Xana U Yi Teka Njhani Bibele?

LESWI BIBELE YI SWI VULAKA

“Matsalwa hinkwawo ma huhuteriwe hi Xikwembu.”—2 Timotiya 3:16, Vuhundzuluxeri Bya Misava Leyintshwa.

NDLELA LEYI SWESWO SWI NGA KU VUYERISAKA HA YONA

SU ta kuma tinhlamulo leti enerisaka ta swivutiso swa nkoka evuton’wini.—Swivuriso 2:1-5.

U ta kuma nkongomiso lowu tshembekaka wa vutomi bya siku ni siku.—Pisalema 119:105.

U ta va na ntshembo wa xiviri hi vumundzuku.—Varhoma 15:4.

XANA HI NGA SWI TSHEMBA HAKUNENE LESWI BIBELE YI SWI VULAKA?

Ina, hikwalaho ka swivangelo swinharhu:

• Ku pfumelelana ka yona loku hlamarisaka. Bibele yi tsariwe hi vanhu va kwalomu ka 40 hi malembe lama tlulaka 1 600. Vo tala va vona a va kalanga va tivana. Kambe, ya pfumelelana naswona yi ni nhloko-mhaka-nkulu yin’we.

• Matimu lama tshembekaka. Van’wamatimu lava dumeke, hi xitalo a va boxi ku hluriwa ka vanhu va rikwavo. Ku hambana na vona, vatsari va Bibele hi ku tshembeka va tsale swihoxo swa vona vini ni swa matiko ya vona.—2 Tikronika 36:15, 16; Pisalema 51:1-4.

• Vuprofeta lebyi tshembekaka. Bibele yi profete hi ku lovisiwa ka muti wa khale wa Babilona ka ha sele 200 wa malembe. (Esaya 13:17-22) A yi hlamuselanga ntsena ndlela leyi Babilona a wu ta lovisiwa ha yona, kambe yi boxe na vito ra loyi a a ta wu hlula.—Esaya 45:1-3.

  Vuprofeta byin’wana byo tala bya le Bibeleni na byona byi hetiseke hi ku helela. Sweswo hi leswi a hi ta swi langutela eka Rito ra Xikwembu.—2 Petro 1:21.