1 000. U anakanya leswaku xikhundla ni nkucetelo wa yena a swi ri swihi enkarhini wa Davhida? (1 Samuel 25:2) Kambe kahle-kahle hikwalaho ka yini ntlhambi lowukulu a wu endla rifuwo lerikulu?

A ku ri hikwalaho ka leswi tinyimpfu a ti nyikela murisi kumbe n’wini wa tona mimbuyelo ya nkoka. Voya hi byoxe a ku ri rifuwo leri humelelaka. Swivuriso 31:13, 21, 22 yi hi pfuna ku vona ndlela leyi wansati wa vutlhari, la gingiritekaka a a kota ku tirhisa voya byebyo ha yona ku endlela ndyangu wakwe swiambalo kumbe tinguvu leti nga xavisiwaka. (Yobo 31:20) Voya a a ku ri nchumu wa nkoka ebindzwini. Sweswo swi kombisiwa hi nhlamuselo ya leswaku hosi ya Mowabu “[a yi] fuwa tinyimpfu; kutani a ṭhama a humesela hosi ya Israel e nḍuv̌o wa ŝinyimpfana ŝa 100 000 ni tinyimpfu ta 100 000 ŝi ri ni voya bya ŝona.” (2 Tihosi 3:4) Ina, a ti ri tinyimpfu leti nga ni “v̌oya;” voya bya tona lebyo tala byi engetele ntikelo wa tona.

Tinyimpfu ta xinuna, makhuna, ti nga va ni timhondzo letikulu, tanihi leti nga eka xifaniso lexi nga exineneni. Xana leswi a swi ku tsundzuxi leswaku rimhondzo ra khuna a a ri tirhisiwa ku tivisa Yubili? (Levitika 25:8-10) Timhondzo leti fanaka leti khotsekeke a ti tirhisiwa ku ba hungwe kumbe ku kongomisa mavuthu ya nyimpi.—Vaavanyisi 6:34; 7:18, 19; Yoel 2:1.

Hi laha ku twisisekaka, loko u ri ni ntlhambi wa tinyimpfu, a wu tiyiseka leswaku u na swakudya leswinene hikuva tinyimpfu a ti ri exikarhi ka swifuwo leswi tengeke leswi a swi dyiwa hi Vaisrayele. (Deuteronoma 14:4) Nyama (ya nyimpfu kumbe ya xinyimpfana) a yi swekiwa hi mati kumbe yi oxiwa. Nyimpfu leyi oxiweke a yi ri nchumu wa nkoka eka Paseka ya lembe na lembe. (Eksoda 12:3-9) Tinyimpfu nakambe a ti nyikela masi nkarhi na nkarhi, lawa a ya tirhiseriwa ku nwa, ni ku endla chizi.—1 Samuel 17:17, 18; Yobo 10:10; Esaya 7:21, 22.

Hambi ku ri ku endzela tinyimpfu a ku ta va ku nga helelanga handle ko xiya vun’we lebyikulu exikarhi ka ntlhambi ni murisi wa wona. Murisi la tshembekaka a a hlayisa tinyimpfu ta yena. Tanihi laha Yesu a vuleke ha kona, a ti tiva rito ra murisi wa tona kutani ti angula loko a ti vitana hi mavito. (Yohane 10:3, 4) Loko yin’wana yi nga ri kona, murisi la nga ni vuxiya-xiya a a yi lava. Loko a yi kumile nyimpfu leyi lahlekeke, a a yi veka emakatleni ya yena kutani a yi tlherisela eka ntlhambi.—Luka 15:4, 5.

Davhida u tirhise ntokoto wa yena n’wini ni ntlhambi loko a tifanisa ni nyimpfu leyi Murisi wa yona a nga Yehova. Davhida u sirheleriwile, hi laha tinyimpfu a ti sirheleriwa ha kona eka swiharhi leswi hlaselaka. Tinyimpfu ti nga landzela vurhangeri bya murisi wa tona la khathalelaka. Loko ti vaviseka, a a ti ongola, kumbexana hi mafurha yo swoswela. Vona ku hambana ni swiendlo swa vutianakanyi swa varhangeri va Israyele, leswi hlamuseriweke eka Ezekiel 34:3-8!

Bibele yi na tinhlamuselo to tala ta vuprofeta ni ta swifanekiselo swa tinyimpfu. Kutani ke, ku endzela ka wena tinyimpfu ta Tiko leri Tshembisiweke ni ku tolovelana na tona ku nga kurisa matwisiselo ya wena ya marito yo tanihi “ntlhambinyana,” “Xinyimpfana xa Xikwembu” ni “tinyimpfu tin’wana.”—Luka 12:32; Yohane 1:36; 10:16.

[Nhlamuselo ya le hansi]

[Laha Xifaniso Xi Humaka Kona eka tluka 24]

Pictorial Archive (Near Eastern History) Est.

[Laha Xifaniso Xi Humaka Kona eka tluka 25]

Garo Nalbandian