Xana U Byi Languta Njhani Vumundzuku?

LESWI BIBELE YI SWI VULAKA

“Xikwembu . . . xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4, Vuhundzuluxeri Bya Misava Leyintshwa.

NDLELA LEYI SWESWO SWI NGA KU VUYERISAKA HA YONA

U ta va ni ntirho lowu nga ni xikongomelo ni lowu enerisaka.—Esaya 65:21-23.

A ku nge he vi na vuvabyi kumbe ku xaniseka ka muxaka wihi ni wihi.—Esaya 25:8; 33:24.

U ta va ni vutomi lebyi tsakisaka ni lebyi nga heriki ni ndyangu wa wena ni vanghana va wena.—Pisalema 37:11, 29.

XANA HI NGA SWI TSHEMBA HAKUNENE LESWI BIBELE YI SWI VULAKA?

Ina, hikwalaho ka swivangelo swimbirhi:

• Xikwembu xi ni vuswikoti byo hetisisa xitshembiso xexo. EBibeleni, Yehovha Xikwembu a ri yexe u vitaniwa “[wa] Matimba Hinkwawo,” hi leswi a nga ni matimba lamakulu swinene. (Nhlavutelo 15:3) Hikwalaho u ta swi kota ku hetisisa xitshembiso xa yena xo hundzula misava ya hina yi va leyinene. Bibele yi vula leswaku “eka Xikwembu swilo hinkwaswo swa koteka.”—Matewu 19:26.

• Xikwembu xa swi navela ku hetisisa xitshembiso xexo. Hi xikombiso, Yehovha wa swi “navela” ku pfuxa lava feke.—Yobo 14:14, 15.

  Bibele yi tlhela yi kombisa leswaku Yesu, N’wana wa Xikwembu, u horise lava vabyaka. Ha yini a endle tano? Hikuva a a swi lava. (Marka 1:40, 41) Yesu u byi kombise hi ku hetiseka vumunhu bya Tata wa yena hi leswi a a navela ku pfuna lava pfumalaka.—Yohane 14:9.

  Hikwalaho hi nga tiyiseka leswaku Yehovha na Yesu va lava ku hi pfuna leswaku hi tiphina hi vumundzuku lebyi tsakisaka.—Pisalema 72:12-14; 145:16; 2 Petro 3:9.