Swikombiso Swimbirhi Leswikulu Swa Rirhandzu Leswi Tshameke Swi Endliwa
“Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka eka yena a . . . va ni vutomi lebyi nga heriki.”—YOHANE 3:16.
1. Xiga lexi nge “Xikwembu i rirhandzu” xi vula yini?
“XIKWEMBU i rirhandzu.” Muapostola Yohane u vule xiga xexo kambirhi. (1 Yohane 4:8, 16) Ina, Yehova Xikwembu u ni rirhandzu hayi hi leswi a nga ni vutlhari, vunene ni matimba; I rirhandzu. I muendli ni mukombisi wa rirhandzu. U nga ha tivutisa u ku: ‘Xana ndza swi tiva leswaku ha yini sweswo wu ri ntiyiso? Xana ndzi nga nyika un’wana nhlamuselo leyi twalaka, leyi seketeriweke hi vumbhoni kumbe swikombiso leswi kombisaka leswaku I rirhandzu? Naswona swi na nsusumeto wihi evuton’wini ni le mintirhweni ya mina?’
2. Xikwembu xi nyike swikombiso swihi leswi vonakaka swa rirhandzu ra xona?
2 I rirhandzu muni lerikulu swonghasi leri Yehova Xikwembu a ri chululeke ehenhla ka swivumbiwa swa yena swa vanhu emisaveni! Ehleketa hi ku xonga loku heleleke ni ntirho wa mahlo ya hina, ku hlamarisa ka marhambu ya hina layo tiya, matimba ya minsiha ya hina ni mintlhaveko ya ku khumbiwa ka hina. Hi na xivangelo xo phindha mintlhaveko ya mupisalema: “Nḍa ku nkhensa hikwalaho ka mahlori ya šiv̌umbeko ša mina.” Nakambe, xiya tintshava letikulu, swinambyana swo rhula swa mati yo tenga, masimu ya swiluva swa ximun’wana ni ku pela ka dyambu loku dzunekaka. “Oho Yehova! mitiro ya wena yi tarisile ku yini! U yi endlile hikwayo hi v̌utlhari; Misav̌a yi tele rifuwo ra wena.”—Psalma 139:14; 104:24.
3, 4. I swikombiso swihi leswi Matsalwa ya Xiheveru ya swi nyikelaka hi swikombiso swa Xikwembu swa rirhandzu?
3 Swikombiso swa rirhandzu ra Xikwembu a swi helanga loko swivumbiwa swa yena swo rhanga swa vanhu swi xandzukile. Hi xikombiso, Yehova u kombise rirhandzu hi ku pfumelela mpatswa wolowo leswaku wu tswala vana lava a va ta pfuneka eka lunghiselelo ra Yehova hi ku tirhisa “mbewu” ya yena ya xitshembiso. (Genesa 3:15) Endzhakunyana, u endle leswaku Nowa a lunghiselela ngalava ya ku hlayisa rixaka ra vanhu ni swivumbiwa swin’wana swa laha misaveni. (Genesa 6:13-21) Manuku u kombise rirhandzu lerikulu eka Abrahama, loyi a tiviweke tanihi nakulobye wa Yehova. (Genesa 18:19; Esaya 41:8) Loko xi ponisa vatukulu va Abrahama evukhumbini bya Egipta, Xikwembu xi nyike xikombiso xin’wana xa rirhandzu ra xona, hi laha hi hlayaka ha kona eka Deuteronoma 7:8: “Hi leŝi Yehova a mi ranḍaka . . . hikwalaho ka ŝona Yehova a mi humeseke hi v̌oko ra matimba.”
4 Hambi leswi Vaisrayele va hambeteke va kombisa ku pfumala ku nkhensa naswona va xandzuka hi ku phindha-phindha, Xikwembu a xi va lahlanga ni kan’we. Kambe, xi va khongoterile hi rirhandzu xi ku: “Hunḍukani, mi hunḍuka e tindleleni ta ṅwina le’to biha, hikuv̌a mi rhanḍa e ku fa hikwalaho ka yini, ṅwina yindlu ya Israel?” (Ezekiel 33:11) Hambi swi ri tano, hambi leswi Yehova a nga xikombiso xa rirhandzu, nakambe u lulamile ni ku tlhariha. Xisweswo nkarhi wu fikile laha vanhu va yena lava nga yingisiki va fikeleleke mpimo wa ku leha ka yena mbilu! Va fike eka yinhla ya leswaku “ku nga ha v̌i na ku ponisiwa,” kutani u va tshikile va nghena evuhlongeni bya Babilona. (2 Tikronika 36:15, 16) Hambi ku ri kwalaho rirhandzu ra Xikwembu a ri helelanga makumu. Xi endle leswaku endzhaku ka 70 wa malembe masalela ya vona ya pfumeleriwa leswaku ya tlhelela etikweni ra ka vona ra ntumbuluko. Hlaya Psalma 126 kutani u vona eka yona ndlela leyi lava vuyeke va titweke ha yona.
