Nkutsulo Wa Kreste, Ndlela Ya Xikwembu Ya Ku Ponisa

“Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—YOHANE 3:16.

1, 2. Hlamusela xiphiqo lexi veke kona malunghana ni rixaka ra vanhu.

A HI nge u ni vuvabyi lebyi handle ko kanakana byi nga ta ku dlaya loko u nga endliwi vuhandzuri. U nga titwisa ku yini loko mali leyi laviwaka ku endla vuhandzuri yi tele swinene lerova a wu nge swi koti ku yi hakela? Ku vuriwa yini loko mali ya vandyangu yi hlanganisiwe ni ya vanghana va wena na yona yi nga ta swi kota ku hakela? Ku nga va mhaka leyi vavisaka swinene loko wo langutana ni xiphiqo xa muxaka lowu!

² Leswi swi kombisa xiyimo lexi rixaka ra vanhu ri veke eka xona. Vatswari va hina vo sungula, Adamu na Evha va vumbiwe va hetisekile. (Deteronoma 32:4) A va ri ni ntshembo wo hanya hi laha ku nga heriki ni wa ku hetisisa xikongomelo xa Xikwembu: “Tŝalanani, mi anḍa, mi tata misav̌a, mi yi fuma.” (Genesa 1:28) Kambe, Adamu na Evha va xandzukele Muvumbi wa vona. (Genesa 3:1-6) Ku nga yingisi ka vona ku endle leswaku Adamu na Evha swin’we ni vana va vona lava nga si velekiwaka, va va ni xidyoho. Wanuna wo tshembeka Yobo endzhakunyana u te: “Šana ku nga huma munhu l’a baseke e ka munhu wa tšhyaka? Ku nga ka ku nga humi na uṅwe.”—Yobo 14:4.

3. Swi tise ku yini leswaku rifu ri fikelela vanhu hinkwavo?

³ Xisweswo, xidyoho xi fana ni vuvabyi lebyi tluleleke un’wana ni un’wana wa hina, hikuva Bibele yi vula leswaku “hinkwavo va dyohile.” Vuyelo bya xiyimo lexi byi veka vutomi ekhombyeni. Ina, “hakelo leyi tisiwaka hi xidyoho i rifu.” (Varhoma 3:23; 6:23) A nga kona eka hina la nga xi balekelaka. Vanhu hinkwavo va dyoha, hikwalaho vanhu hinkwavo va fa. Tanihi vatukulu va Adamu, hi velekiwe hi ri eka xiyimo lexi. (Pisalema 51:5) Pawulo u tsarile a ku: “Xidyoho xi [nghene] emisaveni hi munhu un’we, ni rifu hikwalaho ka xidyoho, kutani xisweswo rifu ri tlulele vanhu hinkwavo hikuva hinkwavo va dyohile.” (Varhoma 5:12) Kambe leswi a swi vuli swona leswaku ntshembo wo pona a hi na wona.

