Bibele Yi Nga Ndzi Pfuna Njhani?

A WU TA ENDLA YINI?

Ehleketa hi xiyimo lexi: David u famba hi movha endhawini leyi a swi xiyaka leswaku a nga yi tivi. Loko a languta mimfungho ya le xitarateni ni swilo swin’wana wa swi xiya leswaku a a nga fanelanga a ri endhawini yoleyo. David wa swi xiya leswaku u lahlekile. U fanele a jike endhawini leyi a a nga fanelanga a jike eka yona.

Loko a wu ri David a wu ta endla yini?

EHLEKETISISA HI MHAKA LEYI!

U nga teka rin’wana ra magoza lawa:

1. U nga vutisa van’wana.

2. U nga tirhisa mepe kumbe u tirhisa GPS.

3. U nga ya emahlweni u chayela, u ri ni ntshembo wa leswaku u ta fika laha u yaka kona.

Swi le rivaleni leswaku Goza C a ri nge ku pfuni hi nchumu.

Goza B ri antswela goza A. Phela eriendzweni ra wena hinkwaro u ta va u ri ni mepe kumbe GPS, leswi nga ta ku pfuna ku fika laha u yaka kona.

Bibele yi nga ku pfuna hi ndlela leyi fanaka!

Buku leyi, leyi xavisiwaka swinene yi nga

• ku kongomisa loko u langutane ni swiphiqo

• ku pfuna leswaku u titiva naswona u va munhu wo antswa

• ku pfuna leswaku u hanya vutomi lebyi tsakisaka swinene

YI HLAMULA SWIVUTISO SWA NKOKA EVUTON’WINI

Loko hi sungula ku dyondza ku vulavula, hi vutisa swivutiso.

• Ha yini tilo ri ri ra wasi?

• Tinyeleti ti endliwe hi yini?

Loko se hi kurile hi sungula ku vutisa swivutiso malunghana ni misava leyi hi hanyaka eka yona.

• Ha yini ku endleka swilo swo biha?

• Ha yini vanhu va fa?

Ku vuriwa yini loko ku ri leswaku tinhlamulo ta swivutiso swoleswo i khale ti ri kona eBibeleni?

Vanhu vo tala va vula leswaku eBibeleni ko va ni mintsheketo ntsena, leswaku yi hundzeriwe hi nkarhi kumbe swa tika ku yi twisisa. Kambe xana Bibele yi ni xiphiqo kumbe hi leswi vanhu va swi tweke malunghana na Bibele leswi nga xiphiqo? Xana va nga va va xisiwile?

Hi xikombiso, vanhu va anakanya leswaku Bibele yi vula leswaku Xikwembu hi xona xi fumaka misava. Swi nga endlekisa ku yini sweswo? Misava leyi a yi lawuleki! Ku ni switlhavi ni ku xaniseka, vuvabyi ni rifu, vusweti ni makhombo. Swi nga endlekisa ku yini leswaku Xikwembu lexi nga ni rirhandzu xi vanga swilo leswi hinkwaswo?

Xana u nga swi tsakela ku tiva nhlamulo ya xivutiso lexi? Leswi Bibele yi swi vulaka hi loyi a fumaka misava swi nga ha ku hlamarisa!

A swi kanakanisi leswaku u swi xiyile leswaku xitsundzuxo lexi kumekaka eka broxara leyi xi sekeriwe eBibeleni. Timbhoni ta Yehovha ta tiyiseka leswaku Bibele i nkongomiso lowu tshembekaka. Sweswo swi endliwa hi leswi yi ‘huhuteriweke hi Xikwembu naswona yi pfunaka ku dyondzisa, ku tshinya, ku lulamisa swilo.’ (2 Timotiya 3:16, 17) U ta vuyeriwa loko u hlaya buku leyi ya khale, kambe leya ha hi pfunaka ninamuntlha!