Tekelelani Xikombiso Xa Vaprofeta—Yuwele
1. Hi nga ku tekelela njhani ku titsongahata ka Yuwele loko hi chumayela?
1 A a ri mani muprofeta Yuwele? U vule ntsena hi leswaku a a ri “n’wana wa Petuwele.” (Yuw. 1:1) Muprofeta loyi la titsongahataka u kandziyise nkoka wa rungula ra Yehovha, ku nga ri ntirho wa yena tanihi murhumiwa. Hilaha ku fanaka loko hi ri ensin’wini, ematshan’weni ya leswaku hi lava ku dzunisiwa kumbe ku voniwa, hi endla leswaku vanhu va tiva Yehovha ni ku dyondza Bibele. (1 Kor. 9:16; 2 Kor. 3:5) Ku engetela kwalaho, hi kuma matimba eka rungula leri hi ri chumayelaka. Hi yihi mhaka ya muprofeta Yuwele leyi nga hi endlaka leswaku hi hiseka ni ku va ni ntshembo namuntlha?
2. Ku tshinela ka siku ra Yehovha ku fanele ku hi susumetela ku endla yini?
2 “Siku Ra Yehovha Ri Le Kusuhi.” (Yuw. 1:15): Hambileswi marito lawa matsariweke eka magidi ya malembe lama hundzeke, hi hanya enkarhini wa ku hetiseka ka xiphemu xa wona xo hetelela. Ku onhaka ka swiyimo swa misava, ku honisiwa ni ku hlekuriwa loku hi langutanaka ni kona loko hi ri ensin’wini i vumbhoni lebyi swi kombisaka kahle leswaku makumu ya mafambiselo lawa ya swilo ma tshinele. (2 Tim. 3:1-5; 2 Pet. 3:3, 4) Loko hi anakanyisisa hi ku tshinela ka makumu, hi va ni xivangelo xo rhangisa ntirho wa nsimu evuton’wini bya hina.—2 Pet. 3:11, 12.
3. Ha yini nsimu yi ri ya nkoka swinene leswi hi tshinelelaka eka nhlomulo lowukulu?
3 “Yehovha U Ta Va Vutumbelo Bya Vanhu Va Yena.” (Yuw. 3:16): Ku ninginika loku hlamuseriweke eka ndzimana leyi ku nga tirhisiwa eka vuavanyisi bya Yehovha hi nkarhi wa nhlomulo lowukulu. Ha khutazeka hi ku tiva leswaku Yehovha u ta ponisa malandza ya yena yo tshembeka hi nkarhi wolowo. (Nhlav. 7:9, 14) Loko hi ya ensin’wini kutani hi xiya ndlela leyi Yehovha a hi hlayisaka ni ku hi tiyisa ha yona, hi va ni ripfumelo leri tiyeke ni ku tiyiseka leswaku u ta hi pfuna hi nkarhi wa nhlomulo lowukulu.
4. Hi nga tsaka njhani naswona hi langutela vumundzuku hi ri ntshembo?
4 Hambileswi vanhu van’wana va tekaka rungula ra Yuwele ri ri leri tisaka gome, kambe ri nyika vanhu va Xikwembu ntshembo wo tsakisa wa leswaku va ta pona. (Yuw. 2:32) Kutani, a hi languteleni vumundzuku hi ri ni ntshembo naswona hi ku hiseka hi chumayela mahungu ya Mfumo wa Xikwembu loko hi ri karhi hi hlayisa marito ya Yuwele 2:23 leyi nge: “Tsakani mi tsakisisa eka Yehovha Xikwembu xa n’wina.”