Ku Herisa Xidyoho Ni Rifu

4. Hikwalaho ka yini vanhu va nga ta ka va nga swi koti ku tiherisela vuvabyi ni rifu?

⁴ Xana ku laveka yini leswaku ku herisiwa xidyoho ni vuyelo bya xona, ku nga rifu? Handle ko kanakana ku laveka leswi tlulaka matimba ya munhu. Mupisalema u ririle a ku: “Hakelo ya vutomi bya munhu i yikulu ku tlurisa. Leswi munhu a nga swi hakelaka a swi nge ringani ku n’wi humesa esirheni, leswaku a hanya hi laha ku nga heriki.” (Pisalema 49:8, 9, Today’s English Version) Ina, hi nga ha swi kota ku lehisanyana vutomi bya hina hi malembenyana ma nga ri mangani, hi ku dya swakudya leswinene ni ku tikhathalela hi swa vutshunguri, kambe a nga kona eka hina loyi a nga herisaka xiyimo xa vudyoho lexi hi velekiweke na xona. A nga kona eka hina la nga herisaka vugono lebyi vangiwaka hi vudyuhari kutani a tlherisela miri wa hina eku hetisekeni loku Xikwembu a xi lave leswaku wu va xiswona eku sunguleni. Pawulo hakunene a a nga thatheli loko a tsale leswaku hikwalaho ka xidyoho xa Adamu, swivumbiwa leswi nga vanhu swi “vekiwe ehansi ka vuhava”—kumbe hi laha The Jerusalem Bible yi swi vekaka ha kona, “swi endliwe swi nga fikeleli xikongomelo xa swona.” (Varhoma 8:20) Kambe, lexi tsakisaka, Muvumbi a nga hi cukumetanga. U endle lunghiselelo ro herisa xidyoho ni rifu hi ku helela. Njhani?

5. Xana Nawu lowu nyikiweke tiko ra Israyele wu kombise ntikelo wa vululami hi ndlela yihi?

⁵ Yehovha u ‘rhandza vunene ni vululami.’ (Pisalema 33:5) Nawu lowu a wu nyikeke tiko ra Israyele wu kombisa leswaku vululami byi lava ku ringaniseriwa kahle naswona byi nga yi hi nghohe. Hi xikombiso, eka nhlengeleto lowu wa milawu, hi hlaya leswaku ‘vutomi byi fanele byi rihiwa hi vutomi.’ Hi marito man’wana, loko Muisrayele a dlaye munhu, a a fanele a lahlekeriwa hi vutomi byakwe hikwalaho ka loyi a nga n’wi dlaya. (Eksoda 21:23; Tinhlayo 35:21) Hi ndlela yoleyo vululami bya Xikwembu a byi ta va byi hetisisiwile.—Ringanisa Eksoda 21:30.

6. (a) Adamu a nga vuriwa mudlayi hi ndlela yihi? (b) Xana Adamu u lahle vutomi bya njhani, naswona ku laveka gandzelo ra njhani leswaku ku hetisisiwa vululami?

⁶ Loko Adamu a dyoha, u hundzuke mudlayi. Hi mongo wihi? Hi leswi a a ta hundzisela xiyimo xakwe xa vudyoho—hi ndlela yoleyo a hundzisela rifu—eka vatukulu va yena hinkwavo. I ku nga yingisi ka Adamu loku endlaka leswaku sweswi, mimiri ya hina yi tsana, hakatsongo-tsongo yi ya esirheni. (Pisalema 90:10) Xidyoho xa Adamu xi tlhela xi vula ni swin’wana leswikulu. Tsundzuka leswaku, leswi Adamu a lahlekeriweke ha swona, yena swin’we ni vana vakwe, a ku nga ri vutomi lebyi tolovelekeke bya malembe ya 70 kumbe ya 80 ntsena. U lahle vutomi lebyi hetisekeke—entiyisweni, vutomi lebyi nga heriki. Kutani loko ku ri hi leswaku ‘vutomi byi fanele byi rihiwa hi vutomi,’ xana i vutomi bya muxaka muni lebyi a byi fanele byi nyikeriwa leswaku vululami byi hetisisiwa emhakeni leyi? A swi kanakanisi leswaku a ku ta laveka vutomi bya munhu la hetisekeke—vutomi lebyi ku fana ni bya Adamu, a byi ta swi kota ku humesa vana lava hetisekeke. Loko byi nyikeriwa tanihi gandzelo, vutomi bya munhu la hetisekeke a byi nga ta hetisisa vululami ntsena kambe a byi ta tlhela byi endla leswaku xidyoho ni vuyelo bya xona, ku nga rifu, swi herisiwa hi ku helela.

