Ku Avanyisa Enkoveni Lowu Timhaka Ti Tsemiwaka Eka Wona
“V̌amatiko . . . a v̌a te nkov̌eni wa Yosafat; hikuv̌a kona nḍi ta ṭhamisa ku av̌anyisa matiko hikwawo.”—YUWELE 3:12.
1. Hikwalaho ka yini Yuwele a vona mintshungu yi hlengeletanile “e nkov̌eni wa ku av̌anyisa”?
“IMIṬHUNGU! i miṭhungu! e nkov̌eni wa ku av̌anyisa”! Marito lawa lama nyanyulaka hi ma hlaya eka Yuwele 3:14. Ha yini mintshungu leyi yi hlengeletanile? Yuwele wa hlamula: “Hikuv̌a ri le kusuhi siku ra Yehova.” I siku lerikulu ra ku lweriwa ka Yehovha—siku ra ku avanyisa mintshungu leyi aleke Mfumo wa Xikwembu lowu simekiweke lowu nga ehansi ka Kreste Yesu. Eku heteleleni “tintsumi ta mune” ta Nhlavutelo ndzima 7 ti ta tshika ku khoma “timheho ta mune ta misava,” kutani ku ta “nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he humeleli nakambe.”—Nhlavutelo 7:1; Matewu 24:21.
2. (a) Hikwalaho ka yini ndhawu leyi Yehovha a avanyiselaka eka yona hilaha ku faneleke yi vitaniwa ‘nkova wa Yoxafati’? (b) Xana, hi laha ku faneleke, Yoxafati u endlise ku yini loko a hlaseriwa?
2 Eka Yuwele 3:12, ndhawu leyi ku avanyisa loku ku endleriwaka eka yona yi vuriwa ‘nkova wa Yoxafati.’ Leswi swa fanela hikuva hi nkarhi lowu mfumo wa Yuda a wu nga fambi kahle, Yehovha u tise ku avanyisa kwalaho, a lwela Hosi leyinene Yoxafati, leyi vito ra yona ri vulaka leswaku “Yehovha I Muavanyisi.” Ku kambisisa leswi swi humeleleke hi nkarhi wolowo, swi ta hi pfuna leswaku hi swi twisisa ku antswa leswi swi nga ta humelela enkarhini wa hina ku nga ri khale. Mhaka leyi yi kumeka eka 2 Tikronika ndzima 20. Eka ndzimana 1 ya ndzima yoleyo, hi hlaya leswaku “v̌ana v̌a-Moab, ni v̌ana v̌a-Amon, v̌a ri ni v̌a-Maon v̌aṅwana, v̌a ta pfuka Yosafat ku lwa na yena.” Xana Yoxafati u endlise ku yini? U endle leswi malandza yo tshembeka ya Yehovha minkarhi hinkwayo ma swi endlaka loko ma langutane ni khombo. U hundzulukele eka Yehovha a kombela nkongomiso, a khongela hi mbilu hinkwayo a ku: “Oho! Šikwembu ša hina! Šana u nga ka u nga v̌a av̌anyisi šana? Hikuv̌a hi pfumala matimba e mahlweni ka v̌unyingi lebyi le’byikulu le’byi taka henhla ka hina; loko hi ri hina, a hi tiv̌i leŝi hi nga ta ŝi endla, kambe mahlo ya hina ma langutela wena.”—2 Tikronika 20:12.