Ku Lunghiselela Xikombiso Xa Yena Lexikulu Xa Rirhandzu
5. Ha yini ku nga vuriwaka leswaku ku rhumela N’wana wa xona emisaveni a ku ri xikombiso xa rirhandzu ra Xikwembu?
5 Ku ya emahlweni ni matimu nkarhi wu fikile eka Yehova wa leswaku a nyika xikombiso lexikulu ngopfu xa rirhandzu ra yena. A ku ri rirhandzu ra gandzelo hi xiviri. Loko xi lunghiselela leswi, Xikwembu xi endle leswaku vutomi bya N’wana wa xona la tswariweke a ri yexe byi hundziseriwa byi suka eka vukona bya moya ematilweni byi ya embelekweni ya Mariya ntombhi ya Muyuda. (Matewu 1:20-23; Luka 1:26-35) Anakanya vuxaka byo hlawuleka lebyi veke kona exikarhi ka Yehova ni N’wana wa yena. Hi hlaya malunghana ni vukona bya Yesu a nga si va munhu ehansi ka xikombiso xa vutlhari lebyi kombisiweke: “Ndzi ve mutirhi lonkulu etlhelo ka [Xikwembu], naswona ndzi ve loyi a xi n’wi tsakela ngopfu siku na siku, mina ndzi la tsakeke emahlweni ka xona hi masiku.” (Swivuriso 8:30, 31, NW) Kutani xana u nge pfumeli leswaku ku pfumelela N’wana wa Yena la tswariweke a ri swakwe a suka emahlweni ka Yena a ku ri ku tinyikela eka Yehova ke?
6. I ku tsakela kwihi ka tatana loku Yehova a faneleke a ve na kona eka vutomi bya vuhlangi bya Yesu ke?
6 Handle ko kanakana, Yehova u langute ku kula ka n’wana wa yena ku sukela eku sunguleni ka vumunhu ku ya emahlweni hi ku tsaka lokukulu. Moya lowo kwetsima wa Xikwembu wu funengete Mariya leswaku ku nga vi na nchumu lowu nga onhaka n’wana (embryo) la kulaka. Yehova u endle leswaku Yosefa na Mariya va ya eBetlehema ku ya tsarisa leswaku Yesu a ta velekeriwa kwalaho eku hetisekeni ka Mikea 5:2. Hi ku tirhisa ntsumi Xikwembu xi tsundzuxe Yosefa hi kungu ra Hosi Heroda ro dlaya, xi vangela Yosefa ni ndyangu wa yena leswaku va balekela aEgipta ku fikela loko Heroda a fa. (Matewu 2:13-15) Xikwembu xi fanele xi yise ku tsakela ka xona eka ku kula ka Yesu emahlweni. Mayana ntsako lowu veke kona eka Xikwembu loko xi hlalela Yesu wa malembe ya 12 a hlamarisa vadyondzisi ni van’wana etempeleni hi swivutiso ni tinhlamulo!—Luka 2:42-47.
