Hi Nga Xi Gandzela Njhani Xikwembu Hi Ndlela Leyi Xi Tsakisaka?

Hilaha hi dyondzeke hakona eka dyondzo leyi nga hundza, Xikwembu a xi tsakisiwi hi vukhongeri hinkwabyo. Hambiswiritano, hi nga gandzela Muvumbi wa hina hi ndlela leyi n’wi tsakisaka. I “vugandzeri [kumbe vukhongeri]” byihi lebyi a byi tsakelaka? (Yakobo 1:27, nhlamuselo ya le hansi) Xiya leswi Bibele yi swi dyondzisaka.

1. Ndlela leyi hi gandzelaka ha yona yi fanele yi huma kwihi?

Ndlela leyi hi gandzelaka ha yona yi fanele yi huma eBibeleni. Yesu u byele Xikwembu a ku: “Rito ra wena i ntiyiso.” (Yohane 17:17) Vukhongeri byin’wana a byi dyondzisi leswi humaka eRitweni ra Xikwembu ku nga Bibele. Byi dyondzisa tidyondzo leti sunguriweke hi vanhu naswona byi landzela mindhavuko ya vanhu. Kambe Yehovha a nga tsakisiwi hi vanhu lava ‘tlulaka milawu yakwe.’ (Hlaya Marka 7:9.) Kambe, hi tsakisa Yehovha loko hi landzela leswi tsariweke eBibeleni hi tlhela hi yingisa xitsundzuxo xa yona.

2. Hi fanele hi n’wi gandzela njhani Yehovha?

Hi fanele hi gandzela Yehovha ntsena hikuva hi yena Muvumbi wa hina. (Nhlavutelo 4:11) Leswi swi vula leswaku hi fanele hi n’wi rhandza ni ku gandzela yena ntsena, hi nga gandzeli swifaniso kumbe nchumu wun’wana ni wun’wana lowu gandzeriwaka.—Hlaya Esaya 42:8.

Hi fanele hi gandzela Yehovha hi ndlela yo ‘kwetsima leyi amukelekaka’ eka yena. (Varhoma 12:1) Leswi swi vula leswaku hi fanele hi hanya hi milawu ya yena. Hi xikombiso, lava rhandzaka Yehovha va rhandza ni ku tlhela va yingisa milawu yakwe mayelana ni vukati. Va fambela ekule ni mikhuva leyi nga ni khombo, yo fana ni ku dzaha, ku tirhisa tidraksi kumbe ku dakwa.a

3. Hikwalaho ka yini swi ri swa nkoka ku gandzela Yehovha ni vapfumerikulorhi?

Loko hi ya etinhlengeletanweni ta hina ta vhiki ni vhiki hi kota ku ‘dzunisa Yehovha laha hi hlengeletanaka kona.’ (Pisalema 111:1, 2) Ndlela yin’wana leyi hi n’wi dzunisaka ha yona i ku yimbelela tinsimu. (Hlaya Pisalema 104:33.) Yehovha u lava hi ya etinhlengeletanweni hikuva wa hi rhandza naswona wa swi tiva leswaku ti ta hi pfuna hi tiphina hi vutomi hilaha ku nga heriki. Loko hi hlengeletana leswaku hi khutazana swa hi pfuna.

ANAKANYISISA

4. A hi fanelanga hi tirhisa swifaniso loko hi gandzela Xikwembu

VHIDIYO: Xana Xikwembu Xi Lava Hi Xi Gandzela Hi Ku Tirhisa Swifaniso? (3:26)

• A ku endleka yini emikarhini ya Bibele loko vanhu van’wana lava gandzelaka Xikwembu va pfa va gandzela swifaniso?

Van’wana va tibyela leswaku loko va gandzela Xikwembu va tirhisa swifaniso swi endla va va ekusuhi na xona. Xana Xikwembu xa swi amukela sweswo? Hlaya Eksoda 20:4-6 na Pisalema 106:35, 36, ivi mi bula hi swivutiso leswi:

• Hi swihi swilo kumbe swifaniso leswi u tshameke u vona vanhu va swi tirhisa loko va gandzela?

• Yehovha u titwa njhani loko hi gandzela swifaniso?

• Wena u titwa njhani hi ku gandzela swifaniso?

5. Loko hi gandzela Yehovha ntsena hi ta tshunxeka eka tidyondzo ta mavunwa

VHIDIYO: U Ntshunxiwe Hi Ntiyiso (5:16)

Hlaya Pisalema 91:14, ivi mi bula hi xivutiso lexi:

• Yehovha u hi tshembisa leswaku u ta hi endlela yini loko hi kombisa leswaku ha n’wi rhandza hi ku gandzela yena ntsena?

6. Hi gandzela Xikwembu etinhlengeletanweni ta vandlha

Loko hi ri etinhlengeletanweni ta vandlha hi dzunisa Yehovha hi tlhela hi khutazana hi ku hlamula ni ku yimbelela. Hlaya Pisalema 22:22, ivi mi bula hi swivutiso leswi:

• Xana swa ku tsakisa loko u twa van’wana va hlamula etinhlengeletanweni ta vandlha?

• Xana wa swi lava ku lunghiselela leswaku u ta hlamula?

7. Yehovha wa tsaka loko hi byela van’wana leswi hi swi dyondzeke

Ku ni tindlela to tala leti hi nga byelaka van’wana ntiyiso lowu nga eBibeleni. Hlaya Pisalema 9:1 na 34:1, ivi mi bula hi xivutiso lexi:

• U dyondze yini eBibeleni leswi u nga tsakelaka ku swi byela un’wana?

NKATSAKANYO

Muvumbi wa hina wa tsaka loko hi gandzela yena ntsena, hi n’wi dzunisa etinhlengeletanweni ta vandlha ni loko hi byela van’wana leswi hi swi dyondzeke.

Mpfuxeto

• Hi kwihi laha Xikwembu xi hi byelaka ndlela leyi hi faneleke hi xi gandzela ha yona?

• Hikwalaho ka yini hi fanele hi gandzela Yehovha ntsena?

• Hikwalaho ka yini hi fanele hi gandzela Xikwembu swin’we ni vanhu lava lavaka ku xi tsakisa?

KUMA LESWI ENGETELEKEKE

Eka mhaka ya vutomi leyi nge, “A Ndza Ha Ri Hlonga Ra Swifaniso” twana leswi endleke wansati un’wana a tsaka hi leswi a tshikeke ku gandzela swifaniso.

“Bibele Yi Hundzula Vutomi Bya Vanhu” (Xihondzo xo Rindza, July 1, 2011)

Twana leswi nga ku pfunaka leswaku u kota ku hlamula etinhlengeletanweni ta vandlha.

“Dzunisa Yehovha Evandlheni” (Xihondzo xo Rindza, January 2019)

Xiya ndlela leyi jaha rin’wana ri vuyeriweke ha yona hi ku ya etinhlengeletanweni ta vandlha hambileswi a swi nga ri oloveli ku ya.

Yehovha U Ndzi Hlayisile (3:07)

Vanhu vo tala va tshemba leswaku Vakreste va fanele va tirhisa xihambano kambe, xana hina hi fanele hi xi tirhisa?

“Ha Yini Mi Nga Xi Tirhisi Xihambano eVugandzerini Bya N’wina?” (Nhlokomhaka leyi kumekaka eka website)