Adamu Na Evha A Va Xi Yingisanga Xikwembu

Siku rin’wana loko Evha a ri yexe, nyoka yi vulavule na yena. Yi te: ‘Xana i ntiyiso leswaku Xikwembu a xi lavi leswaku mi dya mihandzu ya mirhi hinkwayo ya ntanga?’ Evha u te: ‘Hi nga dya eka mihandzu ya mirhi ya ntanga kambe ku ni wun’we lowu hi nga fanelangiki hi wu dya. Loko ho dya muhandzu wa murhi wa le xikarhi ka ntanga hi ta fa.’ Kutani nyoka yi te: ‘A mi nge fi. Kahlekahle loko mo dya eka wona, mi ta fana ni Xikwembu.’ Xana a ku ri ntiyiso? Doo. Kambe Evha u tshembile. Loko Evha a ya a languta muhandzu wolowo u ye a wu navela. U wu dyile a tlhela a nyika Adamu leswaku na yena a wu dya. Adamu u dye muhandzu wolowo a ri karhi a swi tiva leswaku va ta fa loko va nga xi yingisi Xikwembu.

Endzhakunyana hi siku rero, Yehovha u vulavule na Adamu na Evha. U va vutise leswaku ha yini va nga n’wi yingisanga. Evha u sole nyoka kasi Adamu u sole Evha. Leswi Adamu na Evha va nga n’wi yingisangiki Yehovha, u va hlongorile entangeni. U veke tintsumi leswaku ti rindza ndhawu leyi ku ngheniwaka ha yona ni banga leri pfurhaka ndzilo, leswaku Adamu na Evha va nga ha swi koti ku tlhelela entangeni.

Yehovha u vule leswaku loyi a xiseke Evha na yena a a ta xupuriwa. A ku nga ri nyoka ya xiviri leyi vulavuleke na Evha. Yehovha u endle tinyoka ti nga koti ku vulavula. A ku ri ntsumi yo biha leyi endleke leswaku nyoka yi vulavula. Yi endle leswi leswaku yi xisa Evha. Ntsumi leyi i Sathana Diyavulosi. Enkarhini lowu taka, Yehovha u ta dlaya Sathana leswaku a nga ha yi emahlweni a dyohisa vanhu.