7. I swikombiso swihi swinharhu leswi kombiseke ku tsakela ka Xikwembu eka vutirheli bya Yesu?
7 Khume nhungu wa malembe endzhakunyana Yehova u hlalele loko Yesu a ye eka Yohane Mukhuvuri leswaku a ya khuvuriwa. Kutani u rhumele moya wa yena lowo kwetsima ehenhla ka Yesu hi ku tsaka ivi a ku: “Loyi i N’wananga, la rhandzekaka, loyi ndzi n’wi tsakelaka swinene.” (Matewu 3:17) Tatana un’wana ni un’wana wa Mukriste a nga anakanya ndlela leyi swi nga tsakisaka ha yona eka Xikwembu ku landzela vutirheli bya Yesu ni ku vona ndlela leyi a kongomiseke ku dzuneka hinkwako eka Tata wakwe wa le tilweni. Eka khamba rin’wana Yesu u yise vaapostola van’wana entshaveni leyi tlakukeke. Kwalaho Yehova u endle leswaku Kriste a vangama hi ku vangama lokukulu, kutani Tatana u te: “Loyi i N’wananga, la rhandzekaka, loyi ndzi n’wi tsakelaka, n’wi yingiseni!” (Matewu 17:5) Yehova u endle leswaku rito ra yena ri twiwa ra vunharhu loko a hlamula xikombelo xa Yesu leswaku Xikwembu xi dzunisa vito ra xona n’wini. Yehova u te: “Ndzi ri dzunisile, ndzi ta engeta ndzi ri dzunisa.” Kahle-kahle leswi ngopfu-ngopfu a swi vuleriwa ku pfuna Yesu, hikuva van’wana lava a va ri na yena va ehlekete leswaku ntsumi yi vulavurile, kasi van’wana va ehlekete leswaku ri dumile.—Yohane 12:28, 29.
8. U titwa njhani hi rirhandzu ra Xikwembu?
8 Xana u fikelele makumu wahi eka mpfuxeto lowu wo koma wa mintirho ya Xikwembu eka N’wana wa xona ni ku tsakela ka xona eka yena? Swi fanele swi va erivaleni leswaku Yehova u rhandza N’wana wa yena la nga un’we swinene ngopfu. U ri karhi u tsundzuka sweswo, naswona u tlangela ndlela leyi kwalomu ka mutswari un’wana ni un’wana wa munhu a nga titwaka ha yona hi n’wana la nga un’we ntsena, xiya leswi endlekeke endzhakunyana—rifu ra gandzelo ra Yesu.
Xikombiso Lexikulu Ngopfu Xa Rirhandzu
9, 10. Xikombiso lexikulu xa rirhandzu ra Xikwembu eka vanhu a ku ri xihi, xi tiyisisa mhaka yihi ya matsalwa?
9 Bibele yi komba leswaku Tata wa hina wa le matilweni u na ntwelo-vusiwana. Eka Esaya 63:9 hi hlaya malunghana ni vanhu va yena va Israyele: “E ku karatekeni ka v̌ona, a a karateka na yena, kutani nṭumi ya mombo wa yena yi v̌a ponisile. E riranḍwini ra yena ni v̌uneneni bya yena, o v̌a kuṭurile a ri yena, o v̌a seketerile, o v̌a tlakurile masikwini hikwawo ya khale.” Swi fanele swi hlomule mbilu swonghasi eka Yehova ku twa ni ku vona “ku huwelela hi matimba ni ku rila hi mihloti” ka Yesu. (Vaheveru 5:7) Yesu u khongele hi ndlela yoleyo exivandleni xa Getsemani. A a endliwe mubohiwa, a langutana ni ndzingo wo vungunyiwa, a biwa ni ku hlekuriwa, naswona harhi ya mitwa yi tlhandlekiwe enhlokweni ya yena. Tsundzuka, Tata wa yena la nga ni rirhandzu a a xiya hinkwaswo leswi. U tlhele a vona Yesu a xaniseka ehansi ka nhlomulo wa mhandze ya nxaniso naswona u hlalele loko eku heteleleni N’wana wa yena a vambiwa eka mhandze yoleyo. Hi nga rivali leswaku Xikwembu a xi ta va xi sivele ku xaniseka loku eka N’wana wa xona la rhandzekaka. Kambe Yehova u tshikete Yesu leswaku a xaniseka swinene. Leswi Xikwembu xi nga na mintlhaveko, eka xona ku vona swiendlakalo leswi handle ko kanakana swi vange ku vaviseka lokukulu loku a xi nga si tshama xi va na kona kumbe loku xi nga ta ka xi nga ha vi na kona.
10 Hikwalaho ka hinkwaswo leswi nga laha henhla, hi nga vona ndlela leyi ya twalaka swinene ha yona marito ya Yesu eka Nikodema: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena a nga lovi, kambe a va ni vutomi lebyi nga heriki.” (Yohane 3:16) Ya nkoka lowu fanaka i marito ya Yohane, muapostola la rhandzekaka wa Yesu: “Rirhandzu ra Xikwembu ri vonakisiwile eka hina hi ndlela leyi: Hi leswaku Xikwembu xi rhumile N’wana la nga un’we wa xona ku ta laha misaveni, . . . ku va mhamba ya swidyoho swa hina.”—1 Yohane 4:9, 10.