Ku Hakela Leswi Koxiwaka Hi Xidyoho

7. Nyikela nhlamuselo ya rito “nkutsulo.”

⁷ Ntsengo lowu lavekaka ku hi kutsula eka xidyoho, eBibeleni wu vitaniwa ‘nkutsulo.’ (Pisalema 49:7) Hi Xitsonga, rito leri ri nga kombetela eka mali leyi laviwaka hi mutlhakisi leswaku yi ntshunxa munhu loyi a n’wi tlhakiseke. Kambe, nkutsulo lowu Yehovha a wu humeseke a wu katsi ku tlhakisiwa ka munhu. Kambe marihelo ya kona ma fana. Kahle-kahle, riendli ra rito ra Xiheveru leri hundzuluxeriweke va ku “nkutsulo” hi ku kongoma ri vula “ku siva.” Leswaku wu hakela xidyoho, nkutsulo wu fanele wu ringana ni lexi wu xi sivaka hi ku helela—ku nga vutomi lebyi hetisekeke bya Adamu.

8. (a) Hlamusela nawu wa ku tlhela u xava xa nchumu. (b) Xana nawu wa ku tlhela u xava xa nchumu wu hi khumba njhani hina tanihi vadyohi?

⁸ Leswi swi fambisana ni nsinya wa nawu lowu kumekaka eka Nawu wa Muxe—ku nga nsinya wa nawu wa ku xava nakambe. Loko Muisrayele a ri evuswetini kutani a tixavisa evuhlongeni eka munhu la nga riki Muisrayele, xaka ri nga ha tlhela ri n’wi xava (kumbe ri n’wi kutsula) hi ku hakela mali leyi a yi tekiwa yi ringana ni ntikelo wa hlonga rero. (Levhitika 25:47-49) Bibele yi vula leswaku tanihi vanhu lava nga hetisekangiki, hi “mahlonga ya xidyoho.” (Varhoma 6:6; 7:14, 25) I yini lexi lavekaka leswaku hi tlhela hi xaviwa? Hi laha hi voneke ha kona, ku lahleka ka vutomi lebyi hetisekeke a ku ta lava leswaku byi hakeriwa hi vutomi lebyi hetisekeke—a ku nga laveki swin’wana swo tlula sweswo.

9. Yehovha u ri endle njhani lunghiselelo ro herisa xidyoho?

⁹ Ina, hina vanhu hi velekiwa hi nga hetisekanga. A nga kona eka hina la fanaka na Adamu; a nga kona eka hina la nga humesaka nkutsulo lowu vululami byi lavaka wona. Hi laha swi boxiweke ha kona eku sunguleni, swi fana ni loko hi khomiwe hi vuvabyi lebyi dlayaka naswona hi nga swi koti ku hakelela vuhandzuri lebyi nga byi tshungulaka. Eka xiyimo xexo, xana a hi nga ta tlangela loko un’wana o nghenelela kutani a hakela mali ya kona? Leswi hi leswi Yehovha a swi endleke! U endle lunghiselelo ra ku hi kutsula exidyohweni, hi laha ku nga heriki. Ina, u tiyimiserile ku hi nyika leswi a hi nga ta swi kota ku swi endla hi ri hexe. Njhani? Pawulo u tsarile a ku: “Nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Yohane u hlamusele Yesu tanihi “Xinyimpfana xa Xikwembu lexi susaka xidyoho xa misava.” (Yohane 1:29) A hi voneni leswaku Yehovha u n’wi tirhise njhani N’wana wakwe la rhandzekaka leswaku a humesa nkutsulo.

