Xiviko Xa Vahuweleri Va Mfumo
Yehova U Katekisa Vahlayisi Va Vutshembeki eCyprus
YESU u byele valandzeri vakwe a ku: “Loko va ndzi xanisile, na n’wina va ta mi xanisa.” (Yohane 15:20) Kutani Yehova, hi muprofeta Esaya, u te: “Fumu riṅwana ni riṅwana leri v̌a ri fulaka ku ku onha, ri nga ka ri nga pfuni ntšhumu.” (Esaya 54:17) Swiga leswi ha swimbirhi swi vonake swi ri ntiyiso eCyprus, laha Timbhoni leti hlayisaka vutshembeki ta Yehova ti nga karhi ti chumayelaka mahungu lamanene.
◻ “Kereke ya Greek Orthodox a yi chivirika swinene yi ringeta ku tsongahata ntirho wa hina,” ku vula xiviko xa tiko rero. “Vaprista va hangalasa swiphephana leswi hi hehlaka hi tinxaka-nxaka hinkwato ta swilo ni ku byela vanhu ku papalata ku vulavula ni Timbhoni ta Yehova. Va vhakachela ni vanhu lava hlayaka Bibele na Timbhoni kutani va ringeta ku va heta matimba. EPaphos, muprista la dyondzeke Bibele u ringete ku tshikisa vanhu vanharhu lava hambaneke ku hlaya Bibele ni Timbhoni ta Yehova. Hi makhamba yo hambana-hambana, un’wana ni un’wana wa lava vanharhu, u rhambe makwerhu wa xinuna ku ta vulavula ni mufundhisi loyi. Lexi tsakisaka, hi vanharhu ka vona sweswi va hlanganyela hi ku hiseka ni nhlengeletano ya Yehova.” Kavula, leswi swi nyangatse muprista, loyi a nga te: “Ndzi nga ka ndzi nga ha vulavuli ni Timbhoni ta Yehova.” Vaprista van’wana va kale va ba vamakwerhu van’wana loko va ri evutirhelini. Hambi swi ri tano, hi ntolovelo matshalatshala ya vafundhisi ma tsandzeka, naswona vanhu vo tala sweswi va yimela Yehova.
◻ Ntokoto lowu landzelaka wo huma eCyprus wu komba leswaku ku hlayisa vutshembeki ehansi ka ku kanetiwa swi tisa minkateko. Wanuna wa wansati u dlayiwile enyimpini ya 1974, a n’wi siya a ri na xinhwanyetana xo xi kurisa. Wansati u tekiwile nakambe. Hi ku phaphamisiwa hi vukanganyisi bya vafundhisi ni ku nga tiyiseki hi vumundzuku, u pfumerile ku dyondza Bibele ni Timbhoni ta Yehova. U endle nhluvuko hi ku anghwetla ivi a sungula ku byela maxaka ya yena hi swilo leswinene leswi a a swi dyondza. Ku kanetiwa ku sungula. Ndzingo lowukulu wu te loko n’wana wa yena wa wanhwana wa malembe ya 15 a te: “Ndzi lahlekeriwe hi tatana, kutani loko u nga tshiki ku dyondza ni Timbhoni ta Yehova, ndzi ta ala leswaku u va mana wa mina. Ndzi ta va xisiwana.” Hambi swi ri tano, wansati u ye emahlweni a dyondza.
Siku rin’wana wanhwana u vhakachele munghana exibedlhele. Emubedweni lowu landzeleke wa kwala xibedlhele, Mbhoni a yi vhakele xaka ra yona loko ku fika muprista a ta vona muvabyi yoloyi. Bulo ri sungurile exikarhi ka makwerhu ni muprista. Makwerhu a a titsongahata no tirhisa vutlhari, a tirhisa Bibele ku hlamusela xiyimo xa yena. Hi tlhelo rin’wana, muprista a a kariha. A a ba pongo, kambe a nga yi pfulanga Bibele ni kan’we. Wanhwana u langute xivono kambe u tsakisiwe hi vunene bya makwerhu ni hi mhaka ya leswaku a a tirhisa Bibele. Madyambu wolawo, loko makwerhu ni nsati wa yena va vhakachela mana wa yena ku ta fambisa dyondzo ya Bibele, wanhwana u hlamusele leswi humeleleke exibedlhele kutani a va vutisa a ku: “Xana mi nga swi kota ku dyondza na mina?” Sweswi wanhwana u dyondza kambirhi hi vhiki, ni nuna wa yena wa dyondza. Mana wa kona i muhuweleri la khuvuriweke.
Hakunene, Yehova wa ma katekisa malandza ya yena lama hlayisaka vutshembeki eCyprus!
[Xifaniso lexi nga eka tluka 7]
Muapostola Pawulo nakambe u hlangavetane ni ku kanetiwa ePaphos