Yehovha A Hlamula Xikhongelo
3. Hi swihi swiletelo leswi Yehovha a nga swi nyika Yuda loko a langutane ni nhlaselo wa matiko-akelana?
3 Loko Yehovha a hlamula, “hikwav̌o v̌a-Yuda a v̌a yimile mahlweni ka Yehova, hambi v̌a ri v̌ana v̌a v̌ona la’v̌aṭongo, ni v̌asati v̌a v̌ona, ni v̌ana v̌a v̌ona v̌a šinuna.” (2 Tikronika 20:13) Hilaha a tirhisaka hakona “hlonga ro tshembeka ni ro tlhariha” namuntlha, Muyingisi lonkulu wa swikhongelo u nyike Yahaziyeli muprofeta wa Mulevhi lunghelo ro vula nhlamulo ya Yena eka lava hlengeletaneke. (Matewu 24:45) Ha hlaya: “Yehova o mi byela ŝeŝo, a ku: Mi nga ṭhuki mi tšhav̌a, mi nga heli timbilu e mahlweni ka v̌unyingi le’byikulu lebyi, hikuv̌a nyimpi a hi ya ṅwina, kambe i ya Šikwembu. . . . A hi ṅwina lav̌a mi nga ta lwa e mhakeni leyi; humani, mi v̌a kona, kutani mi ta v̌ona ku pon[isa] ka Yehova, l’a nga na ṅwina. . . . Mi nga tšhav̌eni, mi nga heli timbilu! Munḍuku, humani, mi ya hlangana na v̌ona, Yehova o ta v̌a na ṅwina.”—2 Tikronika 20:15-17.
4. Xana Yehovha a a lava leswaku vanhu vakwe va hiseka, va nga tsani, hi ndlela yihi, loko va langutane ni ntlhontlho wa valala?
4 Yehovha a a nga langutelanga leswaku Hosi Yoxafati ni vanhu vakwe va tshama ntsena va nga endli nchumu, va rindzela ku ponisiwa hi singita. A va fanele va teka goza, va langutana ni ntlhontlho wa nala. Hosi swin’we ni ‘vanhu hinkwavo va Yuda, swin’we ni vana va vona, vasati va vona ni vana va vona va xinuna,’ va kombise ripfumelo leri tiyeke hi ku pfuka nimixo swinene, va khoma ndlela va ya hlangana ni vuthu leri hlaselaka. Endleleni, hosi yi hambete yi va nyika swiletelo swa le tilweni ni ku va khutaza, yi va khongotela yi ku: “Ṭhembani Yehova, Šikwembu ša ṅwina, mi ta tiyisiwa; ṭhembani v̌aprofeta v̌a yena, mi ta humeleriwa hi ku kateka.” (2 Tikronika 20:20) Ku tshemba Yehovha! Ku tshemba vaprofeta vakwe! Xexo a ku ri xona xilotlelo xo humelela. Hilaha ku fanaka ni namuntlha, loko hi ri karhi hi ya emahlweni hi endla ntirho wa Yehovha hi ku hiseka, hi nga tshuki hi kanakana leswaku u ta endla ripfumelo ra hina ri hlula!
5. Xana Timbhoni ta Yehovha ti hiseka hi ndlela yihi loko ti ri karhi ti dzunisa Yehovha?
5 Ku fana ni vanhu va Yuda va le sikwini ra Yoxafati, hi fanele hi ‘dzunisa Yehovha hikuva tintswalo ta yena i ta hilaha ku nga heriki.’ Xana hi n’wi dzunisa njhani? Hi ku chumayela ka hina Mfumo hi ku hiseka! Tanihi leswi vanhu volavo va Yuda ‘va sunguleke ku yimbelela hi ku tsaka ni ku dzunisa,’ na hina a hi engeteleni mintirho eka ripfumelo ra hina. (2 Tikronika 20:21, 22) Ina, a hi kombiseni ripfumelo ro tano leri tiyeke loko Yehovha a ri karhi a lunghiselela ku lwa ni valala va yena! Hambiloko ndlela yi nga ha vonaka yi lehile, a hi tiyimiseleni ku tiyisela, hi va ni ripfumelo leri hanyaka, hilaha vamakwerhu va hina lava hlulaka va endlaka hakona eswivandleni leswi nga ni madzolonga emisaveni namuntlha. Ematikweni man’wana lawa eka wona ku nga ni nxaniso, madzolonga, ndlala ni swiyimo leswi nga riki swinene swa timali, malandza ya Xikwembu lama tshembekaka ma kuma vuyelo lebyi hlamarisaka, hilaha 1998 Yearbook of Jehovah’s Witnesses yi vikaka hakona.
