Xana vafi va ta tlhela va hanya hakunene?

LESWI BIBELE YI SWI VULAKA

“Ku ta va ni ku pfuxiwa.”—Mitirho 24:15, Bibele—Matsalwa Yo Kwetsima.

NDLELA LEYI SWESWO SWI NGA KU VUYERISAKA HA YONA

U ta chaveleleka loko u feriwa hi loyi u n’wi rhandzaka.—2 Vakorinto 1:3, 4.

U nge he chavisiwi hi rifu.—Vaheveru 2:15.

U ta va ni ntshembo wa ku tlhela u vona maxaka ya wena lama feke. —Yohane 5:28, 29.

XANA HI NGA SWI TSHEMBA HAKUNENE LESWI BIBELE YI SWI VULAKA?

Ina, hikwalaho ka swivangelo swinharhu:

• Xikwembu i Munyiki wa vutomi. Bibele yi vula leswaku Yehovha Xikwembu i “xihlovo xa vutomi.” (Pisalema 36:9; Mitirho 17:24, 25) Loyi a nyikaka xivumbiwa xin’wana ni xin’wana lexi hanyaka vutomi, u ni vuswikoti byo pfuxa lava feke.

• Xikwembu xi pfuxe vanhu enkarhini lowu hundzeke. Bibele yi vulavula hi vanhu va nhungu lava nga pfuxiwa ku nga vana lavatsongo, vanhu lavakulu, va xinuna ni va xisati. Van’wana a va ha ku fa, kambe un’wana se a ri ni masiku ya mune a ri esirheni!—Yohane 11:39-44.

• Xikwembu xi tiyimisele ku tlhela xi swi endla. Yehovha wa ri venga rifu; u ri teka tanihi nala. (1 Vakorinto 15:26) U navela ku n’wi hlula nala loyi, a n’wi herisa hi ku pfuxa lava feke. U navela ku pfuxa hinkwavo lava nga emianakanyweni ya yena ni ku tlhela a va vona va hanya.—Yobo 14:14, 15.