BOKISI RO DYONDZISA 14A

Leswi Hi Swi Dyondzaka Eka Tempele Ya Le Xivonweni Xa Ezekiyele

Nkandziyiso Lowu Printiweke

Xifaniso lexi kombaka swiyenge leswi nga etempeleni ya le xivonweni xa Ezekiyele. Swiyenge swa kona swi katsa: 1. Ntshava leyi tlakukeke. 2. Khumbi. 3. Rivala lerikulu ehandle ka muako wa tempele. 4. Nambu lowu khulukaka wu suka endhawini yo kwetsima ya tempele. 5. Tigede ta le handle. 6. Khumbi ra muako wa tempele. 7. Xivava xa le handle. 8. Makamara yo dyela eka wona ya le handle. 9. Tigede ta le ndzeni. 10. Xivava xa vaprista. 11. Altari. 12. Ndhawu yo kwetsima ya tempele. Xihahampfhuka lexikulu (xi lehe kwalomu ka 75 wa timitara) kambe i xitsongo ngopfu loko xi ringanisiwa ni vukulu bya tempele (1 555 wa timitara). Leswaku u vona xifaniso, presa laha yi nga ta ku komba leswi nga eka tluka leri

Vugandzeri Lebyi Tengeke Byi Tlakusiwa Byi Tlhela Byi Sirheleriwa

Tempele ya le xivonweni a yi ri “ehenhla ka ntshava leyi tlakukeke ngopfu” (1). Xana hi tlakuse vugandzeri lebyi tengeke, hi ku rhangisa byona evuton’wini bya hina?

Khumbi (2), leri biyeleke rivala leri pfulekeke ehandle ka tempele (3), ri hi tsundzuxa leswaku a hi fanelanga hi pfumelela nchumu wu thyakisa vugandzeri bya hina eka Yehovha. Leswi swilo leswi “nga kwetsimiki” swi faneleke swi va ekule ni vugandzeri lebyi tengeke, swi vula leswaku ni vagandzeri va Yehovha namuntlha va fanele va fambela ekule ni swilo leswi nga tengangiki swin’we ni mahanyelo yo biha!—Ezek. 42:20.

Mikateko Leyi Nga Heriki

Xinambyana xi khuluka ku suka endhawini yo kwetsima ya tempele, xi kula xi va nambu naswona wu hanyisa tiko wu tlhela wu endla leswaku ri nona (4). Mikateko leyi ku ta buriwa ha yona eka Ndzima 19 ya buku leyi.

Milawu Leyi Fanaka Eka Vanhu Hinkwavo

Tigede leti tlakukeke ta le handle (5) ni tigede ta le ndzeni (9) ti hi tsundzuxa milawu ya Yehovha leyi tlakukeke ya mahanyelo eka vanhu hinkwavo lava a va ta katseka eka vugandzeri lebyi tengeke. Xiya leswaku tigede ta le handle ni ta le ndzeni ta ringana. Sweswo swa fanela, hikuva milawu ya Yehovha yo lulama ya fana eka malandza yakwe hinkwawo, ku nga khathariseki vutihlamuleri bya wona kumbe xiavelo lexi ma xi endlaka.

Swakudya eTafuleni Ra Yehovha

Makamara yo dyela eka wona (8) ma hi tsundzuxa leswaku emikarhini ya khale, vanhu a va dya swin’we magandzelo man’wana lawa va teke na wona etempeleni, entiyisweni, a swi fana ni loko va dya swakudya na Yehovha. Swa hambana ni tempele yo fanekisela leyi Vakreste va gandzelaka eka yona namuntlha, hikuva “gandzelo rin’we” se ri nyikeriwile. (Hev. 10:12) Nilokoswiritano, hi nyikela magandzelo ya hina yo dzunisa.—Hev. 13:15.

Xitiyisekiso Xa Xikwembu

U nga ha twa onge vuxokoxoko bya mipimo hinkwayo eka xivono lexi ya karharisa. Kambe yi hi dyondzisa mhaka ya nkoka: Yi hi tiyisekisa leswaku xikongomelo xa Yehovha xo pfuxeta vugandzeri lebyi tengeke xa tshembeka naswona a xi cinci xi ta hetiseka ku fana ni mipimo yoleyo. Hambileswi Ezekiyele a nga boxangiki leswaku u vone vanhu exivonweni xakwe, u tsale hi xitsundzuxo xa matimba xa Yehovha lexi yaka eka vaprista, tindhuna ni vanhu. Malandza ya Xikwembu hinkwawo ma fanele ma hanya hi milawu ya xona yo lulama.

Tlhelela eka ndzima 14, tindzimana 13, 14