Yehovha U Ponisa Vanhu Va Yena
6. Xana ripfumelo leri tiyeke ri hi pfuna njhani leswaku hi tshama hi tshembekile namuntlha?
6 Matiko lama nga xi chaviki Xikwembu lawa a ma akelane na Yuda ma ringete ku hlasela vanhu va Xikwembu, kambe hi ripfumelo leri xiyekaka malandza ya Yehovha ma angule hi ku n’wi yimbelelela swidzuniso. Hi nga kombisa ripfumelo leri fanaka namuntlha. Hi ku khomeka hi mintirho ya ku dzunisa Yehovha, hi tiyisa switlhangu swa hina swa moya, hi ndlela yoleyo hi endla leswaku mintlhamu ya Sathana ya vuxisi yi nga swi koti ku hi phasa. (Vaefesa 6:11) Ripfumelo leri tiyeke ri ta hlula ndzingo wa ku hambukisiwa hi vuhungasi lebyi thyakeke, ku hlongorisa swilo leswi vonakaka ni ku pfumala ripfumelo loku taleke emisaveni leyi hi nga eka yona. Ripfumelo leri leri nga hluriwiki ri ta hi endla hi hambeta hi tirha hi ku tshembeka swin’we ni “hlonga ro tshembeka ni ro tlhariha” loko hi ri karhi hi wundliwa hi swakudya swa moya leswi hi nyikiwaka swona “hi nkarhi lowu faneleke.”—Matewu 24:45.
7. Xana Timbhoni ta Yehovha ti angurise ku yini eka minhlaselo yo hambana-hambana leyi ti langutaneke na yona?
7 Ripfumelo ra hina leri sekeriweke eBibeleni ri ta hi tiyisa eka tsima ro biha leri endliwaka hi lava nga ni moya wa “hlonga ro biha” leri ku vulavuriwaka ha rona eka Matewu 24:48-51. Vagwinehi va hetisisa vuprofeta lebyi hi ndlela leyi xiyekaka, hi ku ya emahlweni va byala mavunwa ni vuxisi ematikweni yo tala namuntlha, va tlhela va tirhisana ni van’wana lava nga ni swikhundlha leswi tlakukeke exikarhi ka matiko. Laha swi fanelaka kona, Timbhoni ta Yehovha ti angule hilaha swi hlamuseriweke hakona eka Vafilipiya 1:7, ‘ti lwela ni ku simeka mahungu lamanene hi nawu.’ Hi xikombiso, hi September 26, 1996, eka nandzu wa le Greece, vaavanyisi va kaye va European Court of Human Rights, le Strasbourg, hi vun’we va pfumerile leswaku “Timbhoni ta Yehovha ti wela kona eka leswi swi vuriwaka ‘vukhongeri lebyi tivekaka,’” lebyi faneriwaka hi ntshunxeko wa ku phofula mianakanyo, ku va ni ripfalo ni ku va ni tidyondzo, ni mfanelo yo twarisa ripfumelo ra tona. Malunghana ni vagwinehi, ku avanyisa ka Xikwembu ku ri: “Marito ya xivuriso xa ntiyiso ma hetisekile eka vona: ‘Mbyana yi vuyele emahlanteni ya yona, ni nguluve ya nkati leyi a yi hlambisiwile yi vuyele ku ya vumbuluka endzhopeni.’”—2 Petro 2:22.
