“Va Ta Lwa Na Wena, Kambe Va Nga Ka Va Nga Ku Hluri”

YEHOVA Hosi Leyikulu u byele muntshwa Yeremiya leswaku U ta n’wi endla “muti wa khokholo, ni mhanḍe ya nsimbi, ni rirhangu ra kopor” leswaku a Iwisana ni un’wana ni un’wana loyi a nga ha lavaka ku n’wi herisa. Eminkarhini ya manguva lawa, hina tanihi Timbhoni ta Yehova hi na ku tiyiseka loku fanaka loku humaka eka Xikwembu. Ina, ehansi ka nkucetelo wa Sathana, ‘va ta lwa na hina,’ kambe va nge hluri. “Hikuv̌a nḍi na wena, e ku ku lwela, ku v̌ula Yehova.”—Yeremia 1:18, 19.

Eka miti leyi nga kule ya Solomon Islands, vanhu vambe va nghenisa vutomi bya vona ekhombyeni, ngopfu-ngopfu loko va tisa vugandzeri lebyintshwa. Wolowo a wu ri ntokoto wa maphayona mambirhi yo hlawuleka ya Timbhoni ta Yehova. Vaaki-tiko lava vonakaka va leva va va cope hi vurha ni miseve. A va ri na swi letelo swo balesela! Loko xiyimo xi ri karhi xi tika, mukhalabye un’wana hi ku hatlisa u nghenelerile, a ku: “Lava i vapfhumba va mina. Mi nga tshuki mi va vavisa.” Lexi hlamariseke vaaki va ndhawu, u va yi se ekaya rakwe. Wanuna loyi a a twile hi Timbhoni; manuku a a teke buku leyi nge, U Nga Hanya Hi Masiku aParadeyisini eMisaveni, naswona dyondzo ya Bibele a yi sunguriwile. Hi ku hatlisa u sungule ku ya eminhlanganweni. Namuntlha vamakwerhu va nga veka vumbhoni hi ku ntshunxeka endhawini yoleyo, va nkhensa nkutsulo wa Yehova wo sungula.

Nkutsulo hakanyingi wu tile hi ku tiviwa tanihi un’wana wa Timbhoni ta Yehova. Hikwalaho ko chumayela hi yindlu na yindlu, vanhu va sungula ku tiva lava nga Timbhoni ni leswi xiyimo xa vona xi nga swona etimhakeni ta siku. Emutini lowuntsongo ePeru, matherorisi ya hehle vaaki-tiko ya ku va ya xengile. Va hlengelete vanhu va doroba naswona va va xaxameta leswaku va va balesela. (Eswiyin’weni leswi fanaka miti hinkwayo yi herisiwile.) Kambe eyinhleni leyi, rin’wana ra matherorisi ri xiye makwerhu ivi ri byela vaavanyisi ri ku: “Wanuna luya a hi un’wana wa vona. Ndzi n’wi tiva a ri Mbhoni ya Yehova, naswona a va hlanganyeli eka politiki.” Makwerhu u ntshunxiwile. Entiyisweni, Yehova u sirheleta lava nga va yena!

Nsimu ya xihlala xa Cyprus yi vika leswaku Kereke ya Orthodox ya Griki a yi gingiriteka ngopfu eku ringeteni ka ku tsongahata ntirho wa Timbhoni ta Yehova. Kereke yi hangalasa swiphephana yi hehla Timbhoni hi timhaka to tala kutani yi tshikisa vanhu va yona ku va ni ku kanela kwihi kumbe kwihi na Timbhoni. Vafundhisi van’wana va tlhele va tilunghiselela ku endzela vanhu lava a va karhi va dyondza ni Timbhoni ta Yehova, va ringeta ku va tshikisa. Ku hambana hi loku humeleleke ePafo, laha Pawulo na Barnaba va tshameke va hlula nkaneto lowu fanaka. (Mintirho 13:6-12) Mufundhisi wa muprista u ringete ku khorwisa vanhu vanharhu vo hambana-hambana leswaku va tshika ku kambisisa Bibele ni Timbhoni ta Yehova. Kutani, vona naswona va hambanile, va lunghiselele leswaku makwerhu a ti hlanganisa na vona eka ku vulavula ni mufundhisi loyi. Hikwalaho ka sweswo, hi vanharhu ka vona hinkwavo sweswi va hlanganyela ni Timbhoni hi ku hiseka. Muprista u hlamuserile a ku, ‘ndzi nge he vi na bulo rin’wana ni Timbhoni ta Yehova.’

