“Xana Ndzi Fanele Ku Endla Yini Leswaku Ndzi Ponisiwa?”

“XANA ndzi fanele ku endla yini leswaku ndzi ponisiwa?” Xivutiso lexi xi vutisiwe le ndzhaku hi lembe ra 50 C.E. hi mulanguteri wa khotso eFilipiya, le Makedoniya. A ka ha ku va na ku tsekatseka lokukulu ka misava, naswona timbanti ta khotso leri a ri langutelaka a ti tshovekile ti pfuleka hinkwato. Hi ku ehleketa leswaku vakhotsiwa va balekile, mulanguteri wa khotso a a ri kusuhi na ku tidlaya. Kambe un’wana wa vakhotsiwa, muapostola Pawulo, u huwelerile a ku: “U nga tshuki u tivavisa, hikuva ha ha ri kona hinkwerhu.”—Mintirho 16:25-30.

Pawulo ni mukhotsiwa-kulobye, Silasi, a va tile eFilipiya ku ta chumayela rungula ra ku ponisiwa, naswona a va ri ekhotsweni hikwalaho ka swihehlo swa mavunwa leswi endliweke eka vona. Hi ku nkhensa hikwalaho ka leswi vakhotsiwa va nga balekangiki, mulanguteri wa khotso u lave ku twa rungula ra Pawulo na Silasi. Xana a a boheka ku endla yini leswaku a tsakela nkutsulo lowu chumayeriweke hi varhumiwa lava vambirhi va Vakriste?

Vanhu namuntlha va ha wu lava nkutsulo lowu Pawulo na Silasi a va wu chumayela. Kambe lexi khomisaka gome vo tala va languta mhaka ya ku ponisiwa hi ku kanakana loku enteke. Va siringeka hi ku tikukumuxa ni ku tinyungubyisa ka vakhongeri vo tala lava va tivulaka lava va va dyondzisaka ndlela yo ponisiwa ha yona. Van’wana va honisa minsusumeto leyi nga riki na mongo leyi funghaka vukhongeri byo tala bya evangeli lebyi kandziyisaka mianakanyo ya ku kutsuriwa. Mutsari wa tinyuziphepha wa Munghezi Philip Howard u vule leswaku vanhu vo tano lava va vuriwaka vaevangeli “va hlasela minsusumeto ni mapfalo ematshan’wini ya mianakanyo ya vayingiseri va vona.”—Ringanisa 2 Petro 2:2.

Van’wana nakambe va hlamarisiwa hi ku hundzuka loku minkarhi yin’wana ku endlekaka eka vanhu lava va kholwaka leswaku va ni ntokoto wa ku “ponisiwa.” Ebukwini ya vona leyi nge Snapping, Flo Conway na Jim Siegelman va hlamusela mintokoto yo tala ya vukhongeri—ku katsa ni ku va la ‘ponisiweke’—leyi yi sunguleke ku tsakeriwa eka makume ma nga ri mangani ya malembe lama hundzeke. Va tsala hi “tlhelo ro dzwihala” ra mintokoto yo tano ivi va vula leswaku vanhu va “nghene” eku hundzukeni ka xitshuketa ka vumunhu loku hlulekaka ku nyika ku hetiseka loku tshembisiweke ni ku voningela, kambe ematshan’wini ya sweswo ku humesa mianakanyo leyi hoxeke, mianakanyo leyi pfalekeke ni ku hluleka ku langutana ni ntiyiso. Vatsari lava va tlhandlekela va ku: “Hi nga hlamusela endlelo leri tanihi leri ra ku pfala mianakanyo, ra ku nga ehleketi.”

Leswi a swi nga ri tano loko Vakriste va lembe xidzana ro sungula va tokote nkutsulo. Mulanguteri wa khotso wa le Filipiya a nga ‘pfalanga mianakanyo ya yena’ loko muapostola Pawulo a hlamule xivutiso xa yena lexi nge, “Xana ndzi fanele ku endla yini leswaku ndzi ponisiwa?” Naswona Pawulo na Silasi a va tisanga ‘nhlaselo emintlhavekweni ya yena’ ivi va kombela munyikelo lowukulu wa mali. Ku ri na sweswo, ‘va n’wi byele rito ra Yehova.’ Hi ku anakanyisisa ni wanuna loyi, va n’wi pfune ku ta eku twisiseni loku nga erivaleni ka malunghiselelo ya Xikwembu ya nkutsulo.—Mintirho 16:32.

“Pfumela Eka Hosi Yesu”

Varhumiwa volavo va Vukriste va pfule mianakanyo ya mulanguteri wa khotso eka ntiyiso wa masungulo ehenhleni ka nkutsulo. A ku ri ntiyiso lowu fanaka ni lowu muapostola Petro a wu hlamuseleke loko bandlha ra Vukriste ri sungula ku simekiwa. Petro u kombetele eka xiphemu-nkulu xa Yesu Kriste emhakeni ya nkutsulo, a n’wi vula ‘Munyiki Lonkulu wa vutomi.’ Muapostola yoloye u tlhele a ku: “Ku ponisiwa a ku kumeki eka munhu un’wana, ni switsanana, hikuva a ku na vito rimbe ehansi ka matilo leri nyikiweke vanhu, leri hi fanelaka ku ponisiwa ha rona.” (Mintirho 3:15; 4:12) Pawulo na Silasi va kongomise mulanguteri wa khotso wa le Filipiya eka Munyiki loyi a fanaka wa nkutsulo loko va te: “Pfumela eka Hosi, Yesu, kutani u ta ponisiwa.”—Mintirho 16:31.

Kambe xana swi vula yini ku pfumela eka Hosi Yesu? Ha yini ku nga ri na vito rin’wana kambe leriya ra Yesu leri hi nga ponisiwaka ha rona? Xana un’wana na un’wana eku heteleleni u ta kuma ku kutsuriwa? Xana vaapostola va yi pfumerile mianakanyo ya ku “loko u ponisiwile, u poniseriwe makumu”? Leswi i swivutiso swa nkoka, hikuva, ku nga khathariseki mhaka ya leswaku marito ni swiendlo swa vakhongeri vo tala va manguva lawa swi tiyimisele ku tsongahata rito rero, ha ha lava ku kutsuriwa. Hinkwerhu ka hina hi lava nhlamulo leyi anerisaka, leyi twisisekaka ya xivutiso lexi nge: “Xana ndzi fanele ku endla yini leswaku ndzi ponisiwa?”