8. Esikwini ra Yoxafati, xana Yehovha u va avanyise njhani valala va vanhu Vakwe?
8 Le ndzhaku esikwini ra Yoxafati, Yehovha u avanyise vanhu lava a va lava ku vavisa vanhu va Yena. Ha hlaya: “Yehova a v̌ekela v̌ana v̌a-Amon ni v̌a-Moab, ni v̌a nṭhav̌a ya Sehir la’v̌a teke ku pfuka Yuda, e v̌arinḍi, kutani v̌a hluriwa. Kav̌a loko v̌ana v̌a-Amon ni v̌a-Moab, v̌a pfuka v̌aaki v̌a nṭhav̌a ya Sehir, ku v̌a dlaya ni ku v̌a heta; kute loko v̌a hetile v̌aaki v̌a Sehir, v̌a pfunana e ku herisana.” (2 Tikronika 20:22, 23) Vanhu va Yuda va vitane ndhawu yoleyo Nkova wa Beraka, Beraka swi vula leswaku “Nkateko.” Ni namuntlha, ku avanyisa ka Yehovha ehenhla ka valala vakwe ku ta tisa mikateko leyikulu eka vanhu vakwe.
9, 10. I vamani lava va tikombiseke va faneriwa hi ku avanyisa ka Yehovha ka vukarhi?
9 Hi nga ha vutisa, Xana i vamani eminkarhini ya sweswi lava va nga ta avanyisiwa hi Yehovha? Leswaku hi kuma nhlamulo ya xivutiso xexo, hi fanele hi tlhelela eka vuprofeta bya Yuwele. Yuwele 3:3 yi vulavula hi valala va vanhu vakwe leswaku va “humesile wanḍisanyana ku v̌a hakelo ya mooŝi, v̌a šav̌ile vinyo hi wanhwana.” Ina, va teka malandza ya Xikwembu ma ri ya xiyimo xa le hansi eka xa vona, vana va vona va tluriwa hi mali yo hakela nghwavava kumbe mali yo xava jeke ya vhinyo. Va ta riha hikwalaho ka sweswo.
10 Van’wana lava na vona va faneriwaka hi ku avanyisa loku fanaka ni loku, hi lava va oswaka hi tlhelo ra moya. (Nhlavutelo 17:3-6) Lava va nga ni nandzu swinene hi lava va kucetelaka van’watipolitiki leswaku va xanisa Timbhoni ta Yehovha ni ku kavanyeta ntirho wa tona, hilaha varhangeri va vukhongeri lava pfuxaka hasahasa va endleke hakona le Vuxeni bya Yuropa eminkarhini ya sweswi. Yehovha u phofula ku tiyimisela ka yena ku teka goza ro lwisana ni vanhu volavo va tihanyi.—Yuwele 3:4-8.
“Banani Nkosi!”
11. Xana Yehovha u va tlhontlha njhani valala vakwe leswaku va lunghekela nyimpi?
11 Sweswi Yehovha u byela vanhu va yena leswaku va twarisa ntlhontlho lowu eka matiko: “Banani nkosi e šikari ka matiko leŝaku v̌a hloma, v̌a pfuša tinhenha! A v̌a te, a v̌a ṭhinele, v̌av̌anuna hikwav̌o v̌a nyimpi!” (Yuwele 3:9) Loku i ku twarisiwa ka muxaka wa nyimpi yo hlawuleka—nyimpi yo lulama. Timbhoni ta Yehovha leti tshembekaka ti tirhisa matlhari ya moya leswaku ti lwisana ni vuxisi, ti hlula mavunwa hi ntiyiso. (2 Vakorinto 10:4; Vaefesa 6:17) Ku nga ri khale Xikwembu xi ta twarisa “nyimpi ya siku lerikulu ra Xikwembu xa Matimba Hinkwawo.” (Nhlavutelo 16:14) Yi ta va herisa hinkwavo vakaneti va vuhosi bya Xikwembu emisaveni. Vanhu va xona emisaveni a va nge hlanganyeli hi xiviri eka yona. Hi ku kongoma na hi ndlela yo fanekisela, va ‘fule mabanga ya vona ma va swikomu ni matlhari ma va masikeri.’ (Esaya 2:4) Hi hala tlhelo, Yehovha u tlhontlha matiko leswaku ma endla leswi hambaneke ni sweswo: “Fulani mabanga hi ŝikomu ŝa ṅwina; hi mikwana ya ṅwina mi fula matlhari!” (Yuwele 3:10) U ma rhamba leswaku ma hloma ma helela. Kambe a ma nge humeleli, hikuva nyimpi ni ku hlula i swa Yehovha!