“Nkutsulo Lowu Yelanaka”

10. Vuprofeta lebyi vulavulaka hi “mbewu” byi kombetele eka Yosefa na Mariya hi ndlela yihi?

¹⁰ Endzhakunyana ka nxandzuko wa le Edeni, Yehovha u twarise xikongomelo xakwe xo humesa “mbewu,” kumbe n’wana, la nga ta kutsula vanhu exidyohweni. (Genesa 3:15) Hi ku tirhisa ntlhandlamano wa tinhlavutelo ta le tilweni, Yehovha u boxe rixaka leri nga ta humesa mbewu leyi. Hi ku famba ka nkarhi, tinhlavutelo leti ti kombetele eka Yosefa na Mariya, mpatswa lowu tshembisaneke lowu tshamaka ePalestina. Hi norho, Yosefa u byeriwe leswaku Mariya u tikisiwe hi moya lowo kwetsima. Ntsumi yi te: “Yena u ta veleka n’wana wa jaha, naswona u fanele u n’wi thya vito ra Yesu, hikuva u ta ponisa vanhu va ka vona eswidyohweni swa vona.”—Matewu 1:20, 21.

11. (a) Yehovha u swi endlise ku yini leswaku N’wana wakwe a velekiwa a ri munhu wa nyama, la hetisekeke? (b) Hikwalaho ka yini Yesu a swi kotile ku nyikela “nkutsulo lowu yelanaka”?

¹¹ Handle ko kanakana loku a ku nga ri ku tika loku tolovelekeke, hikuva Yesu u tshame a hanya ematilweni a nga si va munhu wa nyama. (Swivuriso 8:22-31; Vakolosa 1:15) Vutomi byakwe byi hundziseriwe embelekweni wa Mariya hi singita ra Yehovha, leswi swi endle leswaku N’wana loyi wa Xikwembu la rhandzekaka a velekiwa tanihi munhu wa nyama. (Yohane 1:1-3, 14; Vafilipiya 2:6, 7) Yehovha u endle leswaku Yesu a nga khumbiwi hi xidyoho xa Adamu. Ku hambana ni sweswo, Yesu u velekiwe a hetisekile. Xisweswo a a ri ni leswi Adamu a swi lahleke—vutomi bya munhu lebyi hetisekeke. Eku heteleleni, ku kumeke munhu la nga hakelaka leswi koxiwaka hi xidyoho! Sweswo hi leswi Yesu a swi endleke hi Nisan 14, 33 C.E. Hi siku rero leri nga rivalekiki, Yesu u pfumerile ku dlayiwa hi vakaneti vakwe, hi ndlela yoleyo a nyikela “nkutsulo lowu yelanaka.”—1 Timotiya 2:6.

Ntikelo Wa Vutomi Bya Munhu La Hetisekeke

12. (a) Hlamusela ku hambana ka nkoka loku nga kona exikarhi ka rifu ra Yesu ni ra Adamu. (b) Yesu u ve ‘Tatana La Nga Riki Na Ku Hela’ eka vanhu lava yingisaka hi ndlela yihi?

¹² Ku ni ku hambana exikarhi ka rifu ra Yesu ni leriya ra Adamu—ku hambana loku kandziyisaka nkoka wa nkutsulo. A a swi fanela leswaku Adamu a fa, hikuva u tlule nawu wa Muvumbi wakwe hi ku swi rhandza. (Genesa 2:16, 17) Ku hambana ni sweswo, Yesu a a nga faneriwi hi ku fa nikatsongo, hikuva “a nga xi endlanga xidyoho.” (1 Petro 2:22) Kutani loko Yesu a fa, a a ri ni nchumu wa nkoka swinene, lowu Adamu lowa mudyohi a nga ri na wona loko a fa—ku nga mfanelo yo kuma vutomi lebyi nga heriki. Xisweswo, rifu ra Yesu a ri ri ni ntikelo wa leswaku ri nga va gandzelo. Loko a tlhandlukela etilweni tanihi munhu wa moya, u nyikele ntikelo wa gandzelo rakwe eka Yehovha. (Vaheveru 9:24) Hi ku endla tano, Yesu u xave vanhu lava nga ni xidyoho kutani a va Tata wa vona lontshwa, a siva Adamu. (1 Vakorinto 15:45) Hi yona mhaka leyi Yesu a vitaniwaka ‘Tatana La Nga Riki Na Ku Hela.’ (Esaya 9:6) Anakanya leswi leswi swi vulaka swona! Adamu, tatana la nga ni xidyoho, u hundzisele rifu eka vana va yena hinkwavo. Yesu, Tatana la hetisekeke, u tirhisa ntikelo wa gandzelo rakwe leswaku a nyika vanhu lava yingisaka, vutomi lebyi nga heriki.