11. Xana muapostola Pawulo u tlakusa xikombiso lexikulu ngopfu xa rirhandzu ra Xikwembu hi ndlela yihi?
11 Kutani, u nga twisisa leswaku hikwalaho ka yini muapostola Pawulo, eka Varhoma 5:6-8, a kandziyise rirhandzu lerikulu ra Yehova Xikwembu hi marito lawa: “Hi leswaku loko ha ha tsanile, Kriste ú fele vabihi, hi nkarhi lowu vekiweke hi Xikwembu. Swi nga nonon’hwa eka munhu ku fela munhu un’wana la lulameke, kumbe xana un’wana a ta kanya mbilu a fela munhu lonene. Kambe Xikwembu xi kombisa erivaleni rirhandzu ra xona eka hina, hi leswi Kriste a nga hi fela loko ha ha ri vadyohi.” Entiyisweni, hi ku endla leswaku N’wana wa yena la nga un’we a ta emisaveni, a xaniseka, naswona a fa hi rifu leri vavisaka ngopfu, Yehova Xikwembu u endle xikombiso lexikulu ngopfu xa rirhandzu.
Xikombiso Xa Vumbirhi Lexikulu
12, 13. (a) Xikombiso xa Yesu xa rirhandzu a xi ri xa nkoka hi ndlela yihi ke? (b) Xana Pawulo u yisa mianakanyo eka rirhandzu lerikulu ra Yesu hi ndlela yihi?
12 U nga ha vutisa, ‘xikombiso xa vumbirhi lexikulu ngopfu xa rirhandzu a ku ri xihi ke?’ Yesu Kriste u te: “A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye.” (Yohane 15:13) Hakunene, eka matimu hinkwawo ya munhu, ku ve ni lava nyikeleke vutomi bya vona hikwalaho ka van’wana. Kambe bya vona a ku ri vutomi lebyi pimiweke ntsena; hi ku hatlisa kumbe endzhakunyana a va ta fa. Hambi swi ri tano, Yesu Kriste, a a ri munhu la hetisekeke loyi a a ri ni mfanelo ya vutomi. A a nga langutananga ni rifu ra ndzhaka tanihi leswi vanhu hinkwavo a va ri tano; naswona ku hava loyi a a ta va a teke vutomi bya Yesu hi nkanu handle ka mpfumelelo wa xona. (Yohane 10:18; Vaheveru 7:26) Tsundzuka marito ya yena: “Xana u ehleketa leswaku ndzi nga hluleka ku khongela Tata wa mina a ndzi pfuna sweswi-sweswi hi mavandla ya tintsumi lama tlulaka 12 xana?”—Matewu 26:53; Yohane 10:17, 18.
13 Hi nga ya emahlweni hi tlangela rirhandzu leri katsekeke eka leswi Yesu a swi endleke hi ku languta mhaka leyi landzelaka: U sukele vukona lebyi dzunekaka tanihi xivumbiwa xa moya ematilweni laha a hanyeke tanihi munghana lonkulu ni mutirhi-kulobye wa Mufumi wa misava hinkwayo ni Hosi ya hi laha ku nga heriki. Hambi swi ri tano, hikwalaho ka rirhandzu leri nga hava vutianakanyi, Yesu u endle hi laha muapostola Pawulo a hi byelaka ha kona: “A a ri ni xiyimo xin’we ni Xikwembu, kutani a nga tekanga ku ringana ka yena ni Xikwembu xi va xilo lexi a nga tikhomelelaka ha xona, kambe ú titshiketile hi ku teka xiyimo xa nandza, a velekiwa a ri la fanaka ni vanhu. Loko a voniwile a ri la kotisaka munhu, ú titsongahatile, a va loyi a yingisaka ku fikela eku feni, a fa hi rifu ra [mhandze ya nxaniso].”—Vafilipiya 2:6-8.