Vaprista van’wana va kale va ba Timbhoni loko ti endla ntirho wa yindlu na yindlu eka wun’wana wa miti. Leswi hlamarisaka ngopfu, endzhaku ka masiku ma nga ri mangani, xidzedze xi hlasele muti wolowo, xi onha malwangu ya tindlu to tala. Vaaki van’wana va muti va te: ‘Leswi i ku xupula loku humaka eka Xikwembu hikwalaho ka leswi vaprista va swi endleke eka Timbhoni ta Yehova.’ Emutini lowu, vanhu va timbilu letinene va ha amukela vamakwerhu emakaya ya vona. Eka nkarhi wun’wana, loko makwerhu a ha yisa timagazini ta sweswinyana eka munhu la tsakelaka, un’wana wa vaprista lava va nga ba vamakwerhu a hundza kwalaho ivi a byela makwerhu leswaku a tshika ‘ntlhambi wa yena’ wu ri woxe. Munhu loyi a tsakelaka a byela muprista a ku, ‘Ndzi kule ku ringana leswaku ndzi tiva lexi ndzi xi endlaka.’ Kutani vafundhisi a va hluri loko va lwisana ni Timbhoni ta Yehova; matshalatshala ya vona ya lwisana na vona, naswona vanhu vo tala va yimela Yehova.

Etikweni leri hlaseriweke hi nyimpi eAfrika-Xikarhi, mulanguteri wa xifundza u yimiseriwile ku sechiwa ka nkarhi na nkarhi hi masocha. Va lwisane ni swin’wana eka papila leri a a ri tamerile kutani va n’wi yisa entsindza wa maphorisa, laha a biweke ni ku xanisiwa kona hi masocha manharhu. Hambi leswi xihehlo xo lwisana na yena xi nga endliwangiki naswona huvo yi nga khomiwangiki, u nghenisiwe ekhotsweni lembe rin’we. Hi tin’hweti ta tsevu a a hlayisiwe ekhotsweni leri teleke ku tlula mpimo ni vabohiwa van’wana va 40. Hikwalaho ka tindhawu leti taleke, a va fanele ku cincana ku etlela, tiawara tinharhu hi nkarhi wun’we. Nkarhi lowun’wana hinkwawo, a va fanele ku hambeta va yimile. Loko makwerhu a ri kwalaho, 137 wa swibochwa swi file, naswona u nyikiwe ntirho wa ku hoxa mintsumbu ya swona emasakeni leswaku swi ta lahliwa.

Mulanguteri loyi wa xifundza u hlayise matimba ya yena ya moya hi ku heta nkarhi a veka vumbhoni eka swibochwa-kulobye. Xiviko xa yena xi kombisa ku tlula 30 wa maawara hi n’hweti lawa a wa tirhiseke eku chumayeleni; u fambise mune wa tidyondzo ta Bibele loko a ri ekhotsweni. Xin’wana xa swichudeni swa yena na xona xi sungule ku veka vumbhoni eka van’wana. Eka milandzu ya yena hinkwayo, Yehova u hlayise makwerhu loyi, loyi a tsundzuxaka van’wana a ku: “Loko u ri ekhotsweni, veka hinkwaswo emavokweni ya Yehova. N’wi rindzele. Tshemba yena. U nga vileli ngopfu. Tshembeka.”