13. (a) Hlamusela ndlela leyi Yesu a xi suleke ha yona xikweleti lexi endliweke hi Adamu. (b) Hikwalaho ka yini gandzelo ra Yesu ri nga xi susi xidyoho xa vatswari va hina vo sungula?

¹³ Kambe, swi nga endlekisa ku yini leswaku ku fa ka munhu un’we ku funengeta swidyoho swa vanhu vo tala? (Matewu 20:28) Eka xihloko xin’wana xa le malembeni lama hundzeke, hi tshame hi fanisa nkutsulo hi ndlela leyi: “Anakanya hi fektri leyikulu leyi nga ni vatirhi va madzana-dzana. Kutani murhangeri wa fektri la nga tshembekiki u endla leswaku bindzu leri ri wa, kutani fektri yi pfariwa. Madzana-dzana ya vanhu a va ha ri na ntirho sweswi naswona a va ha swi koti ku hakela swikweleti swa vona. Vanghana va vona va vukati, vana swin’we ni lava va va kolotaka, va xaniseka hinkwavo hikwalaho ka ku homboloka ka wanuna loyi un’we! Hiloko ku ta xigwili xin’wana kutani xi riha nandzu wa khampani leyi naswona fektri yi tlhela yi pfuriwa. Kutani ku herisiwa ka xikweleti xexo xin’we, ku wisisa vatirhi, mindyangu ya vona ni lava a va va kolota. Kambe, xana murhangeri wo sungula, wa vuyeriwa eka mpfuno lowu? Doo, u le khotsweni naswona u heleriwe hi ntirho hi ku helela! Hilaha ku fanaka, ku suriwa ka nandzu wun’we wa Adamu ku vuyerisa timiliyoni ta vana va yena—ku nga ri Adamu.”

14, 15. Hikwalaho ka yini ku nga vuriwaka leswaku Adamu na Evha va dyohe hi ku swi rhandza, naswona xiyimo xa hina xi hambana njhani ni xa vona?

¹⁴ Leswi i swinene. Tsundzuka, Adamu na Evha va dyohe hi vomu. Va hlawule ku ka va nga xi yingisi Xikwembu. Kambe hina, hi velekiwe exidyohweni. A hi nge tihlawuleli. Ku nga khathariseki leswaku hi lwa ku fikela kwihi, a hi nge swi koti ku papalata ku dyoha hi ku helela. (1 Yohane 1:8) Minkarhi yin’wana hi nga titwa ku fana na Pawulo la tsaleke a ku: “Loko ndzi navela ku endla leswi lulameke, leswo biha swi kona eka mina. Kunene ndza wu tsakela nawu wa Xikwembu hi ku ya hi munhu loyi ndzi nga yena endzeni, kambe eswirhweni swa mina ndzi vona nawu wun’wana lowu lwaka ni nawu wa mianakanyo ya mina, wu ndzi endla khumbi ra nawu wa xidyoho lowu nga eswirhweni swa mina. Mina munhu wa maxangu!”—Varhoma 7:21-24.

¹⁵ Kambe, hi ni ntshembo hikwalaho ka nkutsulo! Yesu i mbewu leyi, hilaha Xikwembu xi tshembiseke ha kona, ‘matiko hinkwawo ya misava ma nga ta tikatekisa ha yona.’ (Genesa 22:18; Varhoma 8:20) Gandzelo ra Yesu ri pfula nyangwa wa leswaku vanhu lava pfumelaka eka yena va kuma malunghelo yo tala. A hi kambisiseni man’wana ya wona.