12, 13. (a) Ku nga khathariseki ku hela ka Nyimpi ya Vusukumbele, xana matiko yo tala ma tikombise ma ha lunghekele nyimpi hi ndlela yihi? (b) Xana i yini lexi matiko ma nga xi lunghekelangiki?
12 Eku sunguleni ka va-1990, matiko ma vule leswaku Nyimpi ya Vusukumbele a yi herile. Hi ku ya hi sweswo, xana pakani leyikulu ya Nhlangano wa Matiko, ku nga ku tisa ku rhula ni nsirhelelo, yi fikeleriwile ke? Nikatsongo! Xana swiendlakalo swa le Burundi, Democratic Republic of Congo, Iraq, Liberia, Rwanda, Somalia ni le khale ka Yugoslavia swi hi byela yini? Hi ku ya hi marito ya Yeremiya 6:14 swi hi byela leswi: “Ku rurile, ku rurile! kasi a ku na ku rula.”
13 Hambileswi nyimpi ya xiviri yi yimeke etindhawini tin’wana, matiko lama nga swirho swa Nhlangano wa Matiko ma ha phikizana hi ku endla matlhari lama rharhanganeke ya nyimpi. Man’wana ma ha ya emahlweni ma hlayisa tinhulu ta matlhari ya nyutliya. Man’wana ma endla matlhari ya tikhemikhali ni ya ti-bacteria lama nga lovisaka vanhu hi xitalo. Loko matiko lawa ma hlengeletana endhawini yo fanekisela leyi vitaniwaka Armagedoni, u ma tlhontlha hi marito lama nge: “L’a ṭaneke a nge: Nḍi nhenha! Hatlisani mi ta, ṅwina matiko hikwawo ya matlhelo, mi hlengeletana!” Kutani Yuwele a nghenelela hi xikombelo xakwe lexi nge: “Wena, Yehova, šikisela tinhenha ta wena kona.” (Xiitaliki i xerhu.)—Yuwele 3:10, 11.
Yehovha U Sirhelela Vanhu Va Yena
14. Xana tinhenha ta Yehovha i vamani?
14 Xana tinhenha ta Yehovha i vamani? Ku ringana minkarhi ya 280 eBibeleni, Xikwembu xa ntiyiso xi vitaniwa “Yehova wa mav̌andla.” (2 Tihosi 3:14) Mavandla lawa i vuthu ra tintsumi ta le tilweni leri lunghekeleke ku endla leswi Yehovha a ri lerisaka swona. Loko Vaasiriya va ringeta ku khoma Elixa, eku heteleleni Yehovha u endle leswaku mulanguteri wa Elixa a vona lexi nga ta endla va tsandzeka: “A v̌ona nṭhav̌a yi tele hi mahantši ni magolonyi ya nḍilo, ŝi renḍele Eliša e šikari.” (2 Tihosi 6:17) Yesu u vule leswaku a a ta va a kombele eka Tata wakwe “mavandla ya tintsumi lama tlulaka khume-mbirhi.” (Matewu 26:53) Loko Nhlavutelo yi hlamusela ku gada ka Yesu a ya avanyisa eArmagedoni, yi ri: “Mavuthu lawa a ma ri etilweni a ma n’wi landzela hi tihanci to basa, naswona a ma ambale nguvu ya ntsembyana wa risima, yo basa, leyi tengeke. Kutani enon’wini wa yena a ku huma banga ro leha ro kariha, leswaku a khemba matiko ha rona, naswona u ta ma risa hi nhonga ya nsimbi. U pyanyetela ni xikamelo xa vhinya xa vukarhi bya ku hlundzuka ka Xikwembu xa Matimba Hinkwawo.” (Nhlavutelo 19:14, 15) Xikamelo xa vhinya xo fanekisela xi hlamuseriwa hi ndlela leyi twisisekaka kahle tanihi ‘xikamelo xa vhinya lexikulu xa ku hlundzuka ka Xikwembu.’—Nhlavutelo 14:17-20.
