Xana Wa Karhateka Hi Vana Va Wena?

KAVULA wa karhateka! Mavabyi, ku tirhisiwa loko biha ka swidzidzirisi ni vutilawuri i swiphiqo swinharhu ntsena leswi u swi tivaka leswaku swi veka vana va wena ekhombyeni. Swi tolovelekile eka vatswari ku twela vana va vona ku vava—hambi ku ri ku vilela hi vona.

Sweswo hi leswi vatswari vo tala va titwiseke swona ematin’wini, tanihi laha Bibele yi kombaka ha kona. Tsundzuka leswaku Yakobo u rhume Yosefa ku ya kamba vamakwavo hikuva Yakobo a a va twela ku vava. (Genesa 37:13, 14) Yobo, na yena, u vilerile, hambi leswi vana vakwe va majaha a va kurile va ri na mindyangu ya vona vini. U anakanye ku: “Kumbe v̌ana v̌a mina v̌a dyohile, v̌a riv̌ele Šikwembu e timbilwini ta v̌ona.”—Yobo 1:4, 5.

Kunene, hambi a ri Yosefa na Mariya a va karhateka hi Yesu n’wana wa vona la hetisekeke wa jaha! Kahle-kahle, hi nkarhi wun’wana loko Yesu a ri na malembe ya 12 hi vukhale, ngopfu-ngopfu va ve lava karhatekaka ha yena, hikuva va kume leswaku a a nga ri kona. Hambi swi ri tano, n’wana wa vona Yesu a a ri ku dzuneka eka vona naswona a ku ri hava nchumu lowu a va ta tisola ha wona. A hi voneni leswi kahle-kahle swi humeleleke eka xiendlakalo xexo xi tsundzukekaka ivi hi languta tidyondzo leti vatswari va manguva lawa va nga ti dyondzaka eka swona.

N’wana La Lahlekeke

Loko u ri mutswari, kumbexana u nga twela mintlhaveko ya Mariya vusiwana loko hi ku holova a te eka Yesu: “N’wananga, hikwalaho ka yini u hi tirhisile hi ndlela leyi? Waswivo, tata wa wena na mina a hi ku lava hi ri eku karhatekeni swinene.” Yosefa na Mariya a va hambanile na Yesu hi masiku manharhu. U nga tlangela mhaka leyi ha yona a va vilela ehenhleni ka laha n’wana wa vona wa jaha wa malembe ya 12 hi vukhale a a ri kona.—Luka 2:48.

Hikwalaho ka yini Yosefa na Mariya va lahlekeriwe hi Yesu? Muhlamuseri la tivekaka swinene u va sorile hikwalaho ka leswi, a tsala a ku: “Hi ku tiva xuma lexi a va ri na xona, hikwalaho ka yini va teka nkarhi wo leha va nga xi languti? Marhumbu ni vunene bya manana a swi ri kwihi?” Kambe hakunene, tanihi laha hi nga ta swi vona ha kona, nkambisiso lowukulu wa mhaka leyi wu susa xisolo lexikulu eka Yosefa na Mariya.

Mhaka hi leswaku Bibele yi komba leswaku Mariya a a ri wansati ni manana lonene. Ntsumi Gabriyele, loko yi tile ku ta vhumba ku velekiwa ka Yesu, yi vule leswaku “u kumile tintswalo emahlweni ka Xikwembu.” (Luka 1:28, 30) Hi ku swi rhandza u amukele xiavelo xo veleka n’wana loyi wo hlawuleka wa xinuna, kun’we ni vutihlamuleri lebyikulu byo kurisa ni ku n’wi letela. A a ri wansati wa ku titsongahata ni ripfumelo leri tiyeke eka Xikwembu. Endzhaku ka ku velekiwa ka Yesu, u endle hinkwaswo leswi a swi laviwa hi Nawu wa Yehova, ‘hi laha ku tsariweke ha kona.’—Luka 1:38, 45-48; 2:21-23, 39.

Yosefa, wanuna loyi a tekeke Mariya ivi a va tatana wa muwundli wa Yesu, na yena a a ri wanuna lonene, wo lulama loyi a veke ni ku vulavurisana ni ntsumi ya Yehova hi makhamba ya mune. (Matewu 1:19, 20; 2:13, 19, 22) Tsundzuka, Yehova u hlawule Yosefa na Mariya ku wundla N’wana wa Yena wo vangama, la nga swakwe. Xana Xikwembu a xi ta endla leswintsongo ku tlula ku hlawula mpatswa lowu a wu ta endla kahle eku pfuneni ka n’wana loyi ku kulela eka vutlhari bya Xikwembu?

Kavula, vatswari namuntlha hi laha ku fanaka va karhateka hi vana va vona hikwalaho ka ndhawu leyi nga ni khombo ni ya vutilawuri leyi va nga eka yona. Naswona va swi tiva leswaku vana va vona a va hetisekanga, tanihi leswi Yesu a a ri tano. Hambi swi ri tano, hi nga pfuneka eka xikombiso xa Yosefa, Mariya na Yesu.