Ku Vuyeriwa Eka Nkutsulo Wa Kreste

16. Ku nga khathariseki xiyimo xa hina xa vudyoho, hi vuyeriwa njhani hikwalaho ka nkutsulo wa Yesu?

¹⁶ Yakobo mutsari wa Bibele wa pfumela leswaku “ha khunguvanyeka minkarhi yo tala.” (Yakobo 3:2) Kambe, hikwalaho ka nkutsulo wa Kreste, swihoxo swa hina swi nga rivaleriwa. Yohane wa tsala: “Loko mani na mani a endla xidyoho, hi ni mupfuni eka Tatana, a nga Yesu Kreste, loyi a lulameke. Naswona yena i gandzelo ra ku vuyelelana ra swidyoho swa hina.” (1 Yohane 2:1, 2) Kambe, a hi fanelanga hi xi tekela ehansi xidyoho. (Yudha 4; ringanisa 1 Vakorinto 9:27.) Hambiswiritano, loko hi dyoha, hi nga chulula mbilu ya hina eka Yehovha, hi tiyiseka leswaku u ‘tiyimiserile ku rivalela.’ (Pisalema 86:5; 130:3, 4; Esaya 1:18; 55:7; Mintirho 3:19) Xisweswo, nkutsulo wu endla leswaku hi kota ku tirhela Xikwembu hi ripfalo leri baseke naswona wu endla leswaku hi swi kota ku xi tshinelela hi xikhongelo hi vito ra Yesu Kreste.—Yohane 14:13, 14; Vaheveru 9:14.

17. Hikokwalaho ka nkutsulo, hi yihi mikateko leyi hi nga yi kumaka enkarhini lowu taka?

¹⁷ Nkutsulo wa Kreste wu pfula ndlela ya leswaku xikongomelo xa Xikwembu xi hetiseka—xa leswaku vanhu lava yingisaka va hanya hilaha ku nga heriki eParadeyisini emisaveni. (Pisalema 37:29) Pawulo u tsarile a ku: “Ku nga khathariseki leswaku switshembiso swa Xikwembu swi tarise ku yini, swi ve Ina ha yena [Yesu].” (2 Vakorinto 1:20) I ntiyiso, rifu “ri ve hosi.” (Varhoma 5:17) Nkutsulo wu endla leswaku Xikwembu xi swi kota ku herisa ‘nala loyi wo hetelela.’ (1 Vakorinto 15:26; Nhlavutelo 21:4) Nkutsulo wa Yesu wu nga vuyerisa ni lava se va feke. Yesu u te: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena [Yesu] kutani va huma.”—Yohane 5:28, 29; 1 Vakorinto 15:20-22.

18. Hi rihi khombo leri vangiweke hi xidyoho eka vanhu, kutani leswi swi ta herisiwa njhani emisaveni leyintshwa ya Xikwembu?

¹⁸ Anakanya leswaku swi ta tsakisa njhani ku hanya hi ndlela leyi vutomi a byi fanele byi va ha yona—byi ri hava mivilelo leyi hi karhataka swonghasi namuntlha! Xidyoho a xi hi endli leswaku hi nga fambisani ni Xikwembu ntsena, kambe xi tlhela xi hi endla hi nga fambisani ni mianakanyo, mbilu swin’we ni miri wa hina. Hambiswiritano, Bibele yi tshembisa leswaku emisaveni leyintshwa ya Xikwembu, ‘a ku nge vi na muaki la nga ta ku: “nḍa v̌abya.”’ Ina, ku vabya emirini ni le mintlhavekweni a ku nge he va karhati vanhu. Hikwalaho ka yini? Esaya wa hlamula: “Tiko le’ri akeke kona ri riv̌aleriwile ŝidyoho ŝa rona.”—Esaya 33:24.

