Murisi Lonene Ni Matshanga Ya Tinyimpfu

Loko Yesu a ya emahlweni a dyondzisa eYudiya, u vulavula hi nchumu lowu vayingiseri va yena va wu tivaka kahle, ku nga tinyimpfu ni matshanga ya tona. Kambe u vulavula hi ku tirhisa xifaniso. Swi nga endleka Vayuda va ri ku tsundzukeni ka marito ya Davhida lama nge: “Yehovha i Murisi wa mina. A ndzi nge pfumali nchumu. U ndzi wisisa emadyelweni lama nga ni byanyi byo tala.” (Pisalema 23:1, 2) Eka pisalema yin’wana, Davhida u rhambe tiko a ku: “A hi khinsameni emahlweni ka Yehovha Muendli wa hina. Hikuva i Xikwembu xa hina, hina hi vanhu va madyelo ya yena.” (Pisalema 95:6, 7) I khale Vaisrayele lava nga ehansi ka Nawu va fanisiwa ni ntlhambi wa tinyimpfu.

I khale “tinyimpfu” leti ti ri “etshangeni ra tinyimpfu” hikuva ti tswaleriwe ehansi ka Nawu wa ntwanano wa Muxe. Nawu wolowo wu fana ni darata leyi va hambanisaka ni vanhu lava nga tswaleriwangiki ehansi ka nawu, ku nga lava endlaka mikhuva leyi thyakeke. Hambiswiritano, Vaisrayele van’wana a va xanisa ntlhambi wa Xikwembu. Yesu u ri: “Hakunene ndzi tiyisile ndzi ri eka n’wina, munhu loyi a nga ngheniki hi nyangwa etshangeni ra tinyimpfu kambe a nghena hi kun’wana, i khamba ni muphangi. Kambe loyi a nghenaka hi nyangwa hi yena murisi wa tinyimpfu.”—Yohane 10:1, 2.

Vanhu va nga ha ehleketa hi vavanuna lava a va ti vula Mesiya kumbe Kreste. Vavanuna volavo va fana ni vayivi ni vaphangi. Vanhu a va fanelanga va landzela vakanganyisi volavo. Ku ri ni sweswo, va fanele va landzela “murisi wa tinyimpfu,” loyi Yesu a vulavuleke ha yena a ku:

“Murindzi wa nyangwa wa n’wi pfulela, kutani tinyimpfu ti yingisa rito rakwe. U ti vitana hi mavito, a ti humesa. Loko a ti humesile hinkwato leti nga ta yena, u famba emahlweni ka tona, kutani ti n’wi landzela, hikuva ti tiva rito rakwe. A ti nge n’wi landzeli munhu un’wana, ti ta baleka hikuva a ti ri tivi rito rakwe.”—Yohane 10:3-5.

Eku sunguleni, Yohane Mukhuvuri ku fana ni murindzi wa nyangwa, u tivise Yesu a ri yena loyi tinyimpfu to fanekisela leti nga ehansi ka Nawu ti faneleke ti n’wi landzela. Hikwalaho, tinyimpfu tin’wana eGaleliya ni kwala Yudiya, ti ri tivile rito ra Yesu. Xana u ta ‘ti yisa kwihi’ naswona ti ta vuyeriwa hi yini loko ti n’wi landzela? Vanhu van’wana lava yingiseleke xifaniso lexi va nga ha hlamala hikuva a ‘va swi twisisi leswi a va byelaka swona.’—Yohane 10:6.

Yesu u hlamusela a ku: “Hakunene ndzi tiyisile ndzi ri eka n’wina, hi mina nyangwa leyi tinyimpfu ti nghenaka ha yona. Hinkwavo lava tiendlaka mina i makhamba ni vaphangi; kambe tinyimpfu a ti nge va yingisi. Hi mina nyangwa; loyi a nghenaka hi mina u ta ponisiwa naswona u ta kota ku nghena a tlhela a huma a kuma ni madyelo lamanene.”—Yohane 10:7-9.

Swi le rivaleni leswaku Yesu u ta ni nchumu wun’wana lowuntshwa. Vayingiseri vakwe va swi tiva leswaku a hi yena nyangwa wo nghena eka ntwanano wa Nawu, lowu veke kona madzana ya malembe. Swi nga endleka a vula leswaku tinyimpfu leti ‘a ti rhangelaka’ ti ta nghena eka tshanga rin’wana ra tinyimpfu. Ti ta vuyeriwa njhani?

Loko a ya emahlweni a hlamusela ntirho wakwe, Yesu u ri: “Mina ndzi tile leswaku tinyimpfu ti ta kuma vutomi lebyi nga heriki. Ndzi murisi lonene; murisi lonene u nyikela vutomi byakwe hikwalaho ka tinyimpfu takwe.” (Yohane 10:10, 11) Yesu wa ha ku khongotela vadyondzisiwa vakwe a ku: “Mi nga chavi n’wina va ntlhambinyana, hikuva Tata wa n’wina u tsakele ku mi nyika Mfumo.” (Luka 12:32) Kunene lava vumbaka “ntlhambinyana” hi vona lava Yesu a nga ta va rhangela a va nghenisa etshangeni lerintshwa ra tinyimpfu leswaku ‘va va ni vutomi naswona va va na byona hi xitalo.’ Mayana nkateko wo va un’wana wa ntlhambi wolowo!

Hambiswiritano, Yesu a nga yi gimeti kwalaho mhaka leyi. U ri eka vona: “Ndzi ni tinyimpfu tin’wana, leti nga riki ta tshanga leri; na tona ndzi fanele ndzi ti tisa, ti ta yingisa rito ra mina, ti va ntlhambi wun’we ni murisi a va un’we.” (Yohane 10:16) ‘Tinyimpfu leti letin’wana’ a hi “ta tshanga leri.” Leswi vulaka leswaku ti fanele ti ri ta tshanga rin’wana leri hambaneke ni leri ra “ntlhambinyana,” ku nga lava va nga ta nyikiwa Mfumo. Matshanga lawa mambirhi ya tinyimpfu, a ma yi endhawini yin’we. Nilokoswiritano, tinyimpfu leti nga ematshangeni lawa mambirhi ti ta vuyeriwa eka gandzelo ra Yesu. U ri: “Hi swona swi endlaka leswaku Tatana a ndzi rhandza, hikuva ndzi nyikela vutomi bya mina.”—Yohane 10:17.

Vo tala eka ntshungu wolowo va ri: “U ni dimona naswona wa penga.” Kambe van’wana va n’wi yingiserisisa naswona va swi lava ku landzela Murisi Lonene. Va ri: “Leswi a swi vulaka a swi nge vuriwi hi munhu loyi a nga ni dimona. Xana dimona ri nga swi kota ku hanyisa ri pfula matihlo ya lava nga voniki?” (Yohane 10:20, 21) Swi le rivaleni leswaku va vulavula hi singita leri Yesu a ha ku ri endla ra ku horisa wanuna loyi a velekiweke a fe mahlo.