Endhawini yin’wana eZimbabwe, vana va Timbhoni ta Yehova va hlongoriwe exikolweni hikwalaho ka ku ka va nga hlanganyeli emintirhweni ya politiki. Hi ku ka yi nga aneriseki hi leswi, mintlawa ya kwalaho yi hise ni makaya ya vatswari va vona ni ku onha swibyariwa swa vona. Mindyangu ya Timbhoni yi boheke ku baleka hikwalaho ka vutomi bya yona, va siya tihomu ni nhundzu yin’wana. Hambi swi ri tano, mhaka leyi yi yisiwe eka vatirhela-mfumo lavakulu va hulumendhe lava va lunghiseleleke mindyangu leyi hi musa leswaku yi tlhelela emakaya ya yona. Tihomu ta vona ti tlherisiwile, naswona hulumendhe yi teke magoza yo hakela vamakwerhu hikwalaho ko lahlekeriwa ka vona. Timbhoni ta Yehova ti swi tlangela hi xiviri loko “tihosi” xisweswo ti tikomba ti ri ‘vatirhi lavanene va Xikwembu.’ (Varhoma 13:1-4) Eka hinkwaswo leswi, vumbhoni lebyinene byi nyikeriwile, naswona vanhu va kwalaho va kombisa ku tsakela lokukulu emahungwini ya Mfumo. Hi laha un’wana wa vamakwerhu a swi vekaka ha kona u ri, ‘Ha swi tiva leswaku Yehova a nga endla swiyimo swo tano swi tirha tanihi vumbhoni evitweni ra yena.’

Lembe leri hundzeke ra ntirho ri katekisiwile hi Yehova entirhweni wa le Malawi. A ku ri etindhawini leti vaaki va kona va hlohlotelaka rivengo ntsena laha Timbhoni ti tokoteke ku onhakeriwa. Xiviko lexi landzelaka xi tiyisekisa leswi: “Eswiphen’wini swo tala swa nsimu, xiyimo xi horile. Kambe eka bandlha rin’wana, mindyangu mimbirhi ya Timbhoni yi xanisiwe ku vava hi mintlawa ya vantshwa. Nhloko ya wun’wana wa mindyangu leyi a yi biwe ngopfu lerova yi titivala ku ringana mune wa tiawara. Endzhaku ka kwalaho, u yisiwe exitichini xa maphorisa, laha phorisa leri a ri ri entirhweni ri tlheleke ri hambeta ri n’wi himetela kun’we ni van’wana lava a yisiweke na vona. Hambi swi ri tano, endzhakunyana, phorisa rin’wana ri sungule ntirho. Rona a ri ri na musa. U ntshunxe vamakwerhu ivi a va rhumela ekaya, naswona va nkhense Yehova hikwalaho ka ku ntshunxa ka yena loku nga languteriwangiki. Swi kumiwile endzhakunyana leswaku xivangelo xa mhangu leyi a ku ri rivengo ra munhu hi xiyexe leri humaka eka maxaka lamakulu. Nhlayo ya hina ya lava veke kona eXitsundzuxweni lembe leri a yi khutaza. Hi ve na 23 476. Leswi swi kombisa leswaku ka ha ri ni vanhu lava fanaka ni tinyimpfu lava faneleke ku pfuniwa leswaku va va vadyondzisiwa va Yesu Kriste laha Malawi.”

Tiko rin’wana eYuropa-Vuxa ri rhumele mahungu lawa yo tlangela: “Hi nkhensa ku tirhisana lokukulu loku hi ku tokotaka ni Huvo leyi Fumaka hi ku tirhisa tindlela hinkwato ta Nhlengeletano ya Yehova ya laha misaveni. Hi leswi hi pfumeleriwa ku vona ndlela leyi Tata wa hina wa le matilweni a hlengeletaka tinyimpfu ta yena ha yona, hi ku tirhisa N’wana wa yena ni tintsumi hinkwato, ni ndlela leyi hi nga ha vaka ni ku hlanganyela kuntsongo eka kona ha yona. Mawaku lunghelo leri leswi swi nga rona! Tata wa hina u katekise matshalatshala ya hina hi ku engeteleka. Nkarhi lowu engetelekeke wu hetiwile ensin’wini, maphayona lama engetelekeke ya nkarhinyana ya chumayela mahungu lamanene hi ku chivirika, ni ku tlakuka ka nhlayo ya tibuku letikulu leti siyiweke kumbe leti fambisiweke ensin’wini i mimbuyelo ya mikateko leyi.”

Mhalamhala ya Yubile ya manguva lawa yi be mpfumawulo lowu twalaka swinene. Xiviko lexi xi nga laha henhla xi kombisa ndlela leyi Timbhoni ta Yehova ti amukelaka xirhambo xexo ha yona eswiphen’wini hinkwaswo swa misava.