DYONDZO 6

Hlamusela Xivangelo Xo Va U Hlaya Tsalwa

Yohane 10:33-36

HI KU KOMISA: Loko u hlaya tsalwa tlhela u ri hlamusela. Pfuna vayingiseri va wena va vona ndlela leyi tsalwa leri u ri hlayeke ri fambisanaka ha yona ni yinhla leyi u yi kandziyisaka.

NDLELA LEYI U NGA SWI ENDLAKA HA YONA:

Hlawula tinhla ta nkoka. Endzhaku ka loko u hlaye tsalwa, kandziyisa marito lama fambisanaka ni mhaka leyi u vulavulaka ha yona. U nga endla tano hi ku phindha marito kumbe hi ku vutisa swivutiso leswi nga ta endla leswaku vayingiseri va wena va kota ku vona tinhla ta nkoka.

Loko u hlamusela tsalwa hi marito ya wena, tiyiseka leswaku vayingiseri va wena va ha yi vona ndlela leyi marito lama nga eBibeleni ma fambisanaka ha yona ni mhaka leyi u vulavulaka ha yona.
Kandziyisa tinhla ta nkoka. Loko u nga si hlaya tsalwa, boxa xivangelo lexi endlaka leswaku u ri hlaya. Hlamusela ndlela leyi tsalwa ra kona ri yi seketelaka ha yona mhaka leyi u vulavulaka ha yona.

Loko u ri karhi u hlamusela tsalwa, u nga yi pfali Bibele. Leswi swi ta endla leswaku vayingiseri va wena va kota ku khomanisa mhaka leyi u vulavulaka ha yona ni ndzimana leyi wa ha ku yi hlayaka.
U nga rharhanganisi timhaka. Papalata ku vulavula hi timhaka leti nga fambisaniki ni mhaka leyi u vulavulaka ha yona. Loko ku ri leswaku vayingiseri va wena ku na leswi se va swi tivaka hi mhaka leyi u bulaka ha yona, hlawula tinhla leti nga ta va pfuna leswaku va kota ku yi twisisa kahle.