Nkutsulo—Xikombiso Xa Rirhandzu

19. Xana un’wana ni un’wana wa hina u fanele a titwisa ku yini hi nkutsulo wa Kreste?

¹⁹ Rirhandzu, ri susumetele Yehovha leswaku a rhumela N’wana wakwe la rhandzekaka. (Varhoma 5:8; 1 Yohane 4:9) Hilaha ku fanaka, rirhandzu ri susumetele Yesu leswaku a “nantswa rifu hikwalaho ka vanhu hinkwavo.” (Vaheveru 2:9; Yohane 15:13) Hi yona mhaka leyi Pawulo a tsaleke a ku: “Rirhandzu leri Kreste a nga na rona ra hi susumeta . . . U fele hinkwavo leswaku lava va hanyaka va nga ha tihanyeli, kambe va hanyela loyi a va feleke a tlhela a pfuxiwa.” (2 Vakorinto 5:14, 15) Loko hi swi tlangela leswi Yesu a hi endleleke swona, hi ta endla hi ku pfumelelana na swona. Phela, nkutsulo wu endla leswaku hi ponisiwa eku feni! Handle ko kanakana, a hi swi lavi ku endla swilo leswi nga kombisaka leswaku hi ri tekela ehansi gandzelo ra Yesu.—Vaheveru 10:29.

20. Hi tihi tindlela tin’wana leti ha tona hi yingisaka “rito” ra Yesu?

²⁰ Hi nga kombisa njhani leswaku ha wu tlangela swinene nkutsulo? Emahlweninyana ka ku khomiwa kakwe, Yesu u te: “Loko munhu a ndzi rhandza u ta hlayisa rito ra mina.” (Yohane 14:23) “Rito” ra Yesu ri katsa xileriso xa yena xa leswaku hi hisekela ku hetisisa xileriso lexi nge: “Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula.” (Matewu 28:19) Ku yingisa Yesu nakambe ku lava leswaku hi rhandza vamakwerhu va hina va moya.—Yohane 13:34; 35.

21. Hikwalaho ka yini hi fanele hi va kona enkhubyeni wa Xitsundzuxo hi April 1?

²¹ Yin’wana ya tindlela letinene to kombisa leswaku ha wu tlangela nkutsulo i ku va kona eka Xitsundzuxo xa rifu ra Kreste, lexi eka lembe leri xi nga ta khomiwa hi April 1.a Leswi na swona i xiphemu xa “rito” ra Yesu, hikuva loko a simeka nkhuvo lowu, Yesu u lerise valandzeri vakwe a ku: “Tshamani mi ri karhi mi endla leswi leswaku mi ndzi tsundzuka.” (Luka 22:19) Loko hi va kona eka xiendlakalo lexi xa nkoka swinene ni ku yingisisa swinene hinkwaswo leswi Kreste a swi leriseke, hi ta kombisa leswaku ha tiyiseka hakunene leswaku nkutsulo wa Yesu i ndlela ya Xikwembu ya ku ponisa vanhu. Ina, “a ku na ku ponisiwa eka un’wana.”—Mintirho 4:12.

[Nhlamuselo ya le hansi]

Wa Tsundzuka Xana?

◻ Hikwalaho ka yini vanhu va nga swi koti ku tikutsula eka xiyimo xa vona xa vudyoho?

◻ Yesu i “nkutsulo lowu yelanaka” hi ndlela yihi?

◻ Xana Yesu u tirhise vutomi byakwe lebyi hetisekeke leswaku a pfuna hina hi ndlela yihi?

◻ Hi yihi mikateko leyi kumiwaka hi vanhu hikwalaho ka nkutsulo wa Kreste?

[Xifaniso lexi nga eka tluka 15]

I munhu la hetisekeke ntsena—la fanaka na Adamu—la nga hetisisaka leswi vululami byi lavaka swona

[Xifaniso lexi nga eka tluka 16]

Tanihi leswi Yesu a a ri munhu la hetisekeke, rifu rakwe a ri ri ni ntikelo wo endla gandzelo