15. Xana Yuwele u yi hlamusela njhani nyimpi ya Yehovha ni matiko?
15 Kutani ke, xana Yehovha u xi hlamula njhani xikombelo xa Yuwele xa leswaku Xikwembu xi xikisa tinhenha ta xona n’wini? Hi marito lawa lama xiyekaka: “V̌amatiko a v̌a pfuke, a v̌a te nkov̌eni wa Yosafat; hikuv̌a kona nḍi ta ṭhamisa ku av̌anyisa matiko hikwawo ya le matlhelweni. Nghenisani sikela, hikuv̌a mav̌ele ma v̌upfile; tanani, mi [kandziya], hikuv̌a šikhuv̌uto ši tele, ni makhuwana ma halaka; hikuv̌a ku biha ka v̌ona ku kulu. I miṭhungu! i miṭhungu! e nkov̌eni wa ku av̌anyisa, hikuv̌a ri le kusuhi siku ra Yehova le’ri nga ta v̌a kona e nkov̌eni wa ku av̌anyisa. Dyambu ni ṅhweti ŝi endla ntima, ni tinyeleti ti tlherisa ku v̌angama ka tona. Yehova o ta ḍumaḍuma e Sion; a twarisa rito ra yena a ri Yerusalem, tilo ni misav̌a ŝi ta ṭekaṭeka.”—Yuwele 3:12-16.
16. I vamani lava nga ta va exikarhi ka lava Yehovha a nga ta va avanyisa?
16 Tanihi leswi hakunene vito ra Yoxafati ri vulaka leswaku “Yehovha i Muavanyisi,” kunene Xikwembu, Yehovha, xi ta lwela vuhosi bya xona loko xi tisa ku avanyisa. Vuprofeta byi vula leswaku vanhu lava avanyisiwaka ‘i mintshungu, mintshungu leyi nga enkoveni lowu timhaka ti tsemiwaka eka wona.’ Vaseketeri vahi ni vahi va vukhongeri bya mavunwa lava va nga ta va va ha ri kona va ta va xiphemu xa mintshungu yoleyo. Nakambe exikarhi ka vona ku ta va ku ri ni lava hlamuseriwaka hi Pisalema ya vumbirhi—matiko, tinxaka ta vanhu, tihosi ta misava ni vafumi—lava rhandzeke fambiselo ro homboloka ra misava leyi, ematshan’weni ya ‘ku tirhela Yehovha hi xichavo.’ Vona va ale ku ‘ntswontswa n’wana.’ (Pisalema 2:1, 2, 11, 12) A va pfumeli leswaku Yesu i Hosi leyi tirhisanaka na Yehovha. Nakambe, mintshungu leyi nga ta lovisiwa yi ta katsa ni vanhu hinkwavo lava Hosi yoleyo leyi vangamaka yi nga ta vula leswaku i “timbuti.” (Matewu 25:33, 41) Hi nkarhi wa Yehovha lowu faneleke wa leswaku a bonga a ri eYerusalema wa le tilweni, Hosi ya tihosi leyi a yi vekeke yi ta gada yi humesa ku avanyisa. Matilo ni misava hakunene swi ta ninginika! Hambiswiritano, ha tiyisekisiwa: “Yehova i šitšhav̌elo e ka tiko ra yena, i khokholo e ka v̌ana v̌a Israel.”—Yuwele 3:16.
17, 18. I vamani lava boxiwaka tanihi lava ponaka nhlomulo lowukulu, naswona xana va ta va ehansi ka swiyimo swa njhani?
