Mfumo Wa Xikwembu I Yini?

LESWI BIBELE YI SWI VULAKA

“Xikwembu xa le tilweni xi ta simeka mfumo lowu nga ta ka wu nga wisiwi.”—Daniyele 2:44, Bibele—Matsalwa Yo Kwetsima.

“Hi nyikiwe n’wana wa jaha; u ta nyikiwa mfumo.”—Esaya 9:6; nhlamuselo ya le hansi.

NDLELA LEYI SWESWO SWI NGA KU VUYERISAKA HA YONA

• Ku ta va ni mfumo wo lulama lowu nga ta ku vuyerisa.—Esaya 48:17, 18.

• Emisaveni leyintshwa leyi taka vanhu va ta va ni rihanyo lerinene ni ntsako.—Nhlavutelo 21:3, 4.

XANA HI NGA SWI TSHEMBA HAKUNENE LESWI BIBELE YI SWI VULAKA?

Ina, hikwalaho ka swivangelo swimbirhi:

• Yesu u kombise leswi Mfumo wa Xikwembu wu nga ta swi endla. Yesu u dyondzise valandzeri vakwe ku khongelela Mfumo wa Xikwembu leswaku wu ta nileswaku ku rhandza ka xona ku endleka emisaveni. (Matewu 6:9, 10) Yesu u kombise ndlela leyi xikhongelo xexo xi nga ta hlamuriwa ha yona.

  Loko Yesu a ha ri laha misaveni u phamele lava nga ni ndlala, a horisa lava vabyaka ni ku pfuxa lava feke! (Matewu 15:29-38; Yohane 11:38-44) Leswi Yesu a nga ta va Hosi eMfun’weni wa Xikwembu, u kombise leswi Mfumo wolowo wu nga ta swi endlela lava nga ta fumiwa hi wona.—Nhlavutelo 11:15.

• Leswi endlekaka laha misaveni swi kombisa leswaku Mfumo wa Xikwembu wu ta fika ku nga ri khale. Yesu u profete leswaku loko Mfumo wa Xikwembu wu nga si tisa ku rhula emisaveni, misava yi ta hlaseriwa hi tinyimpi, tindlala ni ku tsekatseka ka misava.—Matewu 24:3, 7.

  Namuntlha sweswo swi le ku endlekeni. Hikwalaho hi nga tiyiseka leswaku Mfumo wa Xikwembu wu ta swi herisa hinkwaswo swiphiqo sweswo ku nga ri khale.