Xiviko Xa Vahuweleri Va Mfumo

Mahungu Lamanene Ya Humelela eKipra Hambi Ku Ri Na Nkaneto

MUAPOSTOLA Pawulo u chumayele mahungu lamanene ya Mfumo eKipra. (Mintirho 13:4-12) A ku ri hi 47-48 C.E. Namuntlha, mahungu lamanene ya chumayeriwa exihlaleni lexi xo saseka hi 1 154 wa Timbhoni ta Yehova, naswona hi April ya nan’waka, 2 570 va ve kona eka ntirho wa Xitsundzuxo, leswi kombaka leswaku ku na vanhu vo tala va timbilu letinene ni lava chavaka Xikwembu exihlaleni. Kambe loko vanhu vo tala va amukela rungula ro rhula ra Bibele leri twarisiwaka hi Timbhoni ta Yehova, vafundhisi va Orthodox ya Magriki va kaneta ntirho, tanihi vafundhisi va Vayuda esikwini ra Yesu. (Yohane 15:20) Hofisi ya rhavi ya le Kipra ya tsala: “Ku tlula rini na rini, Kereke ya Magriki ya Orthodox yi kombisa ku tiyimisela ka yona ku kavanyeta ntirho wa hina wo chumayela.” Manuku xiviko xi hlamusela ndlela leyi vafundhisi va hlaselaka vamakwerhu ha yona evutirhelini bya vona bya yindlu na yindlu ivi va ringeta ku va tlhontlha leswaku va katseka eka njhekanjhekisano. Va va hehlela ku vanga dzolonga, kambe vamakwerhu va ala ku hlundzukisiwa kutani va famba.

Entiyisweni, nkaneto wa vafundhisi hakanyingi wu tlhela wu hlasela vona, tanihi laha ntokoto lowu landzelaka wu kombaka ha kona: “Tin’hweti ti nga ri tingani leti hundzeke, wansati u sungule ku dyondza Bibele ni Timbhoni ta Yehova, naswona sweswinyana nuna wa yena u joyinile. Manuku mufundhisi u endzele mpatswa lowu, a ri karhi a tshemba leswaku u ta wu khorwisa leswaku wu tshika dyondzo ya wona ya Bibele. Mufundhisi u ringete ku wu hlamusela Vunharhu-un’we. Endzhaku ka nkarhinyana nuna wa kona u kavanyetile a ku: ‘A ndzi yi twisisi ndlela leyi Yesu, loyi sweswi a nga etilweni hi miri wa nyama, tanihi laha a vulaka ha kona, hi nkarhi lowu fanaka a nga vaka un’we ni Xikwembu lexi xi nga ni xivumbeko xa moya ha yona.’ Nhlamulo ya mufundhisi a yi ri leyi: ‘Phela, a wu fanelanga ku twisisa hinkwaswo.’ Munhu la tsakelaka u te: ‘Kambe ndza swi twisisa leswaku Yesu i N’wana wa Xikwembu naswona a hi Xikwembu hi xoxe. A ndza ha lavi ku twa nchumu mayelana ni Vunharhu-un’we.’ Emhakeni leyi mufundhisi u tlakukile ivi hi ku hlundzuka a ku: ‘Mi le kule ngopfu ni dyondzo ya n’wina ya Bibele. Mi nge hundzuki.’”

Sweswi nsati wa kona u va kona eminhlanganweni hinkwayo naswona u khuvuriwile eka Ntsombano wa Muganga wa “Tshemba Yehova.” Nuna wa kona u ya emahlweni ni dyondzo ya yena naswona u va kona eminhlanganweni yin’wana.

“Xisweswo, ku nga khathariseki matshalatshala ya vona, vafundhisi a va yi fikeleli pakani ya vona,” ku vule xiviko lexi humaka ehofisini ya rhavi ya le Kipra. “Ematshan’wini ya sweswo, leswi hi swi xiyaka hi leswaku sweswi vanhu vo tala lava tsakelaka va va kona eminhlanganweni ku tlula eku sunguleni. Hi nkarhi lowu fanaka, vamakwerhu va tiyisiwa swinene leswaku va yisa mahungu lamanene eka vanhu va timbilu letinene.” Yehova u pfuna vanhu va yena lava tshembekaka tanihi laha a tshembiseke ha kona leswaku a a ta swi endla eka Yeremia 1:19: “V̌a ta lwa na wena, kambe v̌a nga ka v̌a nga ku hluri, hikuv̌a ndzi na wena e ku ku lwela, ku vula Yehova.”