17 Nhlavutelo 7:9-17 yi vula leswaku “ntshungu lowukulu” lowu vumbiwaka hi vanhu lava kombisaka ripfumelo eka matimba ya ku kutsula ya ngati ya Yesu, hi vona va nga ta pona nhlomulo lowukulu. Vona va ta kuma nsirhelelo esikwini ra Yehovha, loko mintshungu leyi ku vulavuriwaka ha yona eka vuprofeta bya Yuwele yi kuma vuavanyisi bya vukarhi. Eka lava poneke, Yuwele u ri: “Mi ta tiv̌a leŝaku hi mina Yehova, Šikwembu ša ṅwina; mina l’a ṭhameke Sion, e nṭhav̌eni ya mina le’yi hlawuriweke,” ndhawu ya Yehovha yo tshama eka yona etilweni.—Yuwele 3:17a.
18 Kutani vuprofeta byi hi byela leswaku xivandla xa Mfumo wa Xikwembu wa le tilweni, xi “ta v̌a šiv̌andla le’ši hlawuriweke; v̌amatiko a v̌a nga ha hunḍi ka yena.” (Yuwele 3:17b) Exivandleni xa le tilweni ni xa laha misaveni xa Mfumo wolowo wa le tilweni, vanhu vambe a va nge vi kona, hikuva hinkwavo va ta va va hlanganile evugandzerini byin’we lebyi tengeke.
19. Xana Yuwele u wu hlamusela njhani ntsako wa paradeyisi wa vanhu va Xikwembu namuntlha?
19 Hambi ku ri namuntlha, ku rhula lokukulu ku kona exikarhi ka vanhu va Yehovha laha misaveni. Hi vun’we va twarisa ku avanyisa kakwe ematikweni yo tlula 230, hi tindzimi to hambana-hambana to tlula 300. Ku humelela ka vona ku vhumbhiwe hi ndlela leyinene ka ha ri emahlweni hi Yuwele a ku: “E nkarini wolowo, tinṭhav̌a ti ta pfelela ḍov̌a ra vinyo, ŝiṭunga ŝi ta khuluka e nṭwamba, ni milambu hikwayo ya Yuda yi ta ṭhama yi v̌a ni mati la’ma khulukaka.” (Yuwele 3:18) Ina, Yehovha u ta hambeta a chulula mikateko yo tala ni ku humelela ni ntiyiso wa risima lowu engetelekeke, ehenhla ka vanhu lava va n’wi dzunisaka emisaveni. Vuhosi bya Yehovha byi ta va byi lweriwe hi xitalo enkoveni lowu timhaka ti tsemiwaka eka wona, naswona ntsako wu ta va wukulu tanihi leswi a nga ta tshama hi masiku exikarhi ka vanhu vakwe lava kutsuriweke.—Nhlavutelo 21:3, 4.
Wa Tsundzuka Xana?
◻ Xana Yehovha u va ponise njhani vanhu vakwe emasikwini ya Yoxafati?
◻ I vamani lava Yehovha a va vonaka va faneriwa hi ku lovisiwa ‘enkoveni lowu timhaka ti tsemiwaka eka wona’?
◻ Xana tinhenha ta Xikwembu i vamani naswona ti ta va ni xiphemu xihi eka nyimpi yo hetelela?
◻ Hi wihi ntsako lowu kumiwaka hi vagandzeri lava tshembekeke?
[Xifaniso lexi nga eka tluka 21]
Yuda u byeriwe leswi: ‘U nga chavi hikuva nyimpi a hi ya wena kambe i ya Xikwembu’
[Xifaniso lexi nga eka tluka 23]
Yehovha u tlhontlha valala vakwe leswaku va ‘fula swikomu swa vona swi va mabanga’
[Xifaniso lexi nga eka tluka 24]
Bibele yi kombisa leswaku ntshungu lowukulu hi wona wu nga ta pona nhlomulo lowukulu