Mbhongolo Ya Balama Yi Vulavula

Vaisrayele a va ri ni malembe ya kwalomu ka 40 va ri emananga. A va hlule miti yo tala ya matimba. Sweswi tanihi leswi a va vambe matende etimbaleni ta Mowabu evuxeni bya Nambu wa Yordani, a ku ri nkarhi wa leswaku va nghena eTikweni leri Tshembisiweke. Balaka hosi ya Mowabu a a chava leswaku va ta n’wi tekela tiko rakwe. Kutani u rhambe wanuna la vuriwaka Balama leswaku a ta eMowabu a ta rhukana Vaisrayele.

Kambe Yehovha u byele Balama a ku: ‘A wu fanelanga u rhukana Vaisrayele.’ Kutani Balama u arile ku ya. Hosi Balaka u n’wi rhambe ra vumbirhi kutani a n’wi tshembisa ku n’wi nyika xin’wana ni xin’wana lexi a xi lavaka. Nilokoswiritano Balama u arile. Kutani Xikwembu xi te: ‘U nga ya, kambe u ta vula ntsena leswi mina ndzi nga ta ku byela swona leswaku u swi vula.’

Balama u khandziye mbhongolo yakwe kutani a kongoma edzongeni eMowabu. Xikongomelo xakwe a ku ri ku rhukana Vaisrayele hambileswi Yehovha a a n’wi byele leswaku a nga va rhukani. Ntsumi ya Yehovha yi humelele eka yena endleleni kanharhu. Balama a a nga yi voni ntsumi kambe mbhongolo yakwe a yi yi vona. Mbhongolo yi rhange yi hambuka endleleni yi ya emasin’wini. Endzhaku yi kongome ekhumbini ivi yi manya nenge wa Balama na rona. Eku heteleleni yi etlele exikarhi ka ndlela. Nkarhi ni nkarhi loko yi endla sweswo, Balama a a yi ba hi nhonga.

Endzhaku ka loko a be mbhongolo kanharhu, Yehovha u endle leswaku yi vulavula. Mbhongolo yi vutise Balama yi ku: ‘Ha yini u tshamela ku ndzi ba?’ Balama u te: ‘U ndzi endle xiphukuphuku. Loko a ndzi ri ni banga a ndzi ta ku dlaya.’ Mbhongolo yi te: ‘U ndzi gade malembe yo tala. Xana ndzi tshama ndzi ku khoma hi ndlela leyi?’

Kutani Yehovha u endle leswaku Balama a vona ntsumi. Ntsumi yi te: ‘Yehovha u ku byele leswaku u nga va rhukani Vaisrayele.’ Balama a ku: ‘Ndzi dyohile. Ndzi ta tlhelela ekaya.’ Kambe ntsumi yi ku: ‘U nga ya eMowabu, kambe u fanele u vula ntsena leswi Yehovha a nga ta ku byela leswaku u swi vula.’

Xana Balama a a dyondze swo karhi? Doo! Endzhaku ka sweswo, Balama u ringete ku rhukana Vaisrayele kanharhu, kambe nkarhi ni nkarhi Yehovha u endle leswaku a va katekisa. Eku heteleleni Vaisrayele va hlasele Mowabu naswona Balama u dlayiwile. Xana a swi nga ta va swi ve swinene loko Balama a a yingise Yehovha ku sukela eku sunguleni?