14. Xana muprofeta Esaya u byi tiyisise ku yini vumbhoni bya xikombiso lexikulu xa rirhandzu ra Yesu?
14 Xana xexo a ku nga ri xikombiso xa rirhandzu? Entiyisweni a ku ri xona—lexi landzelaka lexiya xa Yehova Xikwembu ntsena, Tata wakwe wa le tilweni. Marito ya vuprofeta ya Esaya ndzima 53 ya tiyisa vumbhoni bya hinkwaswo leswi Yesu a swi tiyiseleke: “A soriwa, a ṭhikiwa hi v̌anhu, munhu wa mahlomulo, l’a tiv̌aka mašangu. . . . Kunene u rwele mašangu ya hina, u hi tekerile mahlomulo ya hina, kasi hina a hi ku: Wa biwa, wa šupuriwa hi Šikwembu, wa ṭongahatiwa! Kambe yena, o tlhav̌iwile hikwalaho ka ŝidyoho ŝa hina, o ṭhov̌iwile hikwalaho ka ku homboloka ka hina. . . . hi ṭhunguriwa hi timbanga ta yena. . . . a tinyiketele rifu.”—Esaya 53:3-5, 12.
15, 16. Leswaku a ku ri ku tinyikela eka Yesu swi nga voniwa eka marito wahi ya yena?
15 Hikwalaho ka hinkwaswo leswi a swi katsiwa hi rifu ra yena, Yesu u khongerile exivandleni xa Getsemani a ku: “Tatana, loko swi nga endleka, xinwelo lexi a xi fambele kule na mina! Ntsena ku nga endliwi ku rhandza ka mina, kambe a ku endliwe ku rhandza ka wena!” (Matewu 26:39) Yesu a a kombela yini loko a vula marito wolawo ke? Xana a a lava ku kombela ku tshika ku va “Xinyimpfana xa Xikwembu lexi susaka swidyoho swa misava”? (Yohane 1:29) Hi ku olova a swi nga ta vula sweswo, hikuva ku sukela khale Yesu u byele vadyondzisiwa va yena leswaku u ta xaniseka ivi a fa, a va a komba ni muxaka wa rifu leri a a ta fa hi rona. (Matewu 16:21; Yohane 3:14) Kutani Yesu u fanele a ve ni xin’wana emianakanyweni loko a khongerisa sweswo.
16 Handle ko kanakana Yesu a a khumbeka ehenhleni ka xihehlo xa ndzhukano lexi a xi voneke leswaku xi ta tiseriwa ku lwisana na yena, vugevenga lebyikulu ngopfu lebyi Muyuda a nga vaka na nandzu wa byona hi xiviri. Ha yini a khumbeka ehenhleni ka xihehlo xo hemba? Hikuva rifu ra yena ehansi ka xiyimo xexo a ri ta tisa ndzhukano ehenhla ka Tata wakwe wa le tilweni. Ina, N’wana wa Xikwembu la nga hava xivati, loyi a a rhandza ngopfu ku lulama naswona a venga vubihi ni loyi a teke emisaveni leswaku a ta kwetsimisa vito ra Tata wakwe, manuku a a fanele ku dlayiwa hi vanhu va Xikwembu tanihi murhuketeri wa Yehova Xikwembu.—Vaheveru 1:9; Yohane 17:4.
17. Hikwalaho ka yini muxaka wa rifu leri Yesu a langutaneke na rona ri tikomba ri ri ndzingo lowu vavaka eka yena?
17 Emahlweninyana evutirhelini bya yena Yesu u te: “Ndzi ni nkhuvulo lowu ndzi faneleke ku khuvuriwa ha wona, kutani ndzi le ku karhatekeni lokukulu, ku kondza loko nkhuvulo lowu wu hetiseka!” (Luka 12:50) Manuku a ku ri nhlohlorhi ya nkhuvulo lowu. Entiyisweni hi yona mhaka leyi nyuku wa yena wu faneke ni mathonsi ya ngati loko a khongela. (Luka 22:44) Ku tlula kwalaho, a ku ri ni ndzhwalo lowukulu ehenhla ka makatla ya yena vusiku byebyo, ndzhwalo lowu tlulaka matimba ya hina yo wu rhwala. A a swi tiva leswaku u fanele ku kombisa ku tshembeka hikuva loko a a lo tsandzeka, vona ndzhukano lowu a ku ta va wona emahlweni ka Yehova! Sathana a a ta vula leswaku a a ri na ntiyiso naswona Yehova Xikwembu a a hoxile. Kambe vona ndzhukano lowu Sathana a wu kumeke hikwalaho ka leswi Yesu a kombiseke ku tshembeka ku fikela eku feni! Xisweswo u kombise Sathana a ri muhembi wo sungula, la xiyekaka ni lonkulu.—Swivuriso 27:11.
18. Ha yini Yesu a ve ehansi ka ntshikilelo wo chavisa hi vusiku byebyo?
18 Yehova Xikwembu a a ri ni ku tiyiseka ko tano eka ku tshembeka ka N’wana wa yena lerova a vhumba leswaku Yesu a a ta kombisa ku tshembeka. (Esaya 53:9-12) Kambe na Yesu u swi tivile leswaku ndzhwalo wo hlayisa vutshembeki wu le henhla ka yena. A a ta va a tsandzekile. A a ta va a dyohile. (Luka 12:50) Vutomi bya yena n’wini lebyi nga heriki ni lebyiya bya rixaka hinkwaro ra vanhu byi lengalenge exiringanyetweni vusiku byebyo. Vona ku xaniseka loku chavisaka loku faneleke ku ve kona! Loko Yesu a a lo tsana naswona a dyoha, a a nga ta va a tise musa hi xisekelo xa gandzelo ra un’wana, hi laha hina swivumbiwa leswi nga hetisekangiki hi nga endlaka ha kona.
19. Xana Yesu u endle yini hi xiendlo xakwe lexi nga hava vutianakanyi?
19 Entiyisweni, ku tiyisela ka Yesu hi Nisan 14, 33 C.E., a ku ri xikombiso lexikulu xa rirhandzu leri nga hava vutianakanyi lexi nga siki tshamaka xi endliwa hi munhu wihi kumbe wihi, lexi landzelaka lexiya xa Yehova Xikwembu ntsena. Naswona mawaku swilo leswinene swonghasi leswi a hi endleleke swona hi rifu ra yena! Hi rifu ra yena u ve “Xinyimpfana xa Xikwembu lexi susaka swidyoho swa misava!” (Yohane 1:29) U pfulele 144 000 ya valandzeri va mikondzo ya yena leswaku va va tihosi ni vaprista naswona va fuma na yena hi gidi ra malembe. (Nhlavutelo 20:4, 6) Tlhandla-kambirhi, “ntshungu lowukulu” wa “tinyimpfu tin’wana” namuntlha wa pfuneka eka gandzelo ra Kriste naswona wu nga langutela ku pona ku hela ka mafambiselo lawa ya khale ya swilo. Lava va ta va vo sungula ku tsakela mikateko ya paradeyisi ya laha misaveni. Handle ko kanakana ku ta tlhela ku va na tibiliyoni ta vanhu lava nga ta pfuxiwa hikwalaho ka leswi Yesu a swi endleke. Na vona, va ta va ni nkarhi wo tsakela vutomi lebyi nga heriki eParadeyisini ya laha misaveni. (Nhlavutelo 7:9-14; Yohane 10:16; 5:28, 29) Entiyisweni, “ku nga khathariseki leswaku switshembiso swa Xikwembu swi tarise ku yini, swi ve ina hi ku tirhisa yena,” hi leswaku, ha Yesu Kriste.—2 Vakorinto 1:20.
20. Xana hi fanele ku swi amukela njhani swikombiso swimbirhi leswikulu swa rirhandzu eka Yehova Xikwembu na Yesu Kriste ke?
20 Swa fanela hakunene leswaku hi kombisa ku tlangela eka hinkwaswo leswi Yehova Xikwembu na Yesu Kriste va hi endleleke swona hi ku hi nyika swikombiso leswi swikulu ngopfu swa rirhandzu. Hi va kolota ku tlangela ko tano, naswona leswaku hi pfuneka hi laha ku heleleke hakunene, hi fanele ku kombisa ku tlangela ko tano. Xihloko lexi landzelaka xi ta kombisa tin’wana ta tindlela to antswa ngopfu leti hi nga endlaka leswi ha tona.
Wa Tsundzuka Xana?
◻ I swikombiso swihi swa rirhandzu ra Xikwembu leswi vanhu hinkwavo va nga swi vonaka?
◻ Hi nga swi tivisa ku yini leswaku Yehova u vavisekile loko a vona N’wana wa yena a xaniseka?
◻ Rifu ra Yesu ra ku fela vanhu ri hambanisa ku yini ni leriya ra van’wana lava nyikeleke hi vutomi bya vona?
◻ Xana hi fanele ku khumbeka njhani hi rirhandzu leri kombisiweke eka hina hi Yehova na Yesu?