Xana Ku Xaniseka Ku Ta Kala Ku Hela?

LESWI BIBELE YI SWI VULAKA

“Xikwembu . . . xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona.” —Nhlavutelo 21:3, 4, Bibele—Matsalwa Yo Kwetsima.

NDLELA LEYI SWESWO SWI NGA KU VUYERISAKA HA YONA

Tiyiseka leswaku Xikwembu a hi xona xi vangaka swiphiqo swa hina.—Yakobo 1:13.

Swa hi chavelela ku tiva leswaku Xikwembu xi yi twisisa hi ku helela ndlela leyi hi titwaka ha yona loko hi xaniseka.—Zakariya 2:8.

U ta va ni ntshembo wa leswaku ku xaniseka hinkwako ku ta hela. —Pisalema 37:9-11.

XANA HI NGA SWI TSHEMBA HAKUNENE LESWI BIBELE YI SWI VULAKA?

Ina, hikwalaho ka swivangelo swimbirhi:

• Xikwembu xi venga ku xaniseka ni vuhomboloki. Xiya ndlela leyi Yehovha Xikwembu a titweke ha yona loko vanhu va yena emikarhini ya le Bibeleni va khomiwa hi ndlela ya tihanyi. Bibele yi vula leswaku a a karhatekile loko ‘va va tshikilela.’—Vaavanyisi 2:18. Bibele—Matsalwa Yo Kwetsima.

  Xikwembu xa va venga vanhu lava twisaka van’wana ku vava. Hi xikombiso, Bibele yi vula leswaku lava ‘halataka ngati leyi nga riki na nandzu’ va xi nyenyetsa.—Swivuriso 6:16, 17.

• Xikwembu xa khathala ha hina. Tanihi leswi munhu a tivaka “leswi n’wi karhataka” kambe na Yehovha wa swi tiva leswi hi karhataka. —2 Tikronika 6:29, 30.

  Hi ku tirhisa Mfumo wakwe, ku nga ri khale Yehovha u ta herisa ku xaniseka ka munhu un’wana ni un’wana. (Matewu 6:9, 10) Kambe sweswi, u chavelela lava n’wi lavaka hi mbilu hinkwayo.—Mitirho 17:27; 2 Vakorinto 1:3, 4.