Muxaka Lowuntshwa Wa Vutlhari Bya Xikwembu

“ŠIKWEMBU ši ku ka Muše: ‘HI MINA LOYI-A-NGA-KONA.’ Kambe ši ku: ‘U ta v̌urisa ŝeŝo e ka v̌ana v̌a-Israel, “LOYI-A-NGA-KONA o nḍi rumile ka ṅwina.”’” (Eksoda 3:14) Yehova u hlamusele Muxe leswaku emahlweni ka leswi hambi ya ri malandza ya Yena a ya twisisanga nkoka lowu teleke wa vito Rakwe. I Xikwembu xa xikongomelo naswona nkarhi na nkarhi xi hetisisa ku rhandza ka xona. Loko swiyimo swi sivela, xi nga cinca maendlelo ya xona yo fikelela xikongomelo xa xona. Xi tlharihile!

Sathana hi yexe a nga kalanga a tlangela leswi vito ra Xikwembu ri vuleke swona. Kahle-kahle, a a tiva hi ta murhi wa vutomi entangeni wa Edeni. Loko a a lo yisa Adamu na Evha eka wona, sweswo ingi swi vonake swi veka Yehova ekhombyeni: ku hlayisa rito ra yena ra leswaku xidyoho a xi ta vula rifu ra vona kumbe ku hlayisa rito ra yena ehenhleni ka murhi wa vutomi. (Genesa 2:9; 3:1-6) Eka xiendlakalo xihi na xihi, Sathana a a fanele ku nyumisiwa.

Kutani Xikwembu xi sungule ku kombisa vutlhari lebyi nga rindzeriwangiki hi vana va xona va moya ni lebyi eku sunguleni a byi nga hlavuteriwanga eka vona. (Ringanisa Vaefesa 3:10.) Xi sungule ku tirhisa nongonoko wa swileriso ni swiendlakalo leswi hi nkarhi wo leha hi ndlela yo hlamarisa a swi ta komba vutlhari bya xona lebyikulu ni vuswikoti bya xona byo hetisisa xikongomelo xa xona lexi nga heriki, lexi a xi ta tata misava hi vanhu lava tsakeke, lava tshembekaka lava a va ta hanya hi masiku eParadeyisini. (Genesa 1:27, 28) Nkarhi na nkarhi Xikwembu a xi ta sivela matshalatshala ya Sathana yo kavanyeta.

Xihundla Xa Paluxiwa

Hi ku anghwetla endzhaku ka ku xandzuka ko sungula, Xikwembu xi teke goza. Hi ku hatlisa xi vumbele mpatswa lowu dyoheke huvo ivi xi tiyisa xigwevo xa xona xa rifu hikwalaho ko pfumala ku yingisa. Ku vuriwa yini hi ta ku dya ka Adamu na Evha murhi wa vutomi? “Yehova Šikwembu a ku: Maŝiv̌o, munhu o hunḍukile, a kotisa uṅwana wa hina loko ku ri ku tiv̌a le’ŝo saseka ni le’ŝo biha; kambe ŝeŝi, a nga fanekeli ku ṭhambuluta v̌oko a teka na wona muri wa v̌utomi, a dya, a hanya hi laha ku nga heriki.—Kav̌a loko Yehova Šikwembu a ṅwi humesa e ntangeni wa Eden.”—Genesa 3:17-23.

Hi nkarhi lowu Xikwembu nakambe xi sungule ntirho wa Muevhangeli, kumbe Mutwarisi wa mahungu lamanene. Xi vule vuprofeta byo sungula: “Yehova Šikwembu a ku ka nyoka: . . . Nḍi ta v̌eka ku v̌engana e šikari ka wena ni wansati, ni šikari ka rišaka ra wena ni rišaka ra wansati; ri ta ku faya nhloko, wena u ri luma širenḍe.” (Genesa 3:14, 15) Malembe xidzana endzhaku muapostola Pawulo u hlamuserile: “Leswi vumbiweke [vanhu] swi nyiketiwile eka swa hava, ku nga ri hi ku rhandza ka swona, kambe hi ku rhandza ka Loyi a swi nyiketeke. Kambe ku langutela ku kona.”—Varhoma 8:20.

Ina, endzhaku ka sweswo, vanhu a va ta wela hi ku helela eka rifu leri kumiweke tanihi ndzhaka eka Adamu, kambe Xikwembu a xi vula xikongomelo xa xona xo ponisa vana lava yingisaka va Adamu. Kambe, a ku ri xihi ‘xisekelo xa ku langutela’? Xana a xi ta ponisa vanhu njhani ivi xi tlhela xi hlayisa xigwevo xa xona xa rifu hikwalaho ka xidyoho? Leswi a ku ta va vutlhari lebyi tumbeleke bya Xikwembu; byi katse “xihundla lexi a xi tumberile malembe ni malembe, eka tinxaka hinkwato, kambe sweswi xi pfuleteriwile eka vahlawuriwa va Xikwembu.” (Vakolosa 1:26; 1 Vakorinto 2:7, 8) Hambi leswi vanhu lava tshembekaka va khale a va nga xi twisisi xihundla lexi, a va ri na ntshembo wa leswaku Xikwembu a xi ta va ponisa. Phela, hambi ku ri tintsumi a ti hisekela ku dyondza hi laha Yehova a nga ta hetisisa xikongomelo xakwe ha kona! (1 Petro 1:10-12) Xana wa xi twisisa xihundla lexi?

Ku Ponisiwa Hi Nkutsulo

Hakantsongo-ntsongo hi malembe xidzana yo tala, Yehova u engetele marungula eka xitshembiso xakwe xo sungula. Eka Abrahama la tshembekaka u tshembise rixaka leri mikateko ya hinkwavo vanhu lava yingisaka a yi ta ta ha rona. (Genesa 22:15-18) Hi Yakobo u hlavutele leswaku rixaka a ri ta va hosi leyi humaka erixakeni ra Yuda. (Genesa 49:10) Hi nkarhi lowu vavanuna lava chavaka Xikwembu va tshembe ku pfuka ka vafi, hambi leswi a va nga swi twisisi swinene leswaku leswi a swi ta endleka njhani. (Yobo 14:14, 15; Vaheveru 11:19) Eku heteleleni, Xikwembu xi tshembise Davhida leswaku Hosi leyi taka, kumbe Mesiya, a ku ta va ntukulu wa Davhida naswona a a ta fuma hi laha ku nga heriki.—2 Samuel 7:16.

Vaprofeta hinkwavo va engetele ku twisiseka kuntsongo ka xihundla, kambe vanhu a va nga ta vona xifaniso lexi heleleke. Eku heteleleni, nkarhi wa ku vonaka ka Mesiya wu fikile, kutani ke, emakumu, vutlhari lebyi byo hambana-hambana bya Xikwembu byi vonake erivaleni. Byi vulavule hi Yesu Kriste ni lunghiselelo ra vutomi byakwe bya munhu la hetisekeke tanihi nkutsulo lowu fanelaka wa vanhu. Hi ku va na xisekelo xo tano, xikongomelo hinkwaxo lexi vangamaka xa Yehova hi Mfumo a xi ta ya emahlweni. Xana u twisisa nkutsulo?

Eka Varhoma tindzima 5 na 6, Pawulo u nyikela nhlamuselo leyinene ya wona. Eka Varhoma 5:12 u hlamusela xidyoho xa hina xa ndzhaka na rifu. U ya emahlweni a komba hi laha vuyelo bya xidyoho xin’we ntsena xa Adamu la hetisekeke ni ku lahlela vana va yena vutomi a swi ta ringanisiwa ha kona hi vutomi byin’wana bya munhu la hetisekeke. Byebyi byi tikombe byi ri vutomi bya “munhu un’we ntsena a nga Yesu Kriste.” (Tindzimana 15-21; nakambe vona 1 Timotiya 2:5, 6.) Hikwalaho ka yini Yesu a a ta swi kota ku lunghiselela nkutsulo? Hikuva a a ri N’wana wa Xikwembu, Yesu a a ri “wo hlawuleka, wo pfumala nandzu, wo kala xivati, wo hambana ni vadyohi.” (Vaheveru 7:26; Luka 1:32, 33) A hi fanelanga ku ringeta ku hlamusela vuxokoxoko bya mukhuva wa ku velekiwa ka Yesu. Ntsumi Gabriyele yi tshembise mana wa Yesu, Mariya, na hina, leswaku ku hava lexi hlulaka Xikwembu. (Luka 1:37) Kutani Yesu, hambi leswi a velekiweke hi wansati wa ntukulu wa Adamu, a a ri N’wana wa Xikwembu—kahle-kahle a ri munhu la hetisekeke. Ngati yakwe, kumbe vutomi, a byi durha ngopfu ku tlula ngati ya swihari swa ntsandza-vahlayi leswi swi endliweke magandzelo hi vaprista va rixaka ra Aroni va Israyele atempeleni eYerusalema. A a ri “Xinyimpfana xa Xikwembu lexi susaka swidyoho swa misava.”—Yohane 1:29; 3:16.

Xana Xikwembu a xi ta endla lunghiselelo leri hi Yesu ivi xi tama xa ha lulamile? Loko Xikwembu xi pfuxele N’wana wa xona evuton’wini hi siku ra vunharhu, ku humelele yini hi nkutsulo? Pawulo u hi tshembisa leswaku Xikwembu xi lulamile. Landzela ku anakanyisisa kakwe: “Kutani v̌a hlayiwa la’v̌a lulameke hi tintŝalo ta Šikwembu [hi ku nyikiwa], hi ku kuṭula lo’ku nga ka Yesu Kriste; Šikwembu ši ṅwi v̌ekile leŝaku yi ta v̌a mhamba ya la’v̌a pfumelaka e ka ngati ya yena; ši ta kombisa ku lulama ka šona (hi laha xi tshikeke swidyoho swo sungula, eminkarhini ya ku honisa ka xona)—ku kombisa ku lulama ka šona e mikarini ya ŝeŝi, leŝaku ši v̌a le’ši lulameke loko ši ri kari xi khanisa l’a nga ni ku pfumela e ka Yesu.” (Varhoma 3:24-26, Bibele ya Xitsonga) Xana leswi swi vula yini? Hi leswaku Yesu, tanihi munhu wa nyama ni ngati la hetisekeke, entiyisweni u file tanihi munhu ivi a tshama a file tanihi munhu hi masiku. U fe “kan’we loko a tinyiketile hi yexe.” (Vaheveru 7:27) Kutani nkutsulo i wa nkoka. Yesu u fe enyameni; hi siku ra vunharhu “u endliwile la hanyaka hi tlhelo ra moya.”—1 Petro 3:18.

Ntwanano Lowuntshwa Ni Xivumbiwa Lexintshwa

Sweswi hi vona xiphemu lexi fikaka enhlohlorhini xa xihundla. Ku va Yesu a tshembekile ku yisa eku feni swi n’wi endla a fanekela ku va Muprista Lonkulu wa Yehova ni Hosi. Hi ku halatiwa ka ngati yakwe u tiyise ntwanano lowuntshwa. Ntwanano lowu wuntshwa wu fanele ku humesa vanakulobye va le tilweni lava nga ta fuma na Yesu tanihi tihosi ni vaprista. (Nhlavutelo 5:9, 10; 20:4, 6) Va vumba rixaka lerintshwa, “xivumbiwa lexintshwa,” kutani sweswo hakunene i nchumu wun’wana!—Vagalatiya 6:15, 16.

Xiya: Xikwembu hi Kriste Yesu xi hlawula nhlayo ya vayimeri eka vanhu, vavanuna ni vavasati. Xi nga va vula lava lulameke ni ku va vula vana va moya. Hi nkarhi wun’wana lowu faneleke wa Xikwembu endzhaku ka rifu ra vona, xi va pfuxela etilweni ivi xi va nyika ku ka va nga fi, tanihi leswi xi hakeleke Yesu! (1 Petro 1:3, 4) Mawaku ntshembo lowu xi nga na wona eka ‘xivumbiwa xa xona lexintshwa’ ni ku tshembeka ka vona eka xona! Mawaku nhlamulo yonghasi eka loyi a va hehleke emahlweni ka Yehova! (Nhlavutelo 12:10) Hambi leswi va nga fiki na Yesu Kriste, va nge pfuki va pfumale vutshembeki eka Yehova. Kambe sweswo a swi helanga.

Paradeyisi Ya La Misaveni

Kriste Yesu, ni tihosi ni vaprista-kulobye va le tilweni, va ta vona leswaku xikongomelo xa Yehova hi munhu na misava xa hetiseka hi xitalo enkarhini wa ku Fuma kakwe ka Gidi ra Malembe. Hi ku tirhisa mimpfuno ya nkutsulo, Yesu u ta pfuxa vafi naswona lavo tshembeka exikarhi ka vona ni vaponi va makumu ya mafambiselo lawa yo biha u ta va tisa eku hetisekeni ka vumunhu. Hi nkarhi lowu fanaka, misava yi ta endliwa paradeyisi. Kutani ke hinkwavo lava aleke matshalatshala yo hetelela ya Sathana yo va onha va ta nyikiwa vutomi bya munhu la hetisekeke hi masiku. Sathana ni ntshungu hinkwawo wa yena lowo biha va ta heriseriwa makumu. Ku rhula ni vun’we swi ta va kona eka swivumbiwa hinkwaswo, swi lwela vuhosi bya Yehova ni ku fuma kakwe hi rirhandzu hi xitalo. Tintsumi ni vanhu va ta va va kombisile rirhandzu ro tshembeka eka Muvumbi na Xikwembu xa vona.—Nhlavutelo, ndzima ya 20.

Sweswi hi nga xi twisisa ku antswa xihundla. Kutani hi vone vutlhari bya Xikwembu lebyi tlulaka hambi ku ri makholo yakwe yo tumbuluxa eka misava ya swimilana ni swihari. Hi na xivangelo lexinene xo hlamala: “Oo! ku enta ka vukosi, ni vutlhari, ni vutivi bya Xikwembu! Makungu ya xona ma nga pimisiwa ku yini . . . Hikuva swilo hinkwaswo swi huma ka yena, swi kona hikwalaho ka yena, swi kongoma yena. Eka yena a ku ve ku dzuneka hi laha ku nga heriki! Amen!”—Varhoma 11:33-36.

[Xifaniso lexi nga eka tluka 7]

Vuyelo bya xidyoho xin’we xa Adamu la hetisekeke ni ku lahliwa ka vutomi bya yena ku nga ringanisiwa. Njhani? Hi vutomi byin’wana bya munhu la hetisekeke, lebyiya bya Yesu