Mulanguteri Wa Khotso A Dyondza Ntiyiso

Le Filipiya, a ku ri ni nandza wa xisati loyi a a ri ni dimona. Dimona leri a ri endla leswaku a kota ku vhumbha naswona a a endlela vini vakwe mali yo tala. Loko Pawulo na Silasi va fika eFilipiya, u va sale endzhaku ku ringana masiku yo tala. Dimona leri a ri n’wi endla a huwelela a ku: “Vavanuna lava i malandza ya Xikwembu Lexi Nge Henhlahenhla.” Eku heteleleni, Pawulo u byele dimona rero a ku: ‘Ndzi ku lerisa hi vito ra Yesu leswaku u huma eka yena!’ Hiloko dimona ri huma eka yena.

Loko vini vakwe va xiye leswaku a va nga ha ta endla mali hi yena, va hlundzuke ngopfu. Va khome Pawulo na Silasi va va yisa etindhuneni ta tiko, kutani va ku: ‘Vanhu lava a va wu yingisi nawu naswona va pfilunganya muti hinkwawo!’ Tindhuna ti lerise leswaku Pawulo na Silasi va biwa va tlhela va hoxiwa ekhotsweni. Mulanguteri wa khotso u va hoxe ekhotsweni ra le xikarhi, laha a ku ri ni xinyami swinene ivi a va manya hi tingole.

Vabohiwa van’wana va twe Pawulo na Silasi va ri karhi va dzunisa Yehovha hi tinsimu. Hi xitshuketa, exikarhi ka vusiku, ku ve ni ku tsekatseka lokukulu ka misava ekhotsweni. Hiloko tinyangwa hinkwato ta khotso ti pfuleka, ivi timpecana ta vabohiwa ni tingole swi tshunxeka. Mulanguteri wa khotso u tsutsumele ekhotsweni ra le xikarhi kutani a kuma leswaku tinyangwa ti pfulekile. Leswi a a anakanya leswaku vabohiwa hinkwavo va balekile, u hlomule banga leswaku a tidlaya.

Hi nkarhi wolowo, Pawulo u huwelele a ku: ‘U nga tivavisi! Hi kona hinkwerhu!’ Mulanguteri wa khotso u tsutsumele eka Pawulo na Silasi a fika a wela emahlweni ka vona. U va vutise a ku: “Xana ndzi fanele ndzi endla yini leswaku ndzi ponisiwa?” Va te: ‘Wena ni ndyangu wa wena mi fanele mi pfumela eka Yesu.’ Hiloko Pawulo na Silasi va va dyondzisa rito ra Yehovha naswona mulanguteri wa khotso ni vandyangu wakwe hinkwavo va khuvuriwa.