DYONDZO 18

Mhaka Leyi Dyondzisaka Vayingiseri Va Wena

1 Vakorinto 9:19-23

HI KU KOMISA: Hlamusela mhaka hi ndlela leyi nga ta endla leswaku vayingiseri va wena va anakanyisisa, lerova va titwa va dyondze swilo swa nkoka swinene.

NDLELA LEYI U NGA SWI ENDLAKA HA YONA:

Ehleketa hi leswi vayingiseri va wena ana se va swi tivaka. Hambiloko mhaka ya kona va tshame va yi twa, yi hlamusele hi ndlela leyi nga ta endla va twa onge va yi twa ro sungula.

Hatlisa loko u vulavula hi tinhla leti ana se va ti tivaka kambe loko u hlamusela mhaka leyi va nga yi tiviki u nga vulavuli hi ku hatlisa.
Endla ndzavisiso u tlhela u anakanyisisa. Katsa timhaka letintshwa kumbe leta ha ku humelelaka leswaku u pfuna vayingiseri va wena va twisisa tinhlankulu. Tinyike nkarhi wo anakanyisisa hi rungula ra wena ni ndlela leyi ri hlanganaka ha yona ni timhaka leti u lavaka ku vulavula ha tona.

Loko u ri karhi u lunghiselela, tivutise swivutiso leswi nga ta endla leswaku u anakanyisisa swo tanihi leswi nge, ‘yini, hikwalaho ka yini, rini, kwihi, mani ni lexi nge njhani.’ Endla leswaku leswi u swi dyondzisaka swi hanya, hi ku vutisa swivutiso swo tanihi leswi boxiweke laha henhla u tlhela u swi hlamula loko u ri karhi u dyondzisa.
Kombisa leswi rungula ra wena ri pfunaka ha swona. Hlamusela ndlela leyi Matsalwa ma nga va pfunaka ha yona vayingiseri va wena eka vutomi bya vona bya siku ni siku. Bula hi swiyimo, mahanyelo ni swiendlo leswi vayingiseri va wena va swi tivaka.