Yehovha A Lamulela Yehoxafati

Yehoxafati, hosi ya le Yuda u herise tialitari ta Bali ni swifaniso leswi a swi ri kona etikweni. A a lava leswaku vanhu va tiva milawu ya Yehovha. Kutani u rhume tihosana ni Valevhi etikweni hinkwaro ra Yuda leswaku va ya dyondzisa vanhu milawu ya Yehovha.

Matiko ya le kusuhi a ma chava ku hlasela Yuda hikuva a ma swi tiva leswaku Yehovha a a va seketela vanhu vakwe. Ma tlhele ma yisela Hosi Yehoxafati tinyiko. Kambe Vamowabu, Vaamoni ni lava a va ri exifundzheni xa Seyiri va tile va ta lwa na Yuda. Yehoxafati a a swi tiva leswaku i Yehovha loyi a a ta n’wi pfuna. U byele vavanuna, vavasati ni vana leswaku va hlengeletana eYerusalema. U khongele emahlweni ka vona a ku: ‘Yehovha, handle ka wena, a hi nge hluli. Hi kombela u hi byela leswi hi faneleke hi swi endla.’

Yehovha u hlamule xikhongelo xexo a ku: ‘Mi nga chavi. Ndzi ta mi pfuna. Yimani mi nga tsekatseki, mi vona ndlela leyi ndzi nga ta mi ponisa ha yona.’ Xana Yehovha u va ponise njhani?

Hi xa mundzuku xa kona, Yehoxafati u hlawule vayimbeleri kutani a va byela leswaku va macha emahlweni ka masocha. Va mache ku suka eYerusalema va ya fika endhawini leyi ku lweriwaka nyimpi leyi vuriwaka Tekowa.

Loko vayimbeleri va ri karhi va dzunisa Yehovha hi ntsako hi marito lama tlakukeke, Yehovha u lwele vanhu vakwe. U endle leswaku Vaamoni ni Vamowabu va pfilunganyeka lerova va sungula ku hlaselana naswona ku hava ni un’we wa vona a poneke. Kambe Yehovha u sirhelele vanhu va le Yuda, masocha ni vaprista. Vanhu hinkwavo ematikweni ya le kusuhi va twe leswi Yehovha a swi endleke naswona a va swi tiva leswaku wa ha va lamulela vanhu vakwe. Yehovha u va ponisa njhani vanhu vakwe? Hi tindlela to tala. A nga lavi mpfuno wa vanhu